Passer au titre

Spezialist / Spezialista da transports sin via AFQ

Spezialists e spezialistas da  transports sin via transportan differenta rauba cun camiuns ed auters vehichels (permiss dad ir cun auto B/BE). Els planiseschan ils transports e san co ch’els ston ir enturn cun la rauba. Plinavant san els era far pitschnas reparaturas e metter en urden pannas.

Lavurs

Els exequeschan suandantas lavurs:

Preparaziun
  • organisar transports, planisar rutas e giuditgar con ditg ch'i dovra da chargiar e stgargiar  la rauba
  • controllar ils documents dal transport, p.ex. adressas, termins e paisa da la rauba
  • examinar il stadi dal vehichel, sco las rodas, ils frains e la glisch e controllar sch'igl ha avunda carburant en il tanc
  • chargiar il vehichel gulivamain ed uschia ch'i fa senn
  • enconuscher e resguardar las prescripziuns da segirezza, segirar la chargia, p.ex. cun tschintas, bastuns da fier u raits
Transport e furniziun da la rauba
  • ir cun il vehichel al lieu da furniziun e resguardar latiers las cundiziuns dal traffic (traffic, aura), duvrar apparats electronics sco il planisader da rutas ed il registratur da viadis
  • stgargiar la rauba tar la clientella e controllar schebain tut è en urden
  • reglar las formalitads, sco p.ex. surdar il scrit da furniziun ed al laschar suttascriver da la clientella
  • resguardar las prescripziuns davart la segirezza da la lavur sco er davart la protecziun da l’ambient ed er enconuscher las prescripziuns en las tiaras en las qualas la rauba vegn transportada
Mantegniment dals vehichel
  • nettegiar ils vehichel endadens ed ordador
  • far controllas (p.ex. electrotecnica, pressiun dals pneus u glisch) e remplazzar tocca defecta
  • far pitschnas reparaturas vid ils vehichels
  • mantegnair guaffens e meds d'agid
  • dismetter il rument a moda adattada a l'ambient

Scolaziun

Basa legala

Ordinaziun federala 23-8-2012 (versiun dal 1-1-2018)

Durada

3 onns

Furmaziun en la pratica

En in manaschi da transport

Furmaziun en scola

1 di per emna a la scola professiunala

Roms professiunals

  • manar tras transports
  • segirar il mantegniment, garantir la segirezza e la protecziun da l’ambient

Curs ordaifer il manaschi

Tar differents temas: p.ex. curs da basa ADR/SDR, ECO e curs da segirezza da charrar, examen da plunader

Maturitad professiunala

Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.

Permiss d’emprender dad ir cun auto

Cun 17 onns survegnan ils emprendists il permiss d’emprender dad ir cun auto en las categorias B, C e CE. Els vegnan accumpagnads dal scolast sin ils viadis. Suenter l’examen dad ir cun auto reussì mainan els tras incumbensas da transport a moda autonoma.

Diplom

Attestat federal da qualificaziun "spezialist / spezialista da transports sin via AFQ"

Premissas

Furmaziun preliminara
  • temp da scola obligatoric terminà
  • premissa per ina furmaziun è la vegliadetgna minimala da 16 onns (di da referenza: 30 da november dal 1. onn d'emprendissadi).
Pretensiuns
  • enclegientscha tecnica
  • inschign manual
  • abilitad da metter avant chaussas a moda objectiva
  • capacitad da giuditgar e da decider
  • autonomia
  • plaschair da contact
  • talent d’organisaziun
  • discreziun
  • flexibilitad pertutgant temp da lavur
  • fidadadad
  • bun dun d’observaziun
  • senn per responsabladad
  • buna sanadad e fitness corporala (attestat dal medi da confidenza è necessari)
  • abilitad da supportar squitsch psichic
  • plaschair dad esser en viadi
  • abilitad da lavurar en ina gruppa
  • visita medicala tar in medi da confidenza tenor las directivas da l’admissiun al traffic

Furmaziun supplementara

Curs

purschidas dal Schweizerischer Nutzfahrzeugverband ASTAG

Spezialisaziun

incumbensas en il traffic regiunal u sco manischunz / manischunza d’autobus sco er camiunist / camiunista da camiuns tractor, tancs e transports spezials per ruments spezials resp. rauba privlusa

Scolast / scolasta d’ir cun auto

per autos, camiuns u motos

Examen professiunal (EP)

cun certificat professiunal federal: spezialist / spezialista da pneus, manischunz  / manischunza d’autobus, guid / guida da viadi, disponent / disponenta transport e logistica euv.

Examen professiunal superiur (EPS)

p.ex. manader / manadra da gestiun dipl. transport e logistica

Scola auta spezialisada (SAS)

Bachelor of Science (SAS) en tecnica d’automobils e vehichels, Bachelor of Science (SAS) en sistems da traffic, CAS Management transport & logistica (HSLU) euv. Tut tenor scola auta spezialisada valan differentas cundiziuns d'admissiun.

Cundiziuns da lavur

Spezialists e spezialistas da transports sin via lavuran en interpresas industrialas, interpresas da transport ed industria. Malgrà la gronda libertad ch’els han en lur professiun portan els blera responsabladad per ils utilisaders da las vias, per lur clientella, l'ambient e la rauba ch'els transportan.

Il temp da lavur po esser malregulà e sa drizza a las directivas legalas e dal manaschi. Durant ils viadis a l’exteriur èsi er pussaivel ch’els stattan davent da chasa durant intgins dis.

Cun experientscha professiunala correspundenta e furmaziun supplementara pon els  surpigliar funcziuns sco schef / scheffa dal parc da vehichels e schef / scheffa da la garascha u lavurar sco manischunz / manischunza d’autobus u manischunz / manischunza da bus en il traffic public u privat. En gronds manaschis pon els er surprender funcziuns organisatoricas, sco per exempel sco schef / scheffa da transport u sco disponent / disponenta da transport u sco manader / manadra da partiziun u dad in entir manaschi.

Ulteriuras infurmaziuns

ASTAG Schweiz. Nutzfahrzeugverband
Wölflistr. 5
3006 Bern
URL: www.profis-on-tour.ch



orientation.ch