Spezialist / Spezialista d’occurrenzas AFQ

Spezialists e spezialistas d’occurrenzas èn responsabels per ils aspects tecnics tar preschentaziuns da teater ed opera, producziuns da televisiun e video sco er events e fieras.  Els guardan davos las culissas per il decurs segir da concerts, fieras e shows. Durant questas occurrenzas e producziuns èn els ils spezialists per la construcziun e la demontascha sco er il drizzar en e far ir la tecnica: tecnica d’illuminaziun, tecnica dal tun, tecnica da video, construcziuns da tribunas, integraziun da las medias ed effects spezials.

Tenor ils plans construeschan spezialists d’occurrenzas ils indrizs tecnics per l’illuminaziun, il tun ed il maletg. Cun lur enconuschientschas davart la tecnica dal tun, dal maletg e da l’illuminaziun elegian els per exempel ils reflecturs ed ils autpledaders adattads per las cundiziuns spazialas.  Els encableschan las singulas cumponentas da l’indriz, furneschan electricitad e fan tests cun l’indriz.

Spezialists d’occurrenzas èn responsabels per la montascha e la demontascha da construcziuns da tribunas. Tenor il plan collian els ils elements da construcziun ed als segireschan. L’eriger construcziuns purtantas segiras, palancaus e construcziuns temporaras – tant en stanzas sco er en il liber – tutga tar lur vita professiunala da mintgadi. Els monteschan e reconstrueschan quai ch’è necessari per il teater grond, per la show impressiunanta u per il grond spectacul al liber. Durant l’occurrenza manischeschan els las installaziuns da la tribuna e dals indrizs da la tecnica da scena.

En connex cun l’integraziun da las medias drizzan spezialists d’occurrenzas en computers, per exempel per projecziuns da video che vegnan duvradas durant concerts. Els collian il computer cun la rait e guardan per ina transmissiun segira da maletg e tun.

In’ulteriura incumbensa da spezialists d’occurrenzas è il diever d’effects spezials sco fim e tschajera. Els enconuschan ils effects e pon valitar, cura che spezialists sco per exempel pirotecnicists / pirotecnicistas ston vegnir consultads.

Tar tut las lavurs resguardan spezialists d’occurrenzas las prescripziuns da la segirezza da la lavur, da la prevenziun d’accidents e la protecziun da l’ambient. Els prendan mesiras che garanteschan la segirezza da la lavur e la protecziun da la sanadad per sasez, per il team tecnic ed ils artists / las artistas.