Lavurs
Mediamatichers e mediamaticras creeschan per exempel paginas-web u stampats per lur manaschi u per incumbensaders. Els preparan infurmaziuns per l’internet e las novas medias, endrizzan e tgiran intranets, realiseschan material da reclama e cumponan documentaziuns. Ultra da quai elavureschan els era stampats. Segund ils giavischs da la clientella u dals superiurs planiseschan els il decurs dal project ed elegian ils agids tecnics necessaris.
Tut tenor incumbensa creeschan mediamatichers per cumenzar ina simpla datoteca, sco per exempel ina curta sequenza da film, da fotos u da tuns. Cun programs adattads vegnan questas datotecas elavuradas. Alura sviluppan els propostas da design per ils products (screen u print). Els èn chaus creativs, enconuschan bain ils programs d’elavuraziun dals maletgs e da layout ed enconuschan l’effect da colurs e furmas. L’agir è adina drizzà a la gruppa en mira che duai vegnir pledentada cun agid dal product. Uschia sustegnan els era las mesiras da marketing dal manaschi.
Mediamatichers integreschan en paginas-web elements grafics u applicaziuns. Els san installar in Content Management System ed endrizzar ina pitschna banca da datas. Els fan attenziun ch’il design haja ina surfatscha bain chapibla e che l’utilisader sappia s’orientar spert. Mediamatichers preparan stampats per il squitsch. Els enconuschan pussaivladads e cunfins da las metodas da stampar ed adatteschan lur creaziuns correspundentamain.
Per preschentaziuns visualiseschan mediamatichers las infurmaziuns. Els san co che cuntegns vegnan tschiffads spert ed enconuschan tecnicas da preschentaziuns ed applicaziuns adattadas. Els installeschan apparats da multimedia ed als configureschan.
Mediamatichers han contact direct cun ils incumbensaders. Suenter avair terminà in project preschentan els lur product ed instrueschan ils utilisaders. Ultra da quai prendan els encunter dumondas ed incumbensas da clientella. Els scrivan offertas e quints e contracteschan en diversas linguas cun partenaris externs sco stampas ed interpresas d’informatica.
Mediamatichers enconuschan ils reglaments ed ils process da manaschi e sa tegnan strictamain vi da las perscripziuns da protecziun da datas, copyright e Corporate Identity.
Scolaziun
Basa legala
Ordinaziun federala 11-11-2010
Durada
4 onns
Furmaziun en la pratica
En interpresas da commerzi, d’industria, da servetschs ed en administraziuns
Furmaziun en scola
A la scola professiunala, en media 2 dis per emna
Roms professiunals
- producir ed utilisar multimedia
- realisar concepziun e design
- utilisar meds dad ICT
- collavurar en l’administraziun ed en l’economia da manaschi
- marketing e communicaziun
- collavuraziun en projects
Curs ordaifer il manaschi
Tar differents temas
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Attestat federal da qualificaziun "mediamaticher / mediamaticra AFQ"
Premissas
Furmaziun preliminara
- scola populara terminada
- interess e bunas prestaziuns en creativitad, matematica sco era en linguas (tudestg, franzos ed englais)
Pretensiuns
- bun dun receptiv
- capacitad da pensar logic ed abstract
- enclegientscha tecnica
- creativitad
- abilitad da communitgar
- talent d’organisaziun
- abilitad da lavurar en in team
- empatia
- capacitad da savair sa concentrar
Furmaziun supplementara
Curs
purschidas da scolas spezialisadas superiuras e d’associaziuns
Examen professiunal (EP)
cun certificat professiunal federal: mediamaticher / mediamaticra; tecno-poligraf / tecno-poligrafa; tipograf / tipografa per la communicaziun visuala; Screen Communicator; informaticher / informaticra en economia; sviluppader /sviluppadra d’applicaziuns dad ICT; tecnicist / tecnicista per sistems e raits dad ICT; spezialist / spezialista per l’organisaziun d’interpresas
Examen professiunal superiur (EPS)
manager da projects-web diplomà / managera da projects-web diplomada; manager dad ICT diplomà / managera dad ICT diplomada; expert / experta per l’organisaziun d’interpresas cun diplom federal
Scola spezialisada superiura (SSS)
manager da marketing SSS diplomà / managera da marketing SSS diplomada; tecnicist SSS per medias diplomà / tecnicista SSS per medias diplomada; tecnicist SSS per informatica diplomà / tecnicista SSS per informatica diplomada
Scola auta spezialisada (SAS)
Bachelor of Science (SAS) en inschigneria da medias, scienza d’infurmaziuns, informatica u informatica d’economia; Bachelor of Arts (SAS) en communicaziuns visuala
Cundiziuns da lavur
Mediamatichers han bleras pussaivladads da lavurar en tut las branschas. En interpresas da servetschs, interpresas industrialas ed administraziuns sco era en interpresas pitschnas e mesaunas èn ils spezialists tschertgads. Els lavuran en partiziuns da communicaziun, marketing e webdesign ed en interpresas ch’èn colliadas cun l’informatica.
Cun la fusiun da telecommunicaziun, da la tecnica da computers sco era da la tecnica da video e d’audio sa datti per ils mediamatichers adina novas pussaivladads da lavur. La furmaziun sco mediamaticher è ina buna basa per divers champs professiunals.
Ulteriuras infurmaziuns
ICT-Berufsbildung Schweiz
Geschäftsstelle
Aarbergergasse 30
3011 Bern
Tel: 058 360 55 50
URL: www.ict-berufsbildung.ch
URL: www.it-dreamjobs.ch