Passer au titre

Assistent / Assistenta per sanadad e fatgs socials AFP

Assistents ed assistentas per sanadad e fatgs socials accumpognan e s’occupeschan da persunas da tut las vegliadetgnas che basegnan sustegn en lur mintgadi. Els lavuran en chasas e centers da tgira per persunas cun impediments, en ospital, clinicas u tar la spitex.  Els lavuran adina en stretga collavuraziun cun il persunal medicinal dal fatg.

Lavurs

Els exequeschan suandantas lavurs:

Tgira quotidiana e sustegniment en il mintgadi
  • gidar las persunas a sa vestgir ed a sa svestgir
  • sustegnair ils clients en lur tgira da la sanadad e dal corp,  far laschiva, far si chavels, gidar a far la barba
  • gidar ils clients dad ir sin tualetta, metter a disposiziun meds d'agid sco la tualetta movibla,  il batschigl da fitgar u svidar l'urinal sche necessari
  • dar en cremas, bandaschar las chommas, trair en chaltschiels medicinals, e metter a disposiziun ulteriurs meds auxiliars
  • pasar, mesirar la grondezza, controllar la temperatura, la respiraziun ed il puls
  • pusar persunas che ston star en letg e midar lur posiziun da temp en temp
  • observar midaments ed infurmar il persunal responsabel per la tgira sch’insatge dat en egl, dar alarm e porscher emprim agid en cas d'urgenza
  • enconuscher e resguardar las prescripziuns d'igiena e segirezza, dismetter material duvrà tenor las prescripziuns e resguardond l'ambient
  • procurar per in mintgadi regular ed animar las persunas en tgira da prender part a las activitads, prender resguard da lur giavischs e basegns
  • gidar d'organisar activitads e occurrenzas spezialas
  • accumpagnar las persunas dad ir a spass, tar il medi u tar il fisioterapeut, las gidar tar il diever da la sutga cun rodas u dal rollatur
  • assister durant las tschaveras e procurar ch'ils clients prendian ils medicaments tenor l'instrucziun dal persunal da sanadad
  • far las preparativas per la notg e gidar ils clients dad ir a letg
  • far las preparativas per la notg e gidar ils clients dad ir a letg
Lavurs en il manaschi
  • Metter a maisa, s'occupar dal spazi da las tschaveras
  • exequir lavurs pitschnas da nettegiar, controllar e gidar da mantegnair apparats ed utensils
  • far glistas da cumissiuns e far las cumpras sche necessari
  • sortir la vestgadira, far ora cun il fier e deponer la rauba
  • exequir simplas lavurs d'administraziun al computer, sco p.ex. emplenir ora formulars

Scolaziun

Basa legala

Ordinaziun federala 20-12-2010 (stan dals 1-1-2018)

Durada

2 onns

Furmaziun en la pratica

en in’instituziun dals fatgs da sanadad u dals fatgs socials

Furmaziun en scola

1 di per emna a la scola professiunala

Roms professiunals

  • collavuraziun e sustegn tar la tgira da la sanadad e tar la tgira dal corp
  • accumpagnament e sustegn da clients e clientas en il mintgadi
  • sustegn en il tegnairchasa
  • realisaziun da las prescripziuns da l’igiena e da la segirezza
  • collavuraziun tar l’administraziun
  • logistica
  • organisaziun da la lavur
  • svilup ed observaziun da rollas da la vita professiunala e cooperaziun

Curs ordaifer il manaschi

tar differents temas

Diplom

Attestat federal professiunal  "assistent / assistenta per sanadad e fatgs socials AFP"

Premissas

Furmaziun preliminara
  • temp da scola obligatoric terminà
  • enconuschientschas da la lingua naziunala correspundenta da la re-giun a bucca ed en scrit
Pretensiuns
  • plaschair vi dal contact cun carst-gauns
  • plaschair vi da lavurs dal tegnair-chasa e vi da lavurs praticas
  • empatia e servetschaivladad
  • pazienza e respect
  • abilitad da lavurar en in team e da communitgar
  • senn da responsabladad
  • senn per l’igiena e per l’urden
  • buna sanadad corporala e mentala, abilitad da supportar squitsch

Furmaziun supplementara

Curs

purschidas da scolas professiunalas e d’associaziuns professiunalas

Spezialist / Spezialista per la sanadad AFQ u Spezialist / Spezialista da tgira AFQ

Assistents per sanadad e fatgs socials AFP pon sa qualifitgar per ina furmaziun da basa scursanida sco spezialist / spezialista per la sanadad cun attestat federal da qualificaziun (AFQ) u sco spezialist / spezialista da tgira AFQ (entrada al 2. onn da furmaziun da basa).

Silsuenter han ellas las medemas pussaivladads da furmaziun supplementara sco spezialists / spezialistas per la sanadad AFQ resp. sco spezialists / spezialistas da tgira AFQ.

Cundiziuns da lavur

Assistentas ed assistents per sanadad e fatgs socials lavuran en la domena staziunara ed ambulanta. Ellas pon per exempel esser occupadas en asils d’attempads u da tgira, en chasas per persunas cun impediments, en centers da reabilitaziun, en clinicas psichiatricas u tar la spitex.

Lur temp da lavur n’è savens betg regular. Tut tenor il lieu da lavur ston ellas quintar cun servetsch da notg u da la fin d’emna. Igl è pussaivel da lavurar a temp parzial.

En il sectur da tgira e d’assistenza manca savens persunal qualifitgà. Assistentas per sanadad e fatgs socials èn perquai tschertgadas en chasas da tgira e d’attempads.

Per creschids existan en tscherts chantuns pussaivladads per laschar quintar vitiers ina furmaziun preliminara resp. pratica professiunala en il sectur da tgira e d’assistenza.

Ulteriuras infurmaziuns

OdASanté, Nationale Dachorganisation der Arbeitswelt Gesundheit
Seilerstr. 22
3011 Bern
Tel: 031 380 88 88
URL: www.odasante.ch

SAVOIRSOCIAL
Schweiz. Dachorganisation der Arbeitswelt Soziales
Amtshausquai 21
4600 Olten
Tel: 031 371 36 25
URL: www.savoirsocial.ch

Survista professiuns en il sectur da sanadad:
URL: www.gesundheitsberufe.ch



orientation.ch