?global_aria_skip_link_title?

Constructur / Constructura da puntanadas AFQ

Lavurs

Constructurs e constructuras da puntanadas erigian e demonteschan tuttas sorts da puntanadas e tetgs provisorics. Quels vegnan duvrads per la construcziun u la renovaziun da bajetgs e construcziuns sco punts, tunnels e turs. Sco persunas dal fatg da la mantellada d’edifizis erigian els er plattafurmas, punts per peduns, tribunas e palcs per producziuns .

Els exequeschan suandantas lavurs:

Planisaziun ed installaziun dal plazzal
  • leger ils plans dals biros d’inschigneria e visitar plazzas per far in maletg da las cundiziuns al lieu
  • far skizzas sche necessari e notar las mesiras
  • terminar, tge tip da puntanada che vegn duvrà, p.ex. puntanada da fatschada
  • definir il gener da l’ascensur u la plattafurma idraulica
  • schazegiar  la quantitad dals materials che vegnan duvrads
  • organisar las lavurs da montascha e resguardar latiers la segirezza e  la rentabilitad
  • serrar giu e segirar il plazzal, metter si tavlas da traffic sche necessari
Montascha e lavurs da francar
  • calcular quanta paisa ch’il fund po purtar e quanta forza ch’effectuescha la puntanada
  • eriger tut ils geners da puntanadas moviblas per fatschadas, turs baselgia, chamins u stgalas, cun u senza tetgs da protecziun provisorics
  • montar roms da puntanadas, bajegiar ensemen bischen d’atschal, passadis, pitgas e rinforzaments e francar tut vid l’edifizi
  • montar e fixar ulteriurs elements sco plattafurmas, cranas, cabinas, stgalas d’urgenza u stgalas libras
Lavurs da mantegniment
  • demontar  puntanadas e construcziuns provisoricas en la successiun prevedida e las transportar en il deposit
  • mantegnair e nettegiar tocca da construcziun e guaffens
  • reparar u remplazzar tocca da construcziun defecta u guaffens
  • dismetter ils ruments a moda adattada a l’ambient

Scolaziun

Durada

3 onns

Furmaziun en la pratica

En in manaschi da la branscha da paraids e mirs exteriurs d’edifizis

Furmaziun en scola

Curs da bloc a las scolas professiunalas ad Uzwil/SG, Les Paccots/FR u Lugano/TI

Roms professiunals

  • prescripziuns e mesiras davart la segirezza da lavur e la protecziun da la sanadad e da l’ambient
  • montascha da stresas e sistems sin paraids e mirs exteriurs
  • planisaziun e preparaziun da las construcziuns da puntanadas
  • montar, demontar e mantegnair ils sistems da puntanadas

Curs ordaifer il manaschi

Emprender ed exercitar en la pratica las basas professiunalas, 30-37 dis durant 3 onns

Maturitad professiunala

Cun fitg bunas prestaziuns da scola po vegnir frequentada la scola da maturitad professiunala durant la furmaziun da basa.

Diplom

Constructur / Constructura da puntanadas AFQ

Premissas

Furmaziun preliminara
  • temp da scola obligatorica terminà
Pretensiuns
  • senza sturnizi
  • inschign manual
  • abilitad da lavurar en in team
  • chapientscha pratica
  • imaginaziun dal spazi
  • constituziun sauna e robusta
  • gronda fidadadad
  • chapientscha tecnica

Furmaziun supplementara

Curs

purschidas da scolas spezialisadas e scolas professiunalas, da l’uniun Polybau sco era da manaschis da la branscha da paraids e mirs exteriurs d’edifizis

Furmaziun da basa scursanida

emprendissadi supplementar da dus onns sco isolatur / isolatura AFQ, cuvratetgs AFQ, constructur / constructura da fatschadas AFQ u montader / montadra da storas AFQ

Spezialisaziun

p.ex. survegliadra da construcziun da puntanadas u manader d’objects

Examen professiunal (EP)

cun diplom federal: manader da construcziun da mantellada d’edifizis

Examen professiunal superiur (EPS)

maistra da la mantellada d’edifizis cun diplom federal

Scola spezialisada superiura (SSS)

studis en champs parentads, p. ex. tecnicist / tecnicista SSS dipl. surveglianza da construcziun

Scola auta spezialisada (SAS)

studis en champs parentads, p. ex. Bachelor of Science en tecnica da construcziun cun approfundaziun en la mantellada d’edifizis. Tut tenor scola auta spezialisada valan differentas cundiziuns d’admissiun.

Cundiziuns da lavur

Constructurs e constructuras da puntanadas lavuran en in team, en il liber e quai da tutt’aura.  Damai che tschertas lavurs èn privlusas portan els in equipament da protecziun cun chapellina e buns chalzers. Lur temp da lavur è da principi regulars, po dentant variar tut tenor stagiun. La glieud da professiun coordineschan lur lavurs cun autras persunas dal fatg ord la sparta da la mantellada d’edifizis en il sectur da bajegiar.

Constructurs e constructuras da puntanadas lavuran en manaschis da la construcziun da puntadas u tar interpresas da construcziun. Quai èn per gronda part manaschis pitschens u mesauns. Suenter intgins onns experientscha da lavur pon els surpigliar posiziuns cun pli auta responsabladad, p.ex. manaders da plazzals u manadras da team. Las perspectivas da professiun dependan dal svilup economic dal sectur da construcziun.

Ulteriuras infurmaziuns

Uniun Polybau
9240 Uzwil
URL: www.polybau.ch




orientation.ch