Passer au titre

Tecnolog / Tecnologa da products da medischina AFQ

Tecnologas e tecnologs da products da medischina AFQ preparan en ospitals e firmas spezialisadas instruments chirurgics, indrizs per la diagnostica ed utensils per la tgira. Els nettegian, dischinfecteschan e steriliseschan ils products da medischina e contribueschan uschia essenzialmain a la prevenziun d’infecziun.

Lavurs

Els exequeschan suandantas lavurs:

Preparar products
  • preparar instruments, apparats, indrizs, materias ed accessoris che vegnan duvrads tar operaziuns, en examinaziuns diagnosticas ed en la tgira
  • ordinar e  prender dapart ils products da medischina tenor las indicaziuns dal producent
  • nettegiar e dischinfectar ils products a maun u cun maschina
  • far controllas dal process e dar liber ils products per il proxim pass da preparaziun
  • metter ensemen ils products da medischina e concepir els tenor glistas d'emballadi tar entirs sets, pachetar ed etichettar quels
Sterilisar indrizs
  • attribuir indrizs als proceders da sterilisaziun fixads
  • far tests da funcziun e documentar quels
  • sterilisar ils utensils en indrizs da sterilisaziun dirigids entras computers e dar liber quels suenter davosas controllas da process per che quels possian suenter puspè vegnir duvrads
Ulteriurs pensums en il manaschi
  • controllar l’inventari dal deposit e far empustaziuns
  • analisar las dumondas da clients e sclerir tgi ch’è responsabel
  • respectar las mesiras e prescripziuns davart la segirezza da lavur e davart la protecziun da l’ambient e da la sanadad
  • resguardar las prescripziuns d’igiena per minimar cun lur lavur la periclitaziun da sanadad entras infecziuns, quai tant tar ils pazients sco era tar quels che dovran ils products da medischina

Scolaziun

Basa legala

Ordinaziun federala 3-10-2017

Durada

3 onns

Furmaziun en la pratica

En in ospital, ina clinica, in center da sanadad u en ina firma per sterilisaziun medicinala

Furmaziun en scola

In di ad emna a la scola professiunala

Roms professiunals

  • administrar products da medischina ed organisar las lavurs per il process da preparaziun
  • nettegiar e dischinfectar ils products da medischina
  • metter ensemen e pachetar products da medischina
  • sterilisar products da medischina
  • segirar la qualitad e l’observaziun da las pretensiuns ch’èn vegnidas fixadas tenor dretg e normas tecnicas
  • Curs ordaifer il manaschi

    Emprender ed exercitar a moda pratica la basa professiunala

    Maturitad professiunala

    Fitg bunas prestaziuns da scola permettan da frequentar la scola da maturitad professiunala durant la furmaziun da basa.

    Diplom

    Attestat federal da qualificaziun "tecnologa / tecnolog da products da medischina AFQ"

Premissas

Furmaziun preliminara
  • temp da scola obligatoric terminà
Pretensiuns
  • inschign manual
  • encletga tecnica
  • moda da lavur precisa
  • fidadadad
  • senn per igiena e responsabladad
  • forza fisica

Furmaziun supplementara

Curs

purschidas da scolas professiunalas e spezialisadas

Examen professiunal superiur (EPS)

expert / experta domena d’operaziun cun diplom federal

Scola spezialisada superiura (SSS)

spezialist dipl. per radiologia medicinal-tecnica SSS, spezialista dipl. tecnica d’operaziun SSS

Scola auta spezialisada (SAS)

correspundenta: Bachelor of Science (SAS) en tecnica da medischina. Tut tenor scola auta spezialisada valan differentas cundiziuns d'admissiun.

Cundiziuns da lavur

Tecnologas e tecnologs da products da medischina lavuran en las domenas da preparaziun per products da medischina en ospitals, clinicas, centers da sanadad ed era en auters manaschis che preparan products da medischina. La glieud da professiun planisescha ed organisescha sia lavur il pli savens sur sasez. Sper products da medischina da standard che vegnan duvrads savens s’occupeschan els era da products da medischina cumplexs ch’èn vegnids sviluppads pir da nov.

Ulteriuras infurmaziuns

OdASanté, Nationale Dachorganisation der Arbeitswelt Gesundheit
Seilerstrasse 22
3011 Berna
Tel: +41 31 380 88 88
URL: www.odasante.ch

Survista davart professiuns da sanadad:
URL: www.gesundheitsberufe.ch




orientation.ch