Accueil myOrientation

Me connaître - Etape 1: J'identifie mes intérêts, points forts et attentes professionnelles

Professions et formations - Etape 2: J’explore le monde des professions et des formations

Qualités requises et conditions d'admission - Etape 3: Je compare mes points forts avec les qualités requises et les conditions d'admission des métiers

Stages - Etape 4: J’explore en détail les métiers qui m’intéressent le plus

Projet professionnel - Etape 5: J’évalue mes résultats et me décide pour une profession ou une formation

Apprentissage - école - Etape 6: Recherche d'une place d'apprentissage et / ou inscription à une école

Préparation - Etape 7: Je me prépare à ma formation en entreprise ou en école

Dossier de travail - Tes résultats

Veuillez patienter...

Préparation de votre dossier myOrientation.

Déconnecté

Votre session de travail est expirée. Vous allez être redirigé sur la page d'accueil. Veuillez vous connecter à nouveau pour continuer votre session de travail.

Spezialist / Spezialista da tgira AFQ

Spezialists e spezialistas da tgira sustegnan uffants, giuvenils, attempads e persunas cun impediments en lur mintgadi. Els promovan e mantegnan lur independenza uschè bain sco pussaivel.

Lavurs

Spezialists e spezialistas da tgira s’occupeschan da carstgauns singuls u da gruppas en instituziuns dal di, chasas da tgira u gruppas d’abitar. Tut tenor la direcziun da spezialisaziun accumpognan els uffants, giuvenils en la vegliadetgna da scola, attempads u carstgauns cun basegns spezials. Els procuran che lezs sa sentian bain e sappian sa sviluppar bain. Tar tut quai stat adina la promoziun da l’independenza dals assistids en il center da lur lavur.

Spezialistas da tgira gidan ils assistids dad exequir lavurs dal mintgadi sco da sa vestgir e da sa trair ora, da sa lavar, da lavar ils dents, da mangiar e baiver sco era dad exequir lavurs dal tegnairchasa uschè independentamain sco pussaivel. Nua che quai na funcziuna betg als gidan ellas. Ellas structureschan il mintgadi, il temp liber ed ils dis da festa uschia ch’i fa senn. Ellas malegian, zambregian, fan lavurs manualas, chantan e fan musica cun las persunas assistidas. Ellas fan gieus, spassegiadas, excursiuns sco era exercizis da moviment cun els ed als encuraschan dad exequir activitads independentas. Ultra da quai als sustegnan ellas da tegnair il contact tar la famiglia e tar ils amis.

En la tgira da persunas impedidas u attempadas giogan las restricziuns mentalas, psichicas e/u corporalas ina rolla. Spezialistas da tgira en quellas duas direcziuns da spezialisaziun enconuschan ils basegns spezials dals pertutgads. Ellas als accumpognan e promovan tant sco pussaivel. Era en situaziuns difficilas sco tar disturbis da la persunalitad u da la percepziun, tar malsogna u tar la mort dals assistids reageschan ellas a moda professiunala.

Il svilup cumplessiv dals uffants è central en il sectur da la tgira d’uffants. Latiers tutgan las capacitads linguisticas, mentalas e motoricas, il cumportament social e la persunalitad. Spezialistas da tgira organiseschan il mintgadi tenor la vegliadetgna dals uffants e tenor la situaziun cun parts manadas e parts da gieu liber, cun activitads individualas u en gruppa. Ellas permettan als uffants da far experientschas variantas, da sa sviluppar individualmain ed il medem mument da s’arranschar en ina gruppa.

Spezialistas da tgira preparan activitads, las exequeschan e las evalueschan. Ellas mainan discurs cun confamigliars e cun persunas dal fatg. Il pli savens lavuran ellas en in team.

Scolaziun

Basa legala

Ordinaziun federala 16-6-2005 cun midadas dal 1-1-2018

Durada

3 onns, creschids davent 22 onns cun 2 onns experientscha: 2 onns

Direcziuns

  • tgira da persunas impedidas
  • tgira da persunas attempadas
  • tgira d’uffants
  • furmaziun generalista (mo en la Svizra franzosa)

Furmaziun en la pratica

En in manaschi da la direcziun tschernida

Furmaziun en scola

Per ordinari 1½ dis per emna a la scola professiunala, tut tenor chantun differentas direcziuns: la glista da scolas è da retrair tar SAVOIRSOCIAL

Roms professiunals

  • accumpagnar, assister en il mintgadi
  • communicaziun
  • collavuraziun
  • carstgaun e svilup
  • rolla professiunala
  • etica
  • cundiziuns da basa
  • organisaziun
  • tecnica da lavur
  • qualitad

Curs ordaifer il manaschi

Tar differents temas

Maturitad professiunala

Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.

Diplom

Attestat federal da qualificaziun "spezialist / spezialista da tgira AFQ"

Premissas

Furmaziun preliminara
  • scola populara terminada, stgalim da scola superiur u mesaun cun bunas prestaziuns
Pretensiuns
  • plaschair vi dal contact cun carstgauns
  • stabilitad psichica ed abilitad da supportar squitsch
  • buna constituziun corporala
  • ferm senn da responsabladad
  • empatia e prontadad da gidar
  • pazienza e respect
  • buna demananza, abilitad da lavurar en in team, da schliar conflicts e da communitgar
  • avertadad
  • abilitad d’organisar
  • abilitad da sa distanziar
  • senn per igiena ed urden
  • dun d’observaziun e sperta reacziun
  • flexibilitad: prontadad per temps da lavur irregulars, abilitad da reagir en situaziuns variablas

Furmaziun supplementara

Curs

purschidas d’associaziuns professiunalas e da scolas autas e spezialisadas

Qualificaziun supplementara

p.ex. manader / manadra d’ina canorta d’uffants pitschens

Examen professiunal (EP)

accumpagnader social / accumpagnadra sociala cun certificat professiunal federal, manader / manadra da team en instituziuns socialas e socialmedicinalas cun certificat professiunal federal, spezialist / spezialista da migraziun cun certificat professiunal federal.

Examen professiunal superiur (EPS)

manader d’instituziuns diplomà / manadra d’instituziuns diplomada en il sectur socialmedicinal, agog da lavur diplomà / agoga da lavur diplomada euv.

Scola spezialisada superiura (SSS)

spezialist d’activaziun diplomà / spezialista d’activaziun diplomada SSS, pedagog social diplomà / pedagoga sociala diplomada SSS, educatur d’uffants diplomà  / educatura d’uffants diplomada SSS, manader sociopedagogic da lavuratoris / manadra sociopedagogica da lavuratoris cun diplom SSS (furmaziun en la Svizra franzosa), animatur da communitads diplomà / animatura da communitads diplomada SSS.

Scola auta spezialisada (SAS)

p.ex. Bachelor of Arts/Science (SAS) da lavur sociala (cun approfundaziun en in dals secturs suandants: lavur sociala, pedagogia sociala u animaziun socioculturala), Bachelor of Science (SAS) da psicologia applitgada, Bachelor of Science (SAS) d’ergoterapia.

Cundiziuns da lavur

Spezialistas da tgira èn occupadas en differents secturs: en il sectur da la tgira da persunas cun impediments lavuran ellas p.ex. en lavuratoris protegids, en scolas da la pedagogia curativa u en gruppas d’abitar, en il sectur da la tgira da persunas attempadas en chasas d’attempads u en instituziuns per dements ed en il sectur da la tgira d’uffants en canortas d’uffants pitschens, en instituziuns cumplementaras a la scola, en chasas d’uffants u en famiglias grondas. Il temp da lavur po esser irregular ed includer engaschis durant la notg u durant la fin d’emna.

La purschida da plazzas d’emprendissadi variescha tenor direcziun da furmaziun e tenor regiun. Cunzunt en il sectur da la tgira d’uffants dovri grond engaschi durant la tschertga da plazzas d’emprendissadi, cunquai che la dumonda è pli gronda che la purschida.

En chantuns singuls pon creschids resp. persunas sur 22 cun almain 2 onns experientscha pratica en il sectur da tgira frequentar la furmaziun da basa scursanida.

Avis areguard praticums independents avant il cumenzament dal emprendissadi:
La furmaziun da basa professiunala sa vegnir cumenzada directamain suenter la finiziun dil temps da scola obligatoric. Tenor la lescha da furmaziun na basegna i betg in praticum independent.

Ulteriuras infurmaziuns

SAVOIRSOCIAL
Schweiz. Dachorganisation der Arbeitswelt Soziales
4600 Olten
Tel: 031 371 36 25
URL: www.savoirsocial.ch





orientation.ch