Lavurs
Cusunzas da decoraziuns AFP cusan sumbrivals e plimatschs. La plipart dal temp lavuran ellas cun la maschina da cuser. Impurtants isegls da lavur èn er forschs, guglias da cuser, centimeter, circul e squader.
Cura ch'ils cusunzs da decoraziuns cumenzan cun ina incumbensa, calculeschan els l’emprim quanta taila ch’els dovran ed er il material supplementar. Els taglian las sdrimas da taila e las elavuran cun la maschina da cuser.
Las cusunzas da decoraziuns preparan las tailas per sumbrivals tagliadas e cusidas cun crutschs, anzas e glischnaders per ch'ellas possian vegnir pendidas si. Tar la producziun da plimatschs dovran ellas er plimas ed auter material d’emplenir. Sper sumbrivals e plimatschs produceschan ellas er auters objects d’endrizzament, sco p. ex. tuaglias u cuvertas da decoraziun.
Cusunzs da decoraziuns enconuschan l’effect da las colurs. Els decleran a la clientella tge effect che mintga colur ha en la stanza. Els enconuschan ultra da quai er ils divers stils da construir e da mobiglias. Uschia pon els cuser sumbrivals u plimatschs che van a prà cun il stil d’ina abitaziun.
Cusunzas da decoraziuns enconuschan las prescripziuns en connex cun la protecziun da la sanadad e da l’ambient e da la segirezza da la lavur. En la lavur cun maschinas resguardan ellas conscienziusamain las directivas.
Scolaziun
Basa legala
Ordinaziun federala 31-5-2010
Durada
2 onns
Furmaziun en la pratica
en in manaschi per decoraziun d’interiurs u en in manaschi da producziun per la branscha da decoraziuns d’interiurs
Furmaziun en scola
Plirs curs da bloc per onn a la scola professiunala da Soloturn
Roms professiunals
- confecziun
- segirezza da la lavur
- protecziun da la sanadad
- protecziun da l’ambient
Curs ordaifer il manaschi
emprender ed exercitar a moda pratica la basa professiunala
Diplom
Attest federal professiunal "cusunz / cusunza da decoraziuns AFP"
Premissas
Furmaziun preliminara
- scola obligatorica terminada cun pretensiuns da basa
Pretensiuns
- plaschair da textilias
- inschign manual
- moda da lavur exacta
- senn per furmas e colurs
Furmaziun supplementara
Curs
purschidas da scolas spezialisadas e professiunalas sco er da l’associaziun interieursuisse
Creader / Creadra da textilias interiuras AFQ
Cusunzs / cusunzas da decoraziuns AFP pon far la furmaziun scursanida sco creader / creadra da textilias interiuras AFQ (entrada en il 2. onn da scolaziun).
Silsuenter han ellas las medemas pussaivladads da furmaziun supplementara sco creaders / creadras da textilias interiuras AFQ.
Cundiziuns da lavur
Cusunzas e cusunzs da decoraziuns AFP lavuran en manaschis per decoraziun d’interiurs, en ateliers da cuser da fatschentas da mobiglias u en manaschis da producziun per la branscha da decoraziuns d’interiurs.
Ulteriuras infurmaziuns
interieursuisse
Eichholzstr. 11
Chascha postala
2545 Selzach
Tel: +41 32 641 66 10
URL: www.interieursuisse.ch