Lavurs
Practicistas e practicists da pneus lavuran en interpresas ch'èn sa spezialisadas en pneus u en garaschas d'autos. Els giuditgeschan il stadi dals pneus. Sch'in pneu è isà u donnegià, repareschan u remplazzan els quel. Els infurmeschan la clientella davart diversas purschidas ed ils custs.
Per midar pneus u rodas segireschan practicists da pneus il vehichel. Ils pneus e las rodas veglias vegnan demontads e novs vegnan montads cun ina maschina da montar pneus. Sin giavisch da la clientella remplazzan els ils pneus normals cun pneus pli lads. Suenter avair montà ils novs pneus vegnan quels pumpads e giavegls e pneus nettegiads. Tenor giavisch vegn l'entir vehichel nettegià.
Tar las incumbensas dals practicists da pneus tutga er equilibrar las rodas. Latiers stendan practicists da pneus las rodas sin maschinas spezialas e mesiran il dischequiliber. Differenzas vegnan gulivadas cun metter paisas sin ils giavegls u curregidas cun rotar la roda sin il giavegl. Igl è era pussaivel da far ina fina correctura electronica. Quella vegn fatga, cura che las rodas èn montadas.
Practicists da pneus èn era responsabels per magasinar a moda correcta ils pneus da stad e d'enviern. Els monteschan e demonteschan chadainas da naiv e mantegnan guaffens e maschinas. Ultra da quai exequeschan els lavurs simplas da controlla e da service. Els controlleschan per exempel il manischadi, ils frains, il sbuf e las glischs externas sin donns visibels e mesiran ils livels d'emplenida da l'ieli, dals frains, da la battaria e dad auters liquids.
Practicists da pneus resguardan las prescripziuns da segirezza e dals produciders davart la profunditad dal profil e l'index da spertadad e da pais.
Scolaziun
Basa legala
Ordinaziun federala 6-12-2005
Durada
2 onns
Furmaziun en la pratica
En ina firma ch'è sa spezialisada en pneus u en ina garascha d'autos pli gronda
Furmaziun en scola
1 di l'emna a la scola professiunala
Roms professiunals
- duairs e funcziuns dal manaschi
- lavurs da service da basa
- prescripziuns davart la lavur cun pneus e rodas
- montar e demontar pneus e rodas
- segirezza da lavur, protecziun da la sanadad e da l'ambient
Curs ordaifer il manaschi
Lavurar ed exercitar a moda pratica vi da lavurs da basa
Diplom
Attestat federal professiunal "practicist / practicista da pneus AFP"
Premissas
Furmaziun preliminara
- scola populara terminada
Pretensiuns
- inschign manual
- moda da lavurar exacta e senn per responsabladad
- fidadadad
- plaschair da tecnologias novas
- buna constituziun corporala
- prontadad da lavurar a temp irregular (servetsch l'enviern)
Furmaziun supplementara
Curs
purschidas da scolas spezialisadas e professiunalas, associaziuns e produciders da rodas
Examen professiunal (EP)
p.ex. spezialist / spezialista da pneus cun certificat professiunal federal
Cundiziuns da lavur
Practicists da pneus lavuran en commerzis spezialisads per pneus u en garaschas d'autos pli grondas. Il temp da lavur emnil munta normalmain a 42 uras, l'enviern lavuran els dentant dapli.
Practicists da pneus fidads han bunas schanzas sin il martgà da lavur. La tecnica davart la roda vegn adina pli cumplexa e pretenda uschia glieud da professiun scolada.
Ulteriuras infurmaziuns
Associaziun svizra da pneus ASP
Hotelgasse 1
Chascha postala 316
3000 Berna 7
Tel: 031 328 40 60
URL: www.swisspneu.ch