Lavurs
Lur lavurs èn las suandantas:
Preparaziun en il lavuratori
- prender encunter incumbensas, leger plans da construcziun
- dissegnar simplas skizzas e controllar, sche l'ovra è realisabla confurm a las prescripziuns
- tscherner products da metal adattads
- mesirar exactamain e far marcaziuns
- resguardar toleranzas (divergenzas da la prescripziun permessas)
- controllar e stgargiar las furniziuns da material, preparar il material per il plazzal
Producziun da parts da metal en il lavuratori
- tagliar, furar e mular tolas e fists da metal
- manevrar indrizs automatics
- colliar parts, per exempel cun buglir, struvegiar, rebatter u tatgar
- tractar surfatschas, per exempel cun meds cunter ruina
- proveder portas e fanestras: integrar isolaziuns e montar serradiras, maniglias u serraportas
- nettegiar regularmain e mantegnair ils utensils, las maschinas ed il lavuratori
Montascha sin il plazzal
- demontar las parts d'in edifizi che ston vegnir renovadas
- gidar ad auzar e plazzar parts grondas cun la crana u cun auzaders
- montar ed adattar elements tenor puncts da mesiraziun
- francar elements da construcziun, per exempel cun struvas, cun tajas da struvas u cun francaziuns chemicas
- bajegiar en portas, fanestras, stgalas, spundas ed autras parts da la fatschada
- isolar chavas cun silicon u cun bindels d'isolar
Scolaziun
Durada
2 onns
Furmaziun pratica
En in manaschi da la branscha d'atschal, da metal, da fanestras u da construcziun da fatschadas
Furmaziun en scola
1 di per emna en la scola professiunala spezialisada
Scolaziun da scola a temp cumplain
Diversas scolas en la Svizra tudestga, guardar Scolaziuns
Roms professiunals
structurar las incumbensas producir, elavurar posteriuramain e montar elements ed objects da construcziun en metal
Curs ordaifer il manaschi
Emprender la lavur pratica, approfundar ed exercitar las basas professiunalas, 26 dis durant 2 onns
Diplom
Practicist / Practicista da construcziun en metal AFP
Premissas
Furmaziun preliminara
- terminà la scola obligatorica
Pretensiuns
- inschign manual
- senza sturnizi
- abilitad da supportar squitsch corporal
- abilitad da lavurar en in team
- nagina ipersensibilitad cunter canera
- buna imaginaziun tridimensiunala
- exactadad e quità
Furmaziun supplementara
Curs
Purschidas da scolas professiunalas spezialisadas, da scolas spezialisadas superiuras e dad AM Suisse.
Constructur / Constructura da metal AFQ
Practicistas e practicists da construcziun en metal AFP pon far ina furmaziun professiunala da basa scursanida sco Constructur / Constructura da metal AFQ cun
attestat federal da qualificaziun (entrar en il 2. onn da la furmaziun da basa).
Suenter pon vegnir absolvidas las medemas furmaziuns supplementaras sco per Constructur / Constructura da metal AFQ.
Cundiziuns da lavur
Practicistas e practicists da construcziun en metal lavuran principalmain en interpresas pitschnas e mesaunas dals fatgs da construcziun u da l'elavuraziun da metals. Ellas ed els lavuran cun aluminium, atschal, atschal raffinà, dentant er cun vaider, lain u materia sintetica. Interpresas da construcziun da metal cumpiglian tant la producziun manuala sco er la producziun industriala. Las mastergnantas ed ils mastergnants pon sa spezialisar sin tschertas tecnicas u materialias, per exempel fatschadas da metal u da vaider, construcziuns d'atschal u lavurs da ferrer.
En il lavuratori e sin il plazzal liquideschan ellas ed els simplas lavurs. Mintgatant èsi dad aut a la lavur e la lavur po er cuntegnair tschertas ristgas. Perquai portan ellas ed els vestgadira da protecziun sco egliers, chapellina, protecziun d'udida e chalzers da segirezza. En il liber sin il plazzal dependa la lavur da l'aura. Practicistas e practicists da construcziun en metal lavuran en in team e coordineschan lur incumbensas cun autras spezialistas ed auters spezialists.
Ulteriuras infurmaziuns
AM Suisse
8002 Zürich
URL: www.metall-und-du.ch