Passer au titre

Assistent / Assistenta da commerzi en detagl AFP

Assistents ed assistentas da commerzi en detagl cusseglian la clientella en ina fatschenta da vendita, utiliseschan la cassa ed emballeschan ils artitgels vendids. Els guardan ch’i haja avunda products en vendita.

Lavurs

Assistents ed assistentas da commerzi en detagl lavuran en ina fatschenta da vendita. Els vendan p.ex. victualias, chalzers, artitgels dal tegnairchasa, apparats electrics, tocca d’autos, plantas, instruments, bischutaria euv. Els enconuschan bain ils products che vegnan vendids en lur fatschenta. Els procuran che la clientella chattia la rauba giavischada.

Assistentas da commerzi en detagl èn adina amiaivlas durant la cussegliaziun. Ellas restan era ruassaivlas cura ch’i vegn hectic. I po capitar ch’ils clients chattan in sbagl e ch’els vulan perquai returnar la rauba. En cas che las assistentas da commerzi en detagl na pon betg schliar sezzas il problem transmettan ellas la reclamaziun a la persuna responsabla.

Assistentas da commerzi en detagl lavuran era vi da la cassa. Ellas fan la cassa ed emballeschan ils products vendids. La clientella paja cun daner contant u cun la carta da credit.

Assistentas da commerzi en detagl na lavuran betg mo en fatschentas da vendita, mabain era en il deposit. Là retiran ellas la rauba furnida. Ellas pacheteschan ora ils products, als controlleschan cun agid da la glista da furniziun ed als mettan en lur lieu. En la fatschenta procureschan ellas ch’ils regals sajan emplenids e ch’ils artitgels sajan nudads cun lur pretschs. Assistentas da commerzi en detagl surpiglian era lavurs da nettegiar en la fatschenta da vendita u en il deposit.

Scolaziun

Basa legala

Ordinaziun federala 8-12-2004 (stan 1-1-2018)

Durada

2 onns

Furmaziun en la pratica

En ina fatschenta da vendita da las 28 branschas da scolaziun ed examinaziun

Furmaziun en scola

1 di per emna a la scola professiunala

Roms professiunals

  • tudestg
  • lingua estra
  • economia
  • societad
  • pratica dal commerzi en detagl
  • instrucziun da branscha generala

Curs ordaifer il manaschi

Tar differents temas

Diplom

Attest federal professiunal "assistent / assistenta da commerzi en detagl AFP"

Premissas

Furmaziun preliminara
  • scola populara terminada cun pretensiuns da basa
Pretensiuns
  • plaschair vi da la vendita e vi da la cussegliaziun
  • plaschair vi dal contact cun carstgauns
  • servetschaivladad
  • buna demananza
  • bunas cumpetenzas dal tudestg (a bucca)
  • buna memoria
  • senn per l’urden
  • buna sanadad (lavur en pe)

Furmaziun supplementara

Curs

purschidas d’associaziuns da branscha, d’associaziuns professiunalas e da differents auters purschiders

Spezialist / Spezialista da commerzi en detagl AFQ

Assistentas da commerzi en detagl AFP cun cumpetenzas en ina lingua estra pon far la furmaziun scursanida sco spezialist / spezialista da commerzi en detagl AFQ (entrada en il 2. onn da scolaziun). Silsuenter han ellas las medemas pussaivladads da furmaziun supplementara sco spezialists / spezialistas da commerzi en detagl AFQ.

Cundiziuns da lavur

Assistentas da commerzi en detagl lavuran en fatschentas spezialisadas, en gronds negozis u en supermartgads. Il temp da lavur dependa da las uras d’avertura da la fatschenta.

Assistentas da commerzi en detagl pon suenter lur furmaziun per ordinari midar la branscha.

Ulteriuras infurmaziuns

Bildung Detailhandel Schweiz
Hotelgasse 1
Postfach 316
3000 Berna 7
Tel: 031 328 40 40
URL: www.bds-fcs.ch



orientation.ch