Passer au titre

Spezialist / Spezialista d’economia da chasa AFQ

Spezialists e spezialistas d’economia da chasa lavuran en chasas d’abitar publicas, ospitals, hotels e manaschis da gastronomia. Là organiseschan els l’economia da chasa. Els guardan per il bainstar dals umans che van en lur manaschi en ed or.

Lavurs

Spezialists e spezialistas d’economia da chasa èn responsabels per tut ils secturs d’economia da chasa. Tut tenor manaschi han els differents accents pertutgant nettegiament, lavandaria u mangiar. Els planiseschan e fan lur lavur a moda raschunaivla e favuraivla a l’ambient.

Spezialists d’economia da chasa organiseschan il nettegiament da stanzas e da l’instituziun. Els elegian meds da nettegiar adattads, repartan la lavur e nettegian svelt ed exact. Sch’insatge è en paglia, procuran els per la reparatura. Els drizzan en las stanzas a moda abitabla ed andanta.

En chasas d’abitar publicas, ospitals e clinicas, en manaschis da gastronomia e hotels datti mintga di bler da lavar.  Spezialists d’economia da chasa rimnan e sorteschan la laschiva. Els san utilisar maschinas da lavar, maschinas da stirar e nettegian las differentas textilias a moda professiunala.

Spezialists d’economia da chasa collavuran er en cuschina. Els mettan ensemen menus e resguardan ils differents basegns da persunas pli veglias u persunas malsaunas. Els valiteschan la qualitad ed il pretsch da victualias e guardan ch’i vegnia cuschinà stagiunal. Tratgs simpels preparan spezialists d’economia da chasa sezs tiers.

Spezialists d’economia da chasa collavuran en il service ed adempleschan ils giavischs dals giasts. Suenter il mangiar èn els responsabels ch’i vegnia fatg urden e che tut vegnia lavà giu e mess davent igienicamain.

En ospitals, clinicas e chasas d’abitar publicas han spezialists d’economia da chasa da far cun umans che dovran sustegniment e tgira. Els als scuntran a moda curtaschaivla e servetschaivla. Els vesan, sch’i va bain cun ils abitants e pazients e sch’els dovran agid.

Spezialists d’economia da chasa han er incumbensas administrativas. Els scrivan al PC plans per menus e servetschs e mainan simplas statisticas. Ultra da quai administreschan els en ils deposits vaschella, laschiva e material da diever. Spezialists d’economia da chasa sa barattan cun lur team e tgiran la collavuraziun cun autra glieud da professiun e partiziuns en lur manaschi. Els èn responsabels per l’instrucziun da practicists d’economia da chasa.

Scolaziun

Basa legala

Ordinaziun federala 10-09-2015

Durada

3 onns

Furmaziun en la pratica

En chasas d’abitar publicas, ospitals, clinicas, u hotels.

Furmaziun en scola

Per regla 1 di per emna a la scola professiunala

Roms professiunals

  • Beneventar, cussegliar e servir clients
  • nettegiar e decorar stanzas
  • exequir lavurs en la lavandaria
  • crear, preparar e reparter menus
  • exequir lavurs administrativas
  • promover l'atgna sanadad e sustegnair las clientas ed il clients

Curs ordaifer il manaschi

Emprender ed exercitar a moda pratica la basa professiunala

Maturitad professiunala

Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.

Diplom

Attestat federal da qualificaziun "spezialist / spezialista d’economia da chasa AFQ"

Premissas

Furmaziun preliminara
  • scola populara terminada
Pretensiuns
  • plaschair vi da contact
  • empatia
  • buna demananza
  • conscienza da servetschs
  • persuna inschignaivla
  • conscienza d’igiena
  • talent d’organisaziun
  • senn per urden
  • movibilitad corporala
  • abilitad da supportar squitsch
  • abilitad da lavurar en in team
  • buna savida da la lingua tudestga e chapientscha dal dialect svizzer

Furmaziun supplementara

Curs

purschidas da las scolas spezialisadas e professiunalas sco era da la OdA 'economia da chasa'

Examen professiunal (EP)

cun certificat professiunal federal: guvernanta,  manader / manadra da sectur hotellaria ed economia da chasa, guvernanta purila, spezialist / spezialista da mantegniment, spezialist / spezialista per nettegiar edifizis

Examen professiunal superiur (EPS)

cun diplom federal: manader / manadra hotellaria-economia da chasa, manader / manadra gastronomia collectiva, manader / manadra en facility management, pura / guvernanta purila, manader / manadra d’instituziun, manader / manadra da mantegniment, spezialist / spezialista per nettegiar edifizis

Scola spezialisada superiura (SSS)

manader / manadra da gestiun en facility management SSS, hotelier / hoteliera dipl.- ustier / ustiera dipl.

Scola auta spezialisada (SAS)

Bachelor of Science (SAS) en facility management

Cundiziuns da lavur

Spezialists d’economia da chasa lavuran en manaschis gronds, nua che vegnan tgirads blers giasts, clients u pazients. Latiers tutgan chasas d’abitar publicas, ospitals, clinicas, hotels e manaschis da gastronomia.

Tut tenor manaschi ha la glieud da professiun differents accents. Cun la furmaziun supplementara correspundenta san els manar teams u secturs.

Ulteriuras infurmaziuns

OdA Hauswirtschaft Schweiz
Adligenswilerstr. 22
Postfach 3027
6002 Luzern
Tel: 041 921 62 77
URL: www.oda-hauswirtschaft.ch

Revistas professiunalas:
"Newsletter"



orientation.ch