Lavurs
Transports e viadis cun il tren schanegian l’ambient ed èn sperts e segirs. Las viafiers èn dependentas da vias da traffic construidas bain. Practicistas e practicists da la montascha da binaris procuran cun lur lavur en il team che la rait da viafier fitg frequentada restia adina segira.
Practicists da la montascha da binaris endrizzan il plazzal ed al segireschan. Cun agid da chavaterras e d’autras maschinas da construcziun preparan els il fundament, auzan ora material e nivelleschan malgulivezzas. Els tschentan lingias da drenascha u lingias industrialas e betuneschan ils fundaments.
Practicists da montascha da binaris mettan la glera sin il fundament e tschentan las traversas sisura. La montascha dals binaris succeda a moda fitg precisa cun agid d’ina crana.
La tgira dal conturn dals binaris tutga era tar las lavurs da practicists da la montascha da binaris. Els segan il pastg, taglian las chaglias sin scarpas, rumeschan la naiv e nettegian e repareschan ils chanals da drenascha e las lingias.
Montaders da binaris lavuran bunamain adina en teams ed èn da tutt’aura or en il liber. Els enconuschan ils privels dal plazzal e protegian sasezs ed ils collegas cun resguardar las prescripziuns da segirezza, prender mesiras per la prevenziun d’accidents e purtar la vestgadira da protecziun persunala.
Per schanegiar l’ambient resguardan els las prescripziuns davart la protecziun da l’ambient. Il material duvrà dismettan els tenor las prescripziuns dal manaschi.
Scolaziun
Basa legala
Ordinaziun federala 1-11-2013
Durada
2 onns
Furmaziun en la pratica
En in manaschi da la montascha da binaris u tar viafiers publicas u privatas
Furmaziun en scola
Curs en bloc a la scola professiunala da constructurs da vias da traffic a Sursee: en tut 18 emnas, da quellas 2 emnas ad onn furmaziun cun l’accent “montascha da binaris”
Roms professiunals
- organisar las lavurs e procurar per la segirezza da la lavur, per la protecziun da la sanadad e per la protecziun da l’ambient
- realisar lavurs generalas en la construcziun da vias da traffic
- realisar montaschas da binaris
Curs ordaifer il manaschi
Emprender ed exercitar las basas professiunalas en la pratica
Diplom
Attest federal professiunal "practicist / practicista da la montascha da binaris AFP"
Premissas
Furmaziun preliminara
- scola populara terminada
Pretensiuns
- inschign manual
- enclegientscha pratica
- enclegientscha tecnica
- senn da responsabladad e da segirezza
- exactadad
- abilitad da lavurar en ina gruppa
- forza corporala
- buna sanadad
Furmaziun supplementara
Curs
purschidas da scolas professiunalas e scolas spezialisadas, dal center da furmaziun Campus Sursee, da la Societad svizra dals impressaris constructurs sco era curs entaifer il manaschi
Montader / Montadra da binaris AFQ
Practicists da la montascha da binaris AFP pon absolver ina furmaziun da basa scursanida sco montaders da binaris AFQ (entrada en il 2. onn da furmaziun).
Silsuenter han els las medemas pussaivladads da furmaziun supplementara sco montaders da binaris AFQ.
Cundiziuns da lavur
Montaders da binaris lavuran per viafiers publicas u privatas sco er en manaschis da la construcziun da vias da traffic.
Ils temps da lavur èn per part irregulars. Savens lavuran els durant la notg.
Plazzas d’emprendissadi porschan cunzunt las viafiers, sporadicamain era manaschis da la montascha da binaris. Glieud professiunala qualifitgada è fitg tschertgada.
Ulteriuras infurmaziuns
Scola professiunala dals constructurs da vias da traffic
Chascha postala
6210 Sursee
Tel: 041 922 26 26
URL: www.verkehrswegbauer.ch
URL: www.bauberufe.ch
login furmaziun professiunala
Center d'annunzia
Riggenbachstr. 8
Chascha postala
4601 Olten
Tel: 0848 822 422
URL: www.login.org
Revista professiunala:
"B. Magazin – Das Magazin für Verkehrswegbauer"