Lavurs
Aurers ed aureras lavuran principalmain cun metal prezius sco aur, argient, platin, palladi e lur liaments. Els produceschan en lavur manuala precisa bischutaria, giuvels, utensils e products sumegliants. Els creeschan skizzas, musters e models tenor atgnas ideas u tenor ils giavischs da la clientella.
Durant la planisaziun da l’andament da la lavur calculeschan aurers las surfatschas ed il volumen sco er il material necessari e determineschan las tecnicas da la producziun. Tar tut las preparaziuns èn els attents d’exequir las lavurs a moda e maniera exacta ed efficienta e da na betg duvrar memia bler material. Modificaziuns e reparaturas fan era part da lur professiun. Tut tenor la direcziun speziala sa differenzieschan dentant ils accents da lur lavur.
Aurers spezialisads en la lavur d’aurer produceschan cunzunt bischutaria. Els lavuran en bischutarias u manufacturas nua ch’els creeschan unicats u serias tenor prescripziuns precisas. Aurers che lavuran en manaschis pitschens u en in agen atelier pon avair dapli spazi d’agir creativamain. Els produceschan bischutaria tenor atgnas ideas sco era tenor ils giavischs da la clientella.
Aurers da la direcziun da la lavur d’argienter produceschan sper utensils sco stgadellas, plattas, chantas, cups e pusada era bischutaria. Tar tut quai dovran els cunzunt liaments d’argient. Cun agid da tecnicas da defurmaziun sco il fravegiar, storscher, laminar, trair u pressar furman els la tocca en elavuraziun. Els lavuran en fabricas da rauba d’argient u en pitschens ateliers, nua ch’els produceschan agens unicats u empustaziuns da la clientella.
La terza direcziun speziala è l’enchastrar da pedra preziusa u substanzas organicas en cliniezs. Cun lur savida creativa dovran els differentas tecnicas d’enchaschament per optimar l’intensitad da glisch da la pedra.
Durant la lavur resguardan aurers las prescripziuns da la segirezza da la lavur e da la protecziun da la sanadad e da l’ambient. Els realiseschan las directivas da la lescha e dal manaschi conscienziusamain ed independentamain.
Scolaziun
Basa legala
Ordinaziun federala 8-7-2009
Durada
4 onns
Direcziuns
- lavur d’aurer u d’aurera
- lavur d’argienter u d’argientera
- enchastrar da pedra preziusa
Furmaziun en la pratica
En in atelier
Furmaziun en scola
1 di per emna a la scola professiunala
Roms professiunals
- producziun da bischutaria, giuvels, products sumegliants ed utensils
- diever e mantegniment da la valur da materials da lavur, utensils e maschinas
- segirezza da la lavur, protecziun da la sanadad e da l’ambient, creaziun, dissegn professiunal, pedras preziusas
Curs ordaifer il manaschi
Emprender ed exercitar a moda pratica la basa professiunala
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Attestat federal da qualificaziun "aurer / aurera AFQ"
Premissas
Furmaziun preliminara
- scola populara terminada
Pretensiuns
- inschign manual
- motorica fina
- enclegientscha tecnica
- flair creativ
- imaginaziun tridimensiunala
- senn per bellezza
- pazienza, premura e perseveranza
- buna vesida (era curregida)
- creativitad
Furmaziun supplementara
Curs
purschidas da scolas d’art applitgà e da scolas professiunalas sco era dal Verband Schweizer Goldschmiede und Uhrenfachgeschäfte VSGU
Examen professiunal superiur (EPS)
maister aurer / maistra aurera, maister enchastrader da giuvels / maistra enchastradra da giuvels, maister argienter / maistra argientera
Scola spezialisada superiura (SSS)
p.ex.: creader/ creadra dipl. SSS design da products
Scola auta spezialisada (SAS)
p.ex.: Bachelor of Arts (SAS) en design da products e d’industria
Cundiziuns da lavur
La lavur d’aurer pretenda fitg bler pazienza ed in’auta concentraziun. Aurers ston savair seser u star uras a la lunga davos maisa, pudair ir enturn cun utensils da precisiun ed adina lavurar da moda e maniera exacta.
La fundaziun d’in agen manaschi suenter la terminaziun da la furmaziun da basa dumonda in grond engaschament persunal, in talent d’organisaziun, l’inschign en il contact cun la clientella sco era in senn commerzial.
Ulteriuras infurmaziuns
Verband Schweizer Goldschmiede und Uhrenfachgeschäfte VSGU
Schmiedenplatz 5
Postfach 258
3000 Bern 7
Tel: 031 329 20 72
URL: www.detail.ch