Lavurs
Emploiadas ed emploiads da cuschina lavuran tenor las instrucziuns dal cuschinier u da la scheffa da cuschina en in team da cuschina. Els preparan las ingredienzas per differentas spaisas e pinan sezs simplas tratgas chaudas e fraidas. Lur cuschina tutga tar in restaurant, in hotel, in ospital, in center per attempads u ina firma.
Tut tenor manaschi lavuran emploiads da cuschina en differents secturs da la cuschina. Per la cuschina fraida per exempel preparan els salatas, sosas da salata, avantpasts fraids u coctails. Els preparan era desserts sco salatas da fritga, cremas e turtas.
Emploiads da cuschina fan schuppas e sosas. Els preparan garnituras sco pastas, ris u tartuffels. Els san tge verdura che gusta il meglier pargialada, buglida u gratinada. Emploiads da cuschina brassan charn, grilleschan giaglinom u fritteschan pesch. Era tratgas precuschinadas preparan els a moda correcta. A la fin fan els pront ils plats e garneschan las tratgas cun las ingredienzas adattadas.
Sur mezdi e da tschaina regia gronda truscha en cuschina. Per ch'il giast survegnia uschè spert sco pussaivel la tratga sto il team da cuschina collavurar bain. Emploiads da cuschina enconuschan precis lur champ d’incumbensas ed exequeschan las lavurs a moda fidada.
Nettezza è fitg impurtant en cuschina. Ils emploiads da cuschina nettegian ils cuntels, las planettas, las padellas, ils apparats e las maschinas e fan urden suenter avair cuschinà. Els guardan ch’ils aliments vegnian conservads a moda igienica. Ultra da quai ston els resguardar las prescripziuns davart la segirezza da la lavur e la protecziun da la sanadad.
Scolaziun
Basa legala
Ordinaziun federala 7-12-2004 (stadi dals 1-1-2018)
Durada
2 onns
Furmaziun en la pratica
En in restaurant, hotel, restaurant da persunal, ospital u ina chasa da tgira (almain 35 emnas l'onn)
Furmaziun en scola
1 di l'emna a la scola professiunala
Roms professiunals
- enconuschientscha aliments,
- enconuschientschas da cuschinar,
- quints dal rom,
- scienza dal nutriment,
- instrucziun da menus,
- instrucziun da manaschi
Curs ordaifer il manaschi
Davart ils temas: cuschina fraida e desserts; schuppas, verdura e garnitura; tratgas d’ovs e da chaschiel; tratgas da peschs, fonds, sosas e variantas; charn, tratgas da giaglinom e sosas
Diplom
Attest federal professiunal "emploià / emploiada da cuschina AFP"
Premissas
Furmaziun preliminara
- scola populara terminada cun pretensiuns da basa
Pretensiuns
- bun gust e bun nas
- mauns inschignaivels
- bun dun d’organisar
- abilitad da lavurar en in team
- plain fantasia
- conscienza da l’igiena
- buna sanadad
- abilitad da lavurar sut squitsch
Furmaziun supplementara
Curs
purschidas da las associaziuns professiunalas
Cuschinier / Cuschiniera AFQ
Emploiads cun attest federal professiunal (AFP) pon frequentar ina furmaziun da basa scursanida sco cuschinier/a AFQ (access al segund onn da la furmaziun da basa).
Suenter han els las medemas pussaivladads da furmaziun supplementara sco cuschiniers / cuschinieras AFQ (vesair p.ex. www.berufehotelgastro.ch).
Cundiziuns da lavur
Emploiads da cuschina lavuran en restaurants u en cuschinas da hotels, firmas, chasas da tgira u ospitals. Els han savens temps da lavur malregulads e lavuran era la saira, las fins d’emna e firads. Tgi che tschertga ina plazza d’emprendissadi duess er esser pront da lavurar en ina regiun rurala. L’intermediaziun da fufragnadis e plazzas d’emprendissadi da la branscha (www.berufehotelgastro.ch) gida persunas interessadas da tschertgar purschidas en tuttas regiuns linguisticas da la Svizra. Emploiads da cuschina motivads e flexibels han bunas schanzas da chattar ina plazza suenter l’emprendissadi.
Ulteriuras infurmaziuns
GastroSuisse
Verband für Hotellerie und Restauration
Blumenfeldstr. 20
8046 Zürich
Tel: 0848 377 111
URL: www.gastrosuisse.ch
hotelleriesuisse
Monbijoustr. 130
3001 Bern
Tel: 031 370 42 83
URL: www.hotelleriesuisse.ch
URL: www.berufehotelgastro.ch