Lavurs
Per la mobilitad individuala e per il transport da rauba da tut gener dovri vias. La qualitad da la cuvrida da la via è decisiva per la segirezza dals viagiaturs, per il transport da rauba segir, speditiv ed ecologicamain effizient sco er per la duraivladad e l’estetica da vias. Construiders e construidras da vias èn sper vias er responsabels per plazzas, vias da velos e passapes, inslas da traffic, giratoris e construcziuns sumegliantas.
Durant la preparaziun dal plazzal marcheschan construiders da vias il plazzal tenor ils plans ed al signaliseschan. Suenter fan els las lavurs preliminaras ch’èn necessarias per la montascha da las cuvridas d’asfalt. Latiers tutgan tranter auter il montar tumbins da drenascha ed il metter bischens da chanalisaziun sco er conducts da gas, aua ed electricitad.
Cun splattitschas cumpriman construiders da vias la rasada da sablun grop enfin ch’ella ha la resistenza a la cumpressiun necessaria. Sin questa rasada integreschan els rauba da maschaida da bitum cun la maschina u a maun e la cumpriman tenor la norma. Sco lavurs da finiziun taglian els ils urs da cuvrida ed als dattan colur, adatteschan ils viertgels dal tumbin e dals giatters sin l’autezza da la cuvrida definitiva e construeschan banchets da vias.
Construiders da vias mainan er tras lavurs da sanaziun. Latiers elimineschan e remplazzan els cuvridas veglias u mainan tras pitschnas reparaturas.
Per las differentas lavurs dovran construiders da vias maschinas sco exchavaturs e splattitschas. Malgrà il diever da questas maschinas è la lavur ordavert strapatschanta e pretenda ina buna constituziun corporala. Els lavuran bunamain adina en gruppas ed èn da tutta aura sut tschiel avert. Els enconuschan ils privels sin il plazzal e protegian sasez e lur collavuraturs cun resguardar las prescripziuns davart la segirezza, cun prender mesiras en connex cun la prevenziun d’accidents e cun purtar l’equipament da protecziun persunal.
Per betg periclitar l’ambient sa tegnan els vi da las prescripziuns en connex cun la protecziun da l’ambient. Material da construcziun duvrà, materials dad unscher, products da nettegiar euv. dismettan els tenor las prescripziuns dal manaschi.
Scolaziun
Basa legala
Ordinaziun federala 1-11-2013
Durada
3 onns
Furmaziun en la pratica
En in’interpresa da la construcziun da vias
Furmaziun en scola
Curs da bloc a la scola professiunala dals construiders da vias da traffic a Sursee: en media 9 emnas per onn, da quellas radund 2 emnas per onn furmaziun cun accent principal sin "construcziun da vias"
Roms professiunals
- organisar las lavurs e garantir la segirezza da la lavur, la protecziun da la sanadad sco er la protecziun da l’ambient
- manar tras lavurs generalas da la construcziun da vias da traffic
- manar tras lavurs da la construcziun da vias
Curs ordaifer il manaschi
Emprender ed exercitar a moda pratica la basa professiunala
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Attestat federal da qualificaziun "construider / construidra da vias AFQ"
Premissas
Furmaziun preliminara
- scola populara terminada
Pretensiuns
- inschign manual
- enclegientscha pratica
- fidadadad e perseveranza
- abilitad da lavurar en in team
- resistenza a l’aura
- forza corporala
- sanadad robusta
Furmaziun supplementara
Curs
purschidas da la scola professiunala per construiders da vias da traffic, dal campus Sursee center da furmaziun construcziun da la Societad svizra dals impressaris construiders (SSIC) sco d’interpresas da la construcziun da vias
Furmaziun da basa scursanida
montader / montadra da binaris, sondader / sondadra, sulader / suladra, tschentapalantschieus industrials e purtants
Examen professiunal (EP)
polier / poliera da construider da vias cun certificat professiunal federal
Examen professiunal superiur (EPS)
manader / manadra da construcziun dipl. construcziun bassa, maister constructur / maistra constructura
Scola spezialisada superiura (SSS)
tecnicher / tecnicra dipl. surveglianza da construcziun, tecnicher / tecnicra dipl. planisaziun da construcziun
Scola auta spezialisada (SAS)
Bachelor of Science (SAS) en fatgs d’inschigner da construcziun
Cundiziuns da lavur
Construiders da vias lavuran en interpresas pli pitschnas u pli grondas da la construcziun da vias. I sa dar ch’els ston lavurar las sairas u durant fin d’emnas.
Construiders da vias han bunas schanzas sin il martgà da lavur. La purschida da plazzas d’emprendissadi è buna.
Ulteriuras infurmaziuns
Berufsfachschule Verkehrswegbauer
Postfach
6210 Sursee
Tel: 041 922 26 26
URL: www.verkehrswegbauer.ch
URL: www.bauberufe.ch
Fachverband Infra
Weinbergstr. 49
Postfach
8042 Zürich
Tel: 044 258 84 90
URL: www.infra-schweiz.ch
Revista professiunala:
"B. Magazin - Das Magazin für Verkehrswegbauer"