Accueil myOrientation

Me connaître - Etape 1: J'identifie mes intérêts, points forts et attentes professionnelles

Professions et formations - Etape 2: J’explore le monde des professions et des formations

Qualités requises et conditions d'admission - Etape 3: Je compare mes points forts avec les qualités requises et les conditions d'admission des métiers

Stages - Etape 4: J’explore en détail les métiers qui m’intéressent le plus

Projet professionnel - Etape 5: J’évalue mes résultats et me décide pour une profession ou une formation

Apprentissage - école - Etape 6: Recherche d'une place d'apprentissage et / ou inscription à une école

Préparation - Etape 7: Je me prépare à ma formation en entreprise ou en école

Dossier de travail - Tes résultats

Veuillez patienter...

Préparation de votre dossier myOrientation.

Déconnecté

Votre session de travail est expirée. Vous allez être redirigé sur la page d'accueil. Veuillez vous connecter à nouveau pour continuer votre session de travail.

Tschentapignas AFQ

Tschentapignas construeschan novas pignas e novs cheminés e renoveschan veglias pignas e vegls cheminés. Tar lur incumbensas tutgan era lavurs da mantegniment da pignas da laina da tuttas sorts sco era reparaturas da chamins.

Lavurs

Tschentapignas procuran per chalur ed in'atmosfera agreabla en locals d'abitar. Els installeschan dad ina vart pignas da cheminé, stgaudaments cun laina e cun pellets producids a moda industriala. Da l'autra vart construeschan els cheminés e pignas novas. Els s'occupan plinavant cun il mantegniment da pignas, cun la renovaziun da pignas da plattinas veglias custaivlas sco era cun reparaturas da chamins.

La construcziun da fuainas individualas è la lavur ch'è manualmain la pli pretensiusa per tschentapignas. A maun da plans e calculaziuns fan els indrizs da gronda qualitad or da crappa e plattas ch'èn resistentas al fieu. Per revestgir la vart exteriura cun plattinas, cheramica, crap natiral, marmel u liadira èsi impurtant d’avair in  flair creativ.

La construcziun da la vita interna da las pignas e l'integraziun d'indrizs supplementars sco installaziuns d'aua chauda, accumulaturs, chalderas d'aua chauda e clappas da fim pretendan savida tecnica. Tschentapignas san leger plans e far skizzas d'elements da construcziun. Els chapeschan er ils process fisicals da la combustiun e la transmissiun da chalur.

Tschentapignas enconuschan ils ristgs da lur conturn da lavur e resguardan las prescripziuns davart la segirezza da la lavur, la protecziun da la sanadad e l'ecologia. Plinavant resguardan els adina las prescripziuns per la protecziun cunter incendis e l'ordinaziun per mantegnair l'aria pura ch'èn reglas impurtantas per els.

Ils indrizs installeschan tschentapignas sulets u en in pitschen team. Els midan savens il plazzal e vegnan en funcziun tar construcziuns novas e reconstrucziuns sco er en chasas abitadas. Els cusseglian lur clientella davent da l'idea fin a la tgira ed il nettegiament d'ina fuaina.

Scolaziun

Basa legala

Ordinaziun federala 28-9-2010

Durada

3 onns

Furmaziun en la pratica

En in manaschi da construcziun da pignas

Furmaziun en scola

Instrucziun davart la professiun en curs da mintgamai in'emna a la scola spezialisada feusuisse a Dagmarsellen/LU

Roms professiunals

  • cussegliaziun da la clientella, administraziun, planisaziun da la lavur
  • construcziun da pignas e cheminés
  • montascha ed installaziun da pignas e cheminés prefabritgads
  • segirezza da la lavur, protecziun da la sanadad, protecziun cunter incendis, ecologia
  • Curs ordaifer il manaschi

    Davart differents temas

    Maturitad professiunala

    Fitg bunas prestaziuns da scola permettan da frequentar la scola da maturitad professiunala durant la furmaziun da basa.

    Diplom

    Attestat federal da qualificaziun "tschentapignas AFQ"

Premissas

Furmaziun preliminara
  • scola populara terminada
  • bunas prestaziuns en quint e geometria
Pretensiuns
  • inschign manual
  • constituziun sauna e ferma
  • imaginaziun dal spazi
  • sentiment per furmas e colurs
  • sentiment per connexs constructivs
  • fidadadad e perseveranza

Furmaziun supplementara

Curs

purschidas da la scola spezialisada Froburg sco era da l'industria da furniziun

Furmaziun da basa scursanida

tschentaplattas AFQ, spazzachamin AFQ

Examen professiunal (EP)

cun certificat professiunal federal: spezialist / spezialista per sistems da chalur, controllader /controlladra da brischaders u spezialist /spezialista da la protecziun cunter incendis

Examen professiunal superiur (EPS)

maister / maistra tschentapignas

Scola spezialisada superiura (SSS)

studis en direcziuns spezialas parentadas, p.ex. tecnicist /tecnicista dipl. SSS tecnica d'edifizis, approfundaziun en tecnica da stgaudament

Scola auta spezialisada (SAS)

studi en direcziuns spezialas parentadas, p.ex. Bachelor of Science (SAS) en tecnica d'edifizis

Cundiziuns da lavur

Tschentapignas lavuran en manaschis da pignas. Quests manaschis èn per il solit pli pitschens ed han en media trais collavuraturs. Suenter la furmaziun supplementara pon tschentapignas manar lur agen affar.

Ulteriuras infurmaziuns

feusuisse
Associaziun per stgaudaments da locals d'abitar, cuvridas da plattas e sistems da svapurs
Solothurnerstr. 236
Chascha postala
4603 Olten
Tel: 062 205 90 80
URL: www.feusuisse.ch

Scola spezialisada feusuisse
c/o center da furmaziun SPV
Keramikweg 3
6252 Dagmarsellen
Tel: 062 293 35 62
URL: www.feusuisse.ch

Revista professiunala:
"feusuisse – Das Fachmagazin für Wohnraumfeuerungen, Plattenbeläge und Abgassysteme"



orientation.ch