Lavurs
Tetgers e tetgeras isoleschan e cuvran tetgs spundivs cun quadrels da terracotga, fibrocement, metal u plattamorta natirala. Cun lavur da precisiun protegian els l’edifizi cunter l’umiditad, cunter il fraid e cunter la chalur. In tetg bain isolà è essenzial per reducir il consum d’energia.
Tetgers lavuran independentamain u en in team. Avant ch’els tschentan il material da cuvrida construeschan els tetgs pers ed isolaziuns cunter la chalur. Uschia procuran els che la chalur resta la stad ordadora e l’enviern endadens. Cun agid da barrieras da vapur eviteschan els ch’aua condensada donnegiusa possia entrar en la tocca da construcziun.
Durant la fasa da preparaziun endrizzan tetgers il plazzal ed organiseschan il process da lavur. Els legian plans e dissegns e calculeschan sa basond sin quels la quantitad dal material che vegn utilisà per l’incumbensa. En cas da basegn creeschan els sezs skizzas, plans e dissegns.
Tetgs pon esser bunas funtaunas per la producziun da l’energia solara. Tetgers han perquai las enconuschientschas professiunalas davart la montascha da collecturs solars. Els monteschan implants solars ed als preparan per l’installaziun.
Tetgers lavuran a l’autezza. Els enconuschan ils privels dal plazzal e resguardan adina las prescripziuns davart la segirezza da la lavur e la prevenziun d’accidents.
Scolaziun
Basa legala
Ordinaziun federala 21-10-2016
Durada
3 onns
Furmaziun en la pratica
En in manaschi da la branscha da paraids e mirs exteriurs d’edifizis
Furmaziun en scola
Curs en bloc a la scola professiunala a Uzwil/SG
Roms professiunals
- prescripziuns e mesiras davart la segirezza da lavur e la protecziun da la sanadad e da l’ambient
- installaziun da stresas e sistems vi da paraids e mirs exteriurs
- planisaziun e preparaziun da las cuvridas da tetg
- tschentar, mantegnair e reparar ils sistems da tetg
Curs ordaifer il manaschi
Emprender ed exercitar a moda pratica la basa professiunala
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Attestat federal da qualificaziun "tetger / tetgera AFQ"
Premissas
Furmaziun preliminara
- scola populara terminada
Pretensiuns
- esser senza sturnizi
- inschign manual
- abilitad da lavurar en in team
- enclegientscha pratica
- enclegientscha tecnica
- imaginaziun spaziala
- sanadad robusta
- flexibilitad corporala
Furmaziun supplementara
Curs
purschidas da scolas spezialisadas e scolas professiunalas, da l’uniun Polybau sco era da manaschis da la branscha da paraids e mirs d’exteriur d’edifizis
Furmaziun da basa scursanida
emprendissadi supplementar d’in onn sco isolader / isoladra AFQ, sco constructur / constructura da fatschadas AFQ ni sco constructur / constructura da puntanadas AFQ, emprendissadi supplementar da dus onns sco montader / montadra da storas AFQ ni sco toler / tolera AFQ
Examen professiunal (EP)
cun diplom federal: manader / manadra da construcziun da paraids e mirs exteriurs, cussegliader energetic / cussegliadra energetica en edifizis u manader / manadra da project en montascha d’installaziuns dal current solar
Examen professiunal superiur (EPS)
maister / maistra en policonstrucziun
Scola spezialisada superiura (SSS)
curs da furmaziun en domenas sumegliantas, p. ex. tecnicist / tecnicista SSS surveglianza da construcziun
Scola auta spezialisada (SAS)
direcziuns da studi en roms sumegliants, p. ex. Bachelor of Science SAS en tecnica da construcziun (direcziun paraids e mirs exteriurs) a la scola auta a Lucerna
Cundiziuns da lavur
Tetgers lavuran en manaschis da la branscha da paraids e mirs exteriurs d’edifizis u en uschenumnads manaschis maschadads (mirs exteriurs d’edifizis e tolaria).
Quai èn per ordinari manaschis pitschens u mesauns.
Tetgers pon era lavurar en manaschis d’industria che fabritgeschan products per paraids e mirs exteriurs.
Ulteriuras infurmaziuns
Uniun Polybau
Lindenstr. 4
Postfach
9240 Uzwil
Tel: 071 955 70 41
URL: www.polybau.ch