?global_aria_skip_link_title?

Tecnolog / Tecnologa da products medicinals AFQ

Tecnologas e tecnologs da products medicinals AFQ preparan en ospitals e firmas spezialisadas instruments per la diagnostica e la tgira. Els nettegian, dischinfecteschan e steriliseschan ils products da medischina e contribueschan uschia essenzialmain a la prevenziun d’infecziun.

Lavurs

Tecnologas e tecnologs da products medicinals lavuran en ospitals, clinicas, centers da sanadad ed en firmas da sterilisaziun spezialisadas. Els preparan instruments, apparats, indrizs, materias ed accessoris che vegnan duvrads tar operaziuns, en examinaziuns diagnosticas ed en la tgira.

Tecnologas da products medicinals administreschan products da medischina: Ellas controlleschan l’inventari dal deposit e fan empustaziuns. Ultra da quai analiseschan ellas las dumondas da clients e sclereschan tgi ch’è responsabel. Lur lavurs planiseschan ed organiseschan ellas a moda independenta.

Avant il nettegiament sorteschan e prendan las tecnologas da products medicinals dapart ils products da medischina tenor las indicaziuns dal producent. Cun maschina u a maun nettegian e dischinfecteschan ellas ils products preparads. Suenter fan ellas controllas da process e dattan liber ils products per il suandant pass da preparaziun. En in proxim pass mettan ellas ensemen ils products da medischina e concepeschan els tenor uschenumnadas glistas da pacs tar entirs sets. Els pacheteschan ed etichetteschan quels.

Tecnologas da products medicinals attribueschan indrizs als proceders da sterilisaziun fixads, fan tests da funcziun e documenteschan quels. Suenter steriliseschan ellas ils products en indrizs da sterilisaziun dirigids entras computers e dattan liber quels suenter davosas controllas da process per che quels possian suenter puspè vegnir duvrads.

Tecnologas da products medicinals respectan las mesiras e prescripziuns davart la segirezza da lavur e davart la protecziun da l’ambient e da la sanadad. En questa professiun èsi spezialmain impurtant da resguardar las prescripziuns d’igiena. Las tecnologas da products medicinals minimeschan cun lur lavur la periclitaziun da sanadad entras infecziuns, quai tant tar ils pazients sco era tar quels che dovran ils products da medischina.

Scolaziun

Basa legala

Ordinaziun federala 3-10-2017

Durada

3 onns

Furmaziun en la pratica

En in ospital, ina clinica, in center da sanadad u en ina firma per sterilisaziun medicinala

Furmaziun en scola

In di ad emna a la scola professiunala

Roms professiunals

  • administrar products da medischina ed organisar las lavurs per il process da preparaziun
  • nettegiar e dischinfectar ils products da medischina
  • metter ensemen e pachetar products da medischina
  • sterilisar products da medischina
  • segirar la qualitad e l’observaziun da las pretensiuns ch’èn vegnidas fixadas tenor dretg e normas tecnicas
  • Curs ordaifer il manaschi

    Tar differentas tematicas

    Maturitad professiunala

    Fitg bunas prestaziuns da scola permettan da frequentar la scola da maturitad professiunala durant la furmaziun da basa.

    Diplom

    Attestat federal da qualificaziun "tecnologa / tecnolog da products medicinals AFQ"

Premissas

Furmaziun preliminara
  • scola populara terminada
Pretensiuns
  • inschign manual
  • encletga tecnica
  • moda da lavur precisa
  • fidadadad
  • senn per igiena e responsabladad
  • forza fisica

Furmaziun supplementara

Curs

purschidas da scolas professiunalas e spezialisadas

Examen professiunal superiur (EPS)

expert / experta domena d’operaziun cun diplom federal

Scola spezialisada superiura (SSS)

spezialist / spezialista dipl. per radiologia medicinal-tecnica SSS, spezialist / spezialista dipl. tecnica d’operaziun SSS

Scola auta spezialisada (SAS)

cun scolaziun preliminara correspundenta: Bachelor of Science (SAS) en tecnica da medischina

Cundiziuns da lavur

Tecnologas e tecnologs da products medicinals lavuran en las domenas da preparaziun per products da medischina en ospitals, clinicas, centers da sanadad ed era en auters manaschis che preparan products da medischina. Sper products da medischina da standard che vegnan duvrads savens s’occupeschan els era da products da medischina cumplexs ch’èn vegnids sviluppads pir da nov.

Ulteriuras infurmaziuns

OdASanté, Nationale Dachorganisation der Arbeitswelt Gesundheit
Seilerstrasse 22
3011 Berna
Tel: +41 31 380 88 88
URL: www.odasante.ch

Survista davart professiuns da sanadad:
URL: www.gesundheitsberufe.ch




orientation.ch