Passer au titre

Spezialist / Spezialista da products da charn AFQ

Tut tenor accent sa fatschentan spezialistas e spezialists da products da charn cun la producziun, elavuraziun u la commerzialisaziun da products da charn. Els cumpran e fan la meztga dals animals, taglian, manizzan ed elavuran ils products da charn. En l’affar da vendita presentan els ils products da charn e cusseglian la clientella.

Lavurs

Accent producziun
  • cumprar ils animals da meztga
  • organisar la stgargiada dals animals e garantir in tractament senza stress
  • determinar ina metoda da meztga optimala
  • narcotisar e mazzar ils animals tenor las leschas  da la protecziun dals animals
  • far giu la pel a l'animal ed allontanar l'ossa
  • calcular la paisa
  • emplenir ora ils formulars cun quità
  • elavurar u dismetter taglins da charn ed il dadens
Accent elavuraziun
  • preparar la charn, spezarias ed autras ingredienzas
  • elavurar liongias, terrinas e pastetas tenor recept
  • elavurar products da charn en salamuira sco charnpiertg, pulpa, schambun e spezialitads regiunalas tenor il recept da manaschi
  • fimentar, setgentar e cuschinar ils products per dar ad els in aroma aparti
  • elavurar products da charn pronts per cuschinar ed elavurar spaisas dal di
  • pachetar giu ils products ch'els pon vegnir vendids
Accent delicatessas e raffinaziun
  • metter ensemen plattas da charn per fondue chinoise, gril u buffets
  • preparar canapés, paunets emplenids u auters products da traiteur
  • preschentar ils products a moda attractiva uschè ch'i fa gust d'als cumparar
  • far bainvegni cordialmain a la clientella e la cussegliar cumpetentamain
  • prender encunter ed elavurar empustaziuns
  • tagliar, pasar e calcular il pretsch da la charn
  • far cassa
  • porscher servetsch da party

Scolaziun

Durada

3 onns

Accents

  • producziun
  • elavuraziun
  • delicatessas / raffinaziun

Furmaziun en la pratica

En fatschentas da charn sco er en manaschis d’elavuraziun commerzials u industrials

Furmaziun en scola

1 di l'emna a la scola professiunala

Roms professiunals

  • elavuraziun da charn
  • segirezza da la protecziun da l’ambient e da las prescripziuns davart la qualitad
  • producziun da charn
  • preparaziun da charn e da products da charn P.ex. giuditgar la charn
  • producziun e vendita da products da charn e da delicatessas
  • Curs ordaifer il manaschi

    Emprender ed exercitar a moda pratica la basa professiunala

    Maturitad professiunala

    Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.

    Diplom

    Attestat federal da qualificaziun "spezialist / spezialista da products da charn AFQ"

Premissas

Furmaziun preliminara
  • temp da scola obligatoric terminà
Pretensiuns
  • interess per l'elavuraziun da victualias, spezialmain da charn
  • interess per bunas tratgas e la cuschina
  • inschign manual
  • chapientscha tecnica
  • senn da responsabladad
  • senn d’igiena
  • buna constituziun (lavur en stanzas fraidas)
  • plaschair vi dal contact cun la clientella
  • buna demananza

Furmaziun supplementara

Curs

purschidas dal center da furmaziun per l’economia da charn ABZ a Spiez BE

Spezialisaziun

fimentera, saleria, mazlaria da liongias, cumpra, vendita, fatschenta da traiteurs, service da partis

Examen professiunal (EP)

cun certificat professiunal federal: manader / manadra da gestiun economia da charn, tecnolog / tecnologa da victualias

Examen professiunal superiur (EPS)

maister mazler / maistra mazlera, tecnolog / tecnologa da victualias cun diplom federal

Scola spezialisada superiura (SSS)

tecnicist diplomà / tecnicista diplomada SSS, direcziun speziala tecnologia da victualias

Scola auta spezialisada (SAS)

Bachelor of Science (SAS) en tecnologia da victualias, Bachelor of Science (SAS) en biotecnologia, Bachelor of Science (SAS) en Life Science Technologies. Tut tenor scola auta spezialisada valan differentas cundiziuns d'admissiun.

Cundiziuns da lavur

Spezialists da products da charn lavuran en manaschis commerzials u industrials da l’elavuraziun da charn, en affars spezialisads da charn u en il commerzi da charn. Ils temps da lavur varieschan tenor las direcziuns spezialisadas. Spezialists da products da charn che lavuran en las direcziuns da la producziun e da l’elavuraziun cumenzan per ordinari pli baud cun lur lavur che quels che lavuran en la direcziun da la raffinaziun, nua ch’ils temps da lavur sa drizzan tenor ils temps d’avertura dals affars.

Cun la furmaziun supplementara correspundenta pon els lavurar en posiziuns da cader en ils secturs da cumpra e da vendita u surpigliar la direcziun dal manaschi. Tscherts spezialists da products da charn possedan in agen manaschi.

Ulteriuras infurmaziuns

Schweizer Fleisch-Fachverband SFF
URL: www.swissmeatpeople.ch




orientation.ch