Passer au titre

Mecatronist / Mecatronista da pendicularas AFQ

Mecatronists e mecatronistas da pendicularas controlleschan e reparan indrizs da pendicularas e maschinas. Ultra da quai empostan els material e servan turists a la cassa.

Lavurs

Mecatronists e mecatronistas da pendicularas guardan per in manaschi da pendicularas segir. Els surveglian indrizs da pendicularas, runals sco er pendicularas, sutgeras e telecabinas. Els controlleschan regularmain sugas, rollas, tracziuns, frains, pilotadis e cumponentas da construcziun. Tenor basegn revedan els parts da la construcziun e mainan tras reparaturas vi d’isegls mecanics u electrics.

Per chattar disturbis legian mecatronists da pendicularas plans tecnics. A moda cumpetenta dovran els isegls sco stgalper, resgia, tarader, turn, sfundret ed isegls da crennadira. Cun struvegiar, far cugns, fundar, rebatter sco er tras tatgar, lutegiar e buglir fan els colliaziuns tranter singulas parts ch’els controlleschan suenter sin lur capacitad da chargia.

Mecatronists da pendicularas sa tegnan vi da las prescripziuns davart la segirezza da la lavur, la protecziun da la sanadad e da l’ambient sco er la garanzia da la qualitad. Lur mintgadi professiunal vegn savens influenzà da cundiziuns meteorologicas e da la situaziun da lavina. Els ston per quest motiv savair interpretar il bulletin da lavinas correctamain e tut tenor situaziun e cumond da la direcziun tecnica prender las mesiras necessarias, sco per exempel evacuar passagiers or d’ina cabina bloccada.

Mecatronists da pendicularas mainan ultra da quai er la correspundenza, scrivan rapports e fan annunzias da donn. Els empostan material, reglan ils pajaments e controlleschan la glista da furniziun suenter l’entrada da la rauba.

Scolaziun

Basa legala

Ordinaziun federala 25-6-2019

Durada

4 onns (emprendissadi scursanì en ina professiun mecanica-electronica).

Furmaziun en la pratica

En in’interpresa da la branscha da pendicularas u en in manaschi da pendicularas per transportar rauba e/u persunas

Furmaziun en scola

En il center da furmaziun da pendicularas Svizra, Meiringen, en furma da curs da bloc

Cumpetenzas professiunals:

  • elavuraziun da material da fabricaziun resp. instrucziun da material da fabricaziun, leger plans / dissegns / schemas
  • quint spezialisà, fisica, informatica
  • manaschi, administraziun, turissem
  • mecanica, tecnica da fluid, motors termics
  • electrotecnica
  • instrucziun da construcziun
  • meteorologia ed instrucziun da lavinas
  • mantegniment

Curs ordaifer il manaschi

Tar differents temas

Maturitad professiunala

Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.

Diplom

Attestat federal da qualificaziun "mecatronist / mecatronista da pendicularas AFQ"

Premissas

Furmaziun preliminara
  • scola populara terminada, stgalim da scola mez u il pli aut
  • bunas prestaziuns en matematica e fisica
Pretensiuns
  • interess per tecnica e turissem
  • pensar ed agir cumplessiv
  • enclegientscha tecnica e plaschair da s’occupar cun giasts
  • abilitad da communitgar e da schliar conflicts
  • agir a moda autonoma
  • flexibilitad
  • buna sanadad ed abilitad da supportar squitsch
  • abilitad da lavurar en ina gruppa

Furmaziun supplementara

Curs

purschida da Pendicularas Svizra sco er da scolas spezialisadas

Examen professiunal (EP)

cun certificat professiunal federal: spezialist / spezialista da pendicularas, spezialist / spezialista en servetsch da pistas e da salvament, spezialist / spezialista da mantegniment euv.

Examen professiunal superiur (EPS)

p.ex. manader / manadra dipl. da mantegniment

Scola spezialisada superiura (SSS)

tecnicist / tecnicista dipl. SSS electrotecnica, tecnicist / tecnicista dipl. SSS construcziun da maschinas euv.

Scola auta spezialisada (SAS)

Bachelor of Science (SAS) en tecnica da maschinas, Bachelor of Science (SAS) en electrotecnica euv.

Cundiziuns da lavur

Mecatronists da pendicularas lavuran sin indrizs turistics en ils culms, en interpresas da pendicularas, dentant er en manaschis industrials cun pendicularas per il transport da rauba e da persunas.

Sin basa da lur furmaziun vasta han mecatronists da pendicularas bunas schanzas sin il martgà da lavur. La dumonda suenter persunas dal fatg qualifitgadas è gronda.

Ulteriuras infurmaziuns

Center da furmaziun da Pendicularas Svizra
Zeughausstrasse 19
3860 Meiringen
Tel: 033 972 40 00
URL: www.seilbahnen.org



orientation.ch