Passer au titre

Tecnolog / Tecnologa da victualias AFQ

Tecnologs e tecnologas da victualias AFQ lavuran en l’industria da victualias ed elavuran las materias primas tar victualias e bavrondas. Els regleschan e controlleschan ils indrizs d’elavuraziun ed emballadi e fan analisas da labor per segirar la qualitad.

Lavurs

Tecnologs e tecnologas da victualias AFQ produceschan victualias e bavrondas a moda industriala. Els sa spezialiseschan en ina da las suandantas direcziuns: pastizarias, biera, products da convenience, products a basa da charn, bavrondas, tschigulatta, products setgs e products a basa da zutger.

Tecnologs da victualias AFQ prendan encunter las materias primas. Els controlleschan la qualitad e la quantitad da la rauba e la magasineschan immediatamain per ch’ella restia frestga. Las materias primas vegnan tenor recepts definids pasadas e maschadadas ed ils tecnologs da victualias fan purziuns cun las materias primas che vegnan perfecziunadas cun substanzas auxiliaras ed aditivs sco aromas, rinforzaders da l’aroma, lioms, colurants e vitamins.

Tecnologs da victualias AFQ controlleschan constantamain la qualitad da lur products, prendan provas ed analiseschan quellas en il labor. Durant il process da producziun controlleschan els co che las victualias vesan ora, la savur, il gust  e l’emballadi da las victualias. Cun quellas mesiras pon els garantir la qualitad pretendida ed evitar sbagls da producziuns che chaschunan gronds custs al manaschi.

Tecnologs da victualias AFQ sa tegnan rigurusamain a las prescripziuns da segirtad e da igiena. Regularmain ston els nettegiar las maschinas e tut ils indrizs. Avant da cumenzar cun la producziun ston els endrizzar las maschinas e la sveltezza da la tschinta da transport. Quai fan els en la centrala, davent da la quala els manevreschan l’entir indriz cun il PC. Correcturas fan els directamain vi da la maschina u cun in clic da la mieur davent da l’armatura.

Scolaziun

Basa legala

Ordinaziun federala 5-9-2012 (versiun dal 1-1-2018)

Durada

3 onns

Accents

pastizarias, biera, products da convenience, products a basa da charn, bavrondas, tschigulatta, products setgs e products a basa da zutger

Furmaziun en la pratica

En in manaschi industrial da victualias

Furmaziun en scola

Plirs curs da bloc da 3 emnas per onn a la scola professiunala a Strickhof, Au/Wädenswil (4 curs da bloc en il 1., 5 en il 2. e 3 en il 3. onn d'emprendissadi)

Roms professiunals

  • preparar las materias primas
  • producir las victualias
  • embuttigliar ed emballar las victualias
  • segirar la persistenza e la segirtad
  • enconuscher bain las tecnologias (ch’èn centralas per l’atgna direcziun)
  • Curs ordaifer il manaschi

    Tar differents temas

    Maturitad professiunala

    Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.

    Diplom

    Attestat federal da qualificaziun "tecnolog / tecnologa da victualias AFQ"

Premissas

Furmaziun preliminara
  • scola populara terminada cun prestaziuns medias u autas
  • bunas prestaziuns en biologia, chemia, fisica e matematica
Pretensiuns
  • plaschair da s’occupar cun victualias, implants da producziun moderns e maschinas d’emballadi
  • interess a la biologia, chemia e fisica
  • enclegientscha tecnica
  • bun dun d’observaziun
  • in bun nas e bun gust
  • naginas allergias
  • senn per nettezza ed igiena
  • sanadad robusta (activitad sin pe e per part gronda differenza da temperatura)
  • prontadad da lavurar a temp irregular

Furmaziun supplementara

Curs

Purschidas da la scolas spezialisadas e da las scolas professiunalas sco er da la Cuminanza da lavur per la scolaziun dals tecnologs da victualias AG LMT

Examen professiunal (EP)

p.ex. tecnolog / tecnologa da victualias cun certificat professiunal federal

Examen professiunal superiur (EPS)

p.ex. tecnolog da victualias diplomà / tecnologa da victualias diplomada

Scola spezialisada superiura (SSS)

p.ex. tecnicist diplomà SSS / tecnicista diplomada SSS, direcziun tecnologia da victualias

Scola auta spezialisada (SAS)

Bachelor of Science (SAS) en tecnologia da victualias, Bachelor of Science (SAS) en Life Technologies, Bachelor of Science (ZFH) en biotecnologia, Bachelor of Science (HES-SO) en enologia euv. Tut tenor scola auta spezialisada valan differentas cundiziuns d'admissiun.

Cundiziuns da lavur

Tecnologs da victualias AFQ han la pussaivladad – tut tenor accent - da lavurar en differents lieus, sco per exempel en ina pitschna brassaria fin en in manaschi industrial da bavrondas. En Svizra cumenzan mintg’onn circa 100 giuvenils la scolaziun professiunala per daventar tecnolog da victualias AFQ. Las schanzas sin il martgà da lavur èn fitg bunas en Svizra sco era a l’exteriur. Cun ina furmaziun supplementara correspundenta èsi pussaivel da lavurar suenter la scolaziun da basa sco cussegliader u da lavurar en il sectur commerzial d’in manaschi da producziun industrial. Tut tenor manaschi è il temp da lavur irregular.

Ulteriuras infurmaziuns

Arbeitsgemeinschaft Lebensmitteltechnologen
Worbstrasse 52
Postfach
3074 Muri b. Bern
Tel: 031 352 11 88
URL: www.lebensmitteltechnologe.ch

Strickhof
Lebensmitteltechnologie und Hortikultur
Seestrasse 295
8804 Au ZH
Tel: 058 105 94 00
URL: www.strickhof.ch

Revistas professiunalas:
"foodaktuell", "Lebensmittel-Technologie", "Alimenta", "Lebensmittel-Industrie"
URL: www.foodnews.ch



orientation.ch