Lavurs
Practicists e practicistas da victualias lavuran en manaschis che produceschan victualias e bavrondas. Or da las materias primas sco per exempel zutger, café, fava da cacau, farina e fritgs produceschan els bavrondas, pastizarias, confituras, glatsch e tschigulatta. Els produceschan era schuppas, sosas, salatas, pastas e tratgas precuschinadas.
Avant che cumenzar cun la producziun prendan ils practicists da victualias encunter las materias primas e las controlleschan, schebain la qualitad saja buna. Sche quai è il cas, giusteschan els l’indriz e maschaidan las ingredienzas cun grondas maschinas da maschadar.
Practicists da victualias lavuran cun differentas maschinas. Els persequiteschan e controlleschan exactamain ils pass da lavur durant la producziun. Sch’i dat problems tar la producziun, intervegnan els, frainan las maschinas e regleschan ellas da nov. Els controlleschan la colur, la savur ed il gust da las victualias finidas. La controlla dal product è gist uschè impurtanta sco la controlla da las maschinas, perquai che sbagls pon chaschunar gronds custs al manaschi.
Ils practicists da victualias vegnan sustegnids dals tecnologs da victualias AFQ. Disturbis elimineschan els a moda autonoma ed infurmeschan il schef u la scheffa en cas da basegn.
Practicists da victualias ston far attenziun a l’igiena ed a la nettezza. Els utiliseschan accuratamain las materias primas e las maschinas. Cura ch’in product è finì, nettegian els ils indrizs e las maschinas ch’èn vegnids utilisads. En spezial ston els respectar prescripziuns da segirtad, da protecziun da la sanadad e da l’ambient.
Scolaziun
Basa legala
Ordinaziun federala 25-7-2007
Durada
2 onns
Furmaziun en la pratica
En in manaschi da l’industria da victualias
Furmaziun en scola
10 curs da bloc che cuzzan mintgamai in’emna à 36 lecziuns a la scola professiunala Strickhof, Au/Wädenswil
Roms professiunals
- materias primas e fabricats mezfinids
- maschinas ed indrizs
- producziun industriala da mangiativas
- igiena, segirtad da lavur, protecziun da la sanadad, protecziun da l’ambient
Diplom
Attest federal professiunal "practicist / practicista da victualias AFP"
Premissas
Furmaziun preliminara
- scola populara terminada
Pretensiuns
- plaschair da s’occupar cun victualias
- inschign manual
- bun nas e bun gust
- plaschair da lavurar cun maschinas
- senn per nettezza ed igiena
- sanadad robusta ed abilitad da supportar squitsch
- betg esser sensibel a chalira, umiditad e fraid
- betg avair allergias (envers products da nettegiar, materias primas, metals euv.)
- esser pront da lavurar a temp irregular
Furmaziun supplementara
Curs
purschidas da las associaziuns da l’industria da victualias sco era da las scolas professiunalas
Tecnolog / Tecnologa da victualias AFQ
Practicists / practicistas da victualias AFP pon far ina scolaziun da basa scursanida sco tecnolog / tecnologa da victualias AFQ (access en il 2. onn da la furmaziun da basa professiunala).
Silsuenter valan las medemas pussaivladads da furmaziun supplementara sco per ils tecnologs / las tecnologas da victualias AFQ.
Cundiziuns da lavur
Practicists da victualias lavuran en in manaschi industrial e produceschan victualias e bavrondas. Lur lavurs fan els per gronda part en pe. Il temp da lavur è irregular.
Ulteriuras infurmaziuns
Arbeitsgemeinschaft Lebensmitteltechnologen
Worbstrasse 52
Postfach
3074 Muri b. Bern
Tel: 031 352 11 88
URL: www.lebensmitteltechnologe.ch
Strickhof
Lebensmitteltechnologie und Hortikultur
Seestrasse 295
8804 Au ZH
Tel: 058 105 94 00
URL: www.strickhof.ch