Spezialist / Spezialista da la tgira da textilias AFQ

Spezialists e spezialistas da la tgira da textilias en la direcziun da la lavandaria da textilias lavuran en manaschis da la lavandaria da textilias. Els s’occupeschan da textilias sco chamischas, vestgids u giaccas plimettas da la clientella. Els intercureschan las textilias davart flatgs, isadas u defects ed als noteschan. Ultra da quai sa cunvegnan els cun la clientella davart las pussaivladads e las duradas dal nettegiament. Lasuenter registreschan els l’incumbensa e marcheschan la tocca da vestgadira per las pudair returnar als dretgs clients. Els casseschan la summa e surdattan a la clientella ina quittanza da retratga.

Spezialists da la tgira da textilas nettegian tocca betg lavabla sco per exempel blusas da saida u mantels da plievgia cun chemicalias e dissolvents. Polluziuns che na pon betg vegnir eliminadas maschinalmain tractan els manualmain. Tar tut quai fan els attenziun da betg donnegiar la taila. Cun lur savida davart la fibra, la taila, stampas ed applicaziuns cusseglian spezialists da la tgira da textilias la clientella cumpetentamain e amicablamain. Els recumondan metodas da lavar e nettegiar adequatas e tractan reclamaziuns.

Spezialists da la tgira da textilias en la direcziun da lavandarias grondas lavuran en pli gronds manaschis da lavandaria. Els nettegian rauba da letg, tuaglias e laschiva da frottar da hotels, restaurants, chasas da tgira ed ospitals e vestgadira da professiun dal commerzi e da l’industria. Els sortan la laschiva furnida tenor colur, tip da taila ed intensitad da polluziun. Tenor basegns tractan ellas ordavant parts fitg smerdadas. Els tschernan la metoda da nettegiar adequata, calculeschan il volumen da la laschiva e chargian la maschina. En il sectur da finiziun stiran ellas, fan ellas ora cun il fier cun u senza vapur e faudan la laschiva sientada. En il sectur da spediziun emballeschan ellas la laschiva per la furniziun.

Spezialists da la tgira da textilias dovran las maschinas ed ils utensils da nettegiar professiunalmain. Els procuran cun lavurs da mantegniment che las maschinas funcziunian adina senza difficultads. Els èn capablas da reparar disturbis.

La segirezza da la lavur e la protecziun da la sanadad e da l’ambient èn fitg impurtantas. Ils spezialists resguardan las prescripziuns durant la lavur, tar l’allontanament dal rument, durant l’utilisaziun da chemicalias u tar l’engaschament d’aua buglienta u vapur.