Practicists e practicistas da construcziun en metal gidan a fabritgar elements da construcziun sco portas, fanestras, vitrinas, verandas d’enviern, stgalas, balcuns, fatschadas e construcziuns en atschal. Els san applitgar las tecnicas principalas da l’elavuraziun da metal ed exequeschan simplas lavurs a moda autonoma.

Avant che practicists da construcziun en metal cumenzan cun la lavur, legian els ils documents tecnics. Tar incumbensas difficilas als explitgan ils superiurs ils singuls pass da lavur ed als gidan en la realisaziun da quels.

En il lavuratori elavureschan els differentas sorts d’atschal ed utiliseschan materia sintetica, materials d’isolaziun e vaider. Practicists da construcziun en metal taglian stangas, bischens e tolas cun fresas e taglieras. A maun, cun utensils e cun maschinas dirigidas da computers dattan els als elements tagliads tras storscher, stanzar, furar e fresar la furma giavischada. Quels elements da construcziun mettan els ensemen cun agid da tecnicas da buglir, struvegiar e collar. Lura adatteschan els ils scharniers, ils marschlos u las stuppadiras minuziusamain.

Sin il plazzal gidan practicists da construcziun en metal a montar ils elements da construcziun en lavur da team.

Practicists da construcziun en metal mantegnan e tgiran ils guaffens e las maschinas. Ultra da quai resguardan els las prescripziuns davart la segirezza da lavur e davart la protecziun da la sanadad e da l’ambient. Els portan per exempel ina protecziun da l’udida ed egliers da protecziun. Ils ruments dismettan els a moda professiunala ed adattada a l’ambient..