Creader / Creadra da tecnica da reclama AFQ

Creaders e creadras da tecnica da reclama creeschan, produceschan e monteschan etichettaziuns, vehichels, vitrinas, tablas da reclama e da bajegiar, stans da fiera, sistems d’infurmaziun e d’orientaziun euv. Ils concepts che tutgan latiers elavuran els sezs tenor ils giavischs da la clientella u ch’els  surpiglian quels d’ateliers da grafica u d’agenturas da reclama.

En la tecnica da reclama vegn mintga product realisà e producì adattà al client ed a l’incumbensa. La cussegliaziun da la clientella è per quest motiv fitg impurtanta. En discurs erueschan creaders da tecnica da reclama ils basegns dals clients, analiseschan e sviluppeschan ideas e propostas per ina soluziun. Els elegian per las clientas ed ils clients las ideas ch’èn il pli adattadas, preschentan differentas propostas e las discussiunan cun els.

Durant la preparaziun da la lavur preparan creaders da tecnica da reclama tut ils documents ch’èn necessaris per la producziun. Els defineschan material da fabricaziun adattà, tecnicas da producziun e da fixaziun e fan ina planisaziun detagliada da la lavur e dals termins. Latiers guardan els da tegnair en ils custs calculads.

Il pli impurtant apparat da lavur per creaders da tecnica da reclama è il computer. Els n’al utiliseschan betg mo per il sboz e per la creaziun, mabain er per la producziun. En la preparaziun per la stampa preparan els las datas digitalas necessarias. Els legian ils sbozs en il computer ed als elavuran. Il tagliar or las scrittiras ed ils simbols or da folias succeda medemamain cun agid dal computer. Malgrà la tecnologia da computer è la lavur a maun necessaria per tschertas lavurs, per exempel per la serigrafia u per l’elavuraziun da material sco materia sintetica, metal, vaider u lain.

Cun agid d’in plan d’execuziun monteschan creaders da tecnica da reclama las etichettaziuns al lieu. Els remesiran la posiziun da montascha exacta e la marcheschan. Sistematicamain e tenor prescripziuns ferman els il product sin il fund preparà, per exempel d’in vaider da vitrina.

Creaders da tecnica da reclama sa tegnan durant tut las lavurs vi da las prescripziuns en connex cun la segirezza da lavur e resguardan ils aspects da la sanadad e da l’ambient.