Lavurs
Assistents da veterinaris ed assistentas da veterinarias lavuran savens en ina pratica d’animals pitschens per tgirar chauns, giats, pitschens animals da pensiun ed utschels. Oravant tut en praticas d’animals gronds sin la champagna tgiran els era muvel da niz sco vatgas u portgs. Darar èn els emploiads en praticas da chavals, ospitals u pensiuns d’animals, laboratoris d’interpresas per medicaments u en negozis zoologics.
A la recepziun prendan assistents da veterinaris encunter ils telefons e cusseglian ils possessurs d’animals, els giuditgeschan, sch’i fa prescha e fixeschan in termin. Animals malsauns, blessads ed animals che duain vegnir intercurids vegnan beneventads e preparads per il tractament. Els vendan medicaments e pavel e cusseglian la clientella en connex cun dumondas da pavlar e tegnair animals.
Per las consultaziuns ed ils tractaments mettan assistents da veterinaris a disposiziun ils instruments ed apparats nettegiads e dischinfectads. Els preparan las prelevaziuns da secrets ed urin, assistan ad operaziuns, surveglian la narcosa e mettan infusiuns. Lavurs sco dischinfectar blessuras, prender sang, far radiografias, prender davent tartagl, tgirar il pail u metter si ina faschadira fan els a moda independenta. Sch’in animal sto restar pli ditg en la pratica, saja quai perquai ch’el sto sa revegnir d’ina operaziun u per ina terapia speziala, vegn el pavlà, tgirà e surveglià dals assistents da veterinaris.
En il labor intercureschan assistents da veterinaris sang, urin ed excrements cun agid da microscops ed apparaturas. Els fan tests, giuditgeschan ed archiveschan ils resultats da test e preparan las provas per analisas spezialas e per la spediziun postala.
Assistents da veterinaris procuran per urden, nettezza ed igiena en lur plaz da lavur. Els nettegian e dischinfecteschan la pratica, la maisa da tractament, las apparaturas ed ils instruments.
Ultra da quai èn assistents da veterinaris responsabels per l’administraziun da la pratica. Els mainan ils dossiers da pazients e la correspundenza, empostan medicaments e materialias, administreschan il deposit e scrivan ils rapports da segiradas ed ils quints.
Scolaziun
Basa legala
Ordinaziun federala 17-9-2007, cun midada dals 30-11-2010
Durada
3 onns
Furmaziun en la pratica
En ina pratica da veterinari u pli darar en in ospital d’animals
Furmaziun en scola
1 di per emna a la scola professiunala da Berna, Lucerna u Turitg
Roms professiunals
- assistenza da consultaziuns
- assistenza interna da medischina veterinaria
- relaziun correcta cun animals
- organisaziun dal manaschi
- prevenziun d’accidents
- igiena e protecziun da l’ambient
- labor
- maletgs medicinals
- basas da la scienza natirala
Curs ordaifer il manaschi
Tar differents temas
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Attestat federal da qualificaziun "assistent da veterinari / assistenta da veterinaria AFQ"
Premissas
Furmaziun preliminara
- scola populara terminada
Pretensiuns
- inschign e sentiment da s’occupar cun animals e persunas
- dun d’observaziun e sperta chapientscha
- dun pratic
- moda da lavur exacta
- talent d’organisar
- abilitad da lavurar en ina gruppa
- senn per nettezza ed urden
- buna sanadad e naginas allergias
- nagin disgust da spizza, d’excrements e d’animals spezials
Furmaziun supplementara
Curs
purschidas da la Societad svizra da las veterinarias e dals veterinaris, da l’Associaziun svizra da las assistentas da veterinarias e da l’Associaziun svizra da la medischina per animals pitschens sco era da scolas professiunalas e scolas spezialisadas
Spezialisaziun
tecnicist / tecnicista d’anestesia veterinaria (certificat da la Scola d’anestesia veterinaria per tecnicists / tecnicistas e gidanters / gidantras da medi)
Cundiziuns da lavur
Assistents da veterinaris ston quintar cun in temp da lavur irregular e cun sururas. En la pratica vegn lavurà exact e net. En situaziuns da hectica restan els calms e salvan la survista, els lavuran a moda concentrada e collavureschan cun ils animals sco era cun ils possessurs a moda segira e cun chapientscha per lur situaziun.
La purschida da plazzas d’emprendissadi è limitada. I po dar ch’ins chatta ina plazza d’emprendissadi mo en in auter lieu u en in’autra regiun. Il medem vala per ina plazza. Las pussaivladads da retschaiver ina gronda paja e da far carriera èn limitadas.
Ulteriuras infurmaziuns
VSTPA Vereinigung der schweizerischen tiermedizinischen Praxisassistentinnen
URL: www.vstpa.ch
Veterinärmedizinischer Weiterbildungskalender:
URL: www.vet-congress.ch
Revista professiunala:
"Schweiz. Archiv für Tierheilkunde"