Lavurs
Lur lavurs èn las suandantas:
Planisar e preparar indrizs solars
- controllar las incumbensas e planisar la lavur
- controllar e preparar il material ed ils apparats da lavur, p.ex. las maschinas da furar, las zangas, ils cabels ed ils moduls solars
- infurmar ils incumbensaders davart l'organisaziun da las lavurs
- documentar la lavur, per exempel skizzar tscherts elements da construcziun
- infurmar las persunas superiuras davart il progress da las lavurs
Installar indrizs solars
- montar indrizs solars sin tetgs plats u sin tetgs a piz ubain vi da fatschadas
- resguardar las reglas da la segirezza a la lavur, per exempel cun lavurar sin tetgs u cun electricitad
- installar e colliar lingias ed alternaturs
- coordinar las lavurs cun auters mastergnants, per exempel cun electroinstallaturas u cun cuvratetgs
- montar accumulaturs d'energia solara e silsuenter metter en funcziun ils indrizs solars
- surdar ils indrizs solars a la clienta e declerar, co che l'indriz funcziuna
Mantegnair indrizs solars
- mantegnair indrizs, per exempel controllar, sch'in nettegiament è necessari u sch'il tetg è anc en in bun stadi
- identifitgar ed eliminar disturbis, per exempel, sch'in modul è rut pervia da granella u sch'in cabel sto vegnir remplazzà
- demontar indrizs ed als dismetter en moda ecologica
Scolaziun
Durada
3 onns
Furmaziun pratica
Tar ina interpresa dal provediment d'energia, ina firma d'installaziun solara, ina firma d'installaziuns electricas u ina interpresa da la branscha solara.
Furmaziun en scola
1 di per emna en la Scola tecnica spezialisada Berna ubain curs da bloc en ina da las suandantas scolas professiunalas spezialisadas:
- Uzwil (SG)
- Grenchen (SO)
- Les Paccots (FR) (en franzos)
- Lugano-Trevano (TI) (en talian)
Roms professiunals
- organisar lavurs vi da la mantellada d'edifizis
- planisar e preparar la montascha e l'installaziun d'indrizs solars
- montar ed installar ils indrizs solars
- mantegnair, reparar e demontar ils indrizs solars
Curs ordaifer il manaschi
Emprender, approfundar ed exercitar las basas professiunalas, 40 dis durant 3 onns.
Maturitad professiunala
Sche las prestaziuns da scola èn fitg bunas, pon las emprendistas ed ils emprendists frequentar supplementarmain la scola da maturitad professiunala.
Diplom
Installatur / Installatura d'implants solars AFQ
Premissas
Furmaziun preliminara
- terminà la scola obligatorica
Pretensiuns
- senza sturnizi
- inschign manual
- imaginaziun tridimensiunala
- resistenza a la temperatura ed a l'aura
- resistenza corporala
- abilitad da lavurar en in team
- prontezza d'esser savens en gir
Furmaziun supplementara
Curs
purschidas da scolas spezialisadas e da scolas professiunalas spezialisadas, da centers da furmaziun supplementara, da federaziuns professiunalas e da branscha sco er da Swissolar.
Emprendissadi supplementar
Installaturas ed installaturs d'implants solars AFQ pon far per regla in emprendissadi scursanì sco Isolatur / Isolatura AFQ, Cuvratetgs AFQ, Constructur / Constructura da fatschadas AFQ, Montader / Montadra da puntanadas AFQ u Spezialist / Spezialista per tecnica da parasulegl e storas AFQ.
Examen professiunal (EP)
Cun attestat professiunal federal, per exempel:
- Mainaproject en montascha solara
- Cussegliader energetic / Cussegliadra energetica d'edifizis
Scola spezialisada superiura (SSS)
Studis en roms parentads, per exempel:
- Tecnicist / Tecnicista d'edifizis dipl. SSS
- Automaticher / Automaticra d'edifizis dipl. SSS
- Tecnicist / Tecnicista en energia ed ambient dipl. SSS
Scola auta spezialisada (SAS)
Studis en secturs parentads, per exempel bachelor of science en:
- tecnica d'edifizis
- tecnica d'energia e d'ambient
- inschigneria d'ambient
- electrotecnica
- inschigneria da construcziun
Tut tenor la scola auta spezialisada valan differentas cundiziuns d'admissiun.
Cundiziuns da lavur
Installaturas ed installaturs d'indrizs solars lavuran en il liber e bunamain da tutt'aura. Per intginas lavurs portan ellas ed els in equipament da protecziun cun chapellina, protecziun cunter il sulegl, chalzers da segirezza e guants. Ellas ed els lavuran en in team, en l'aut sin tetgs e savens en posiziuns malempernaivlas. Lur temps da lavur pon variar tut tenor la stagiun. Ellas ed els coordineschan lur lavurs cun autras persunas spezialisadas dal sectur da la mantellada d'edifizis e da construcziun, per exempel cun stagneras u cun cuvratetgs.
Installaturas ed installaturs d'indrizs solars lavuran en interpresas ch'èn sa spezialisadas sin il provediment d'energia, indrizs d'electricitad u da fotovoltaica ubain sin l'energia solara. Pervia da las finamiras politicas en la protecziun dal clima e da l'ambient s'augmenta la dumonda d'indrizs solars. Perquai èn mastergnantas e mastergnants scolads dumandads sin il martgà da lavur.