Passer au titre

Spezialist / Spezialista da communicaziun d'hotellaria AFQ

Spezialists e spezialistas da communicaziun d’hotellaria lavuran a la recepziun e s’occupan dals giasts. Els enconuschan ils process en ils differents champs d’in hotel e san gidar en cas da basegn en tut las partiziuns. En il backoffice surpiglian els lavurs da marketing e da communicaziun.

Lavurs

Els exequeschan suandantas lavurs:

Recepziun ed administraziun
  • retschaiver ils giasts ed als infurmar davart ils servetschs da l’hotel
  • dar adia als giasts cura ch'els turnan puspè a chasa e s'infurmar sch'els èn stads cuntents cun las prestaziuns da l’hotel
  • metter a quint l’import avert
  • administrar datas da manaschi, da la clientella e dals collavuraturs
  • liquidar correspundenza interna ed externa sco mails e brevs
Communicaziun
  • communitgar cun ils giasts, clientella e collavuraturs a scrit ed a bucca en tudestg ed en englais ed en in’ulteriura lingua
  • realisar campagnas da marketing e da communicaziun sco per exempel postar contribuziuns sin social media, metter il menu actual online, planisar offertas spezialas per giasts
Alimentaziun e servetsch
  • emprender la basa dal service, p.ex. enconuscher menus, recumandar vins, dustar giud maisa
  • emprender d'enconuscher differentas metodas da cuschinar
  • savair cuschinar simplas tratgas
Hotellaria e tegnairchasa
  • nettegiar las chombras ed il restaurant
  • preparar la laschiva per las chombras dal hotel
  • administrar il magasin da material per ils biros

Scolaziun

Durada

3 onns

Furmaziun en la pratica

En in hotel

Furmaziun en scola

Tut tenor onn da scolaziun: 1 fin 2 dis per emna a la scola professiunala

Roms professiunals

  • cussegliar e s’occupar dals giasts e dals partenaris
  • garantir persistenza e las prescripziuns da qualitad
  • crear ed organisar mesiras da marketing e cooperaziuns
  • organisar e realisar process en las lavurs administrativas

Curs ordaifer il manaschi

emprender ed exercitar a moda pratica la basa professiunala (15 dis durant 3 onns)

Maturitad professiunala

Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.

Diplom

Attestat federal da qualificaziun "spezialist/spezialista da communicaziun d’hotellaria AFQ"

Premissas

Furmaziun preliminara
  • temp da scola obligatoric terminà
  • bunas prestaziuns en la lingua materna ed en linguas estras
Pretensiuns
  • plaschair vi dal contact cun umans
  • dun da linguas a bucca ed a scrit
  • enconuschientschas da linguas estras
  • buna demananza
  • talent d’organisaziun
  • senn per l’urden
  • abilitad da supportar squitsch en situaziuns hecticas
  • plaschair vi da lavurs al computer

Furmaziun supplementara

Curs

purschidas da hotelleriesuisse, GastroSuisse e da scolas spezialisadas superiuras

Emprendissadi scursanì

spezialist/spezialista d’hotellaria AFQ, spezialist/spezialista da restauraziun AFQ, cuschinier/cuschiniera AFQ

Examen professiunal (EP)

cun certificat professiunal: schef/scheffa da recepziun, manader/manadra restauraziun, manader/manadra da sectur en hotellaria-economia da chasa

Examen professiunal superiur (EPS)

manader/manadra dipl. da restauraziun, manader/manadra dipl. hotellaria-economia da chasa

Scola spezialisada superiura (SSS)

hotelier/hoteliera dipl. SSS, restauratur/restauratura dipl. SSS

Scola auta spezialisada (SAS)

Bachelor of Science (SAS) in International Hospitality Management.  Tut tenor scola auta spezialisada valan differentas cundiziuns d'admissiun.

Cundiziuns da lavur

Spezialists da communicaziun d’hotellaria lavuran a la recepziun da hotels da 2 fin 5 stailas u en pitschens hotels da famiglia en regiuns da turissem, en citads grondas u en regiuns ruralas. Bunas enconuschientschas da linguas èn per questa professiun indispensablas. Ultra da quai pon spezialists da communicaziun d’hotellaria cun bunas enconuschientschas da linguas er surpigliar engaschaments en autras regiuns da la Svizra u en l’exteriur.

Il temp da lavur en la hotellaria è irregular. La professiun pretenda flexibilitad e grond engaschi persunal, en spezial durant la fin d’emna. Tut tenor manaschi variescha il squitsch da lavur da stagiun tar stagiun.

Ils spezialists da communicaziun d’hotellaria han bunas schanzas sin il martgà da lavur.

Ulteriuras infurmaziuns

Berufsinformationen und Lehrstellen aus Hotellerie und Gastronomie
URL: www.berufehotelgastro.ch

GastroSuisse
Verband für Hotellerie und Restauration
Blumenfeldstr. 20
8046 Zürich
Tel: +41 848 377 111
URL: www.gastrosuisse.ch

Hotelleriesuisse
Monbijoustr. 130
3001 Bern
Tel: +41 31 370 42 83
URL: www.hotelleriesuisse.ch



orientation.ch