Lavurs
Flurists e fluristas mettan ensemen matgs e decoreschan arranschaments e tschupels cun accessoris, per exempel cun bindels u chandailas. Spezialmain blera lavur han els avant firads sco Nadal, Son Valentin u il di da la mamma. Lura fan els tenor la stagiun arranschaments da flurs spezials.
Las clientas ed ils clients na cumpran dentant betg mo matgs gia preparads. Spezialmain per occurrenzas sco nozzas u sepulturas vegnan empustads ornaments da flurs individuals. Fluristas gidan d’ademplir questas empustaziuns tenor ils giavischs da la clientella. Tut tenor incumbensa èn ellas er preschentas tar la decoraziun da las salas da festa u da las baselgias.
Fluristas tegnan net e rumì lur plaz da lavur. Ellas nettegian las vasas ed ils regals, dostan ils ruments e scuan il palantschieu. Ellas dattan aua a las plantas, allontaneschan feglia sflurida e taglian las flurs. Igl è impurtant ch’ellas enconuschian bain las differentas plantas e ch’ellas sappian co ch’ins tgiria quellas.
La gronda part dal temp lavuran fluristas en pe e cun ils mauns. Ellas dovran cuntels, forschs e zangas. Durant lur lavur da mintgadi auzan ellas er chaussas grevas sco vaschs da flurs, chistas e sadellas d’aua.
En l’affar servan fluristas la clientella e prendan encunter empustaziuns. Ellas surpiglian lavurs simplas en la vendita e respundan dumondas per telefon u e-mail.
Fluristas lavuran dentant er ordvart la localitad da lur affar. Ellas tgiran e s’occupan da las emplantaziuns en biros, ospitals e firmas sco er d’emplantaziuns sin balcuns privats u terrassas.
Scolaziun
Basa legala
Ordinaziun federala 10-10-2007
Durada
2 onns
Furmaziun en la pratica
En in affar da flurs u tar in distribuider a l’engrossa
Furmaziun en scola
1 di per emna a la scola professiunala
Roms professiunals
- vendita
- fluristica
- botanica
- furmaziun creativa
Curs ordaifer il manaschi
Emprender ed exercitar a moda pratica la basa professiunala
Diplom
Attest federal professiunal "flurist / flurista AFP"
Premissas
Furmaziun preliminara
- scola populara terminada
Pretensiuns
- interess vi da flurs e plantas
- plaschair vi dal contact cun clients e vi da la vendita
- buna sanadad
- abilitad da supportar squitsch
- inschign manual
- creativitad
- senn per furmas e colurs
Furmaziun supplementara
Curs
purschidas dal Schweizerischer Floristenverband, da scolas professiunalas u da purschiders privats
Flurist / Flurista AFQ
flurists / fluristas AFP pon far ina furmaziun da basa scursanida sco flurist / flurista AFQ cun attestat federal da qualificaziun (access al 2. onn da furmaziun).
Suenter han ellas las medemas pussaivladads da furmaziun supplementara sco flurists / fluristas AFQ.
Cundiziuns da lavur
Fluristas lavuran sco emploiadas en affars da flurs, en centers d’orticultura u tar distribuiders a l’engrossa.
Il temp da lavur sa drizza tenor ils temps d’avertura dals affars. Avant firads èsi spezialmain hectic. Fluristas ston lura savens far sururas.
Fluristas lavuran savens en localitads fraidas ed umidas. En la lavur dal mintgadi stattan ellas savens sin pe e ston er purtar chaussas grevas.
Ulteriuras infurmaziuns
Schweiz. Floristenverband
Förliwiesenstr. 4
8602 Wangen b. Dübendorf
Tel: 044 751 81 81
URL: www.florist.ch