Lavurs
En interpresas commerzialas procuran sistems da schelentar per exempel che aliments restian frestgs. Er interpresas industrialas, labors da perscrutaziun u patineras artifizialas dovran indrizs da schelentar.
Per montar indrizs da schelentar s’orienteschan montaders e montadras d’indrizs da schelentar a dissegns tecnics. Els fan conducts da bischens or d’atschal u arom ed installeschan in'isolaziun cunter la chalur. Els monteschan condensaders, motors electrics, ventilaturs, pumpas, transmissiuns da chalur, organs da regulaziun ed indrizs da segirezza.
Suenter la montascha controlleschan montaders d’indrizs da schelentar ch'ils indrizs da schelentar sajan impermeabels e controlleschan las funcziuns. Avant ch'emplenir il med da schelentar mettan els l’entir sistem sut in vacum. Suenter avair mess en funcziun l'indriz mesiran els la pressiun e la temperatura e protocolleschan ils resultats.
Montaders d’indrizs da schelentar construeschan indrizs d’aria cundiziunada che procuran per aria netta e temperaturas stabilas en biros, locals da vendita e hallas da fabricaziun. La chalur che vegn producida en ils agregats po vegnir duvrada en ils implants da recuperaziun per stgaudar ils edifizis. Per quest motiv s’occupan montaders d’indrizs da schelentar era cun sistems da pumpa a chalur.
Er il mantegniment e la reparatura d’indrizs da schelentar e da ventilaziun tutgan tar las incumbensas da montaders d’indrizs da schelentar: els controlleschan, schebain ils indrizs èn impermeabels ed erueschan cun agid da schemas eventuals disturbis ch'els curregian.
Montaders d’indrizs da schelentar san far lavurs manualas sco furar, glimar, separar, lutegiar e buglir. Ultra da quai han els enconuschientschas en l'electrotecnica, la tecnica da mesiraziun e la tecnica da regulaziun. Per survegliar ils indrizs e per controllar las prestaziuns utiliseschan els era computers.
Montaders d’indrizs da schelentar resguardan aspects ecologics ed aspects concernent la tecnica d’energia. Els enconuschan ils elements e la funcziun d’in ecosistem, san valitar la cumpatibilitad ecologica da differents meds da schelentar ed èn responsabels per la dismessa professiunala da meds da schelentar e carburants.
Montaders d’indrizs da schelentar èn savens en viadi, sin plazzals u en il service. Cunquai ch’indrizs d’aria cundiziunada ed indrizs da schelentar ston funcziunar da tuttas uras, fan els era servetsch da pichet.
Scolaziun
Basa legala
Ordinaziun federala 4-11-2011
Durada
4 onns
Accents
- indrizs da schelentar commerzials
- indrizs da schelentar industrials
- sistems da pumpa a chalur
- indrizs d’aria cundiziunada e da schelentar
Furmaziun en la pratica
En in manaschi da la branscha d’indrizs da schelentar, d’aria cundiziunada u da pumpas a chalur
Furmaziun en scola
1 di l'emna a la scola professiunala
Roms professiunals
- construir conducts da bischens e montar cumponentas
- installar, mantegnair e dismetter indrizs da schelentar
- garantir la segirezza da la lavur, la protecziun da la sanadad, la protecziun da l’ambient, il mantegniment da la valur e la tgira
Curs ordaifer il manaschi
Emprender ed exercitar a moda pratica la basa professiunala
Maturitad professiunala
Fitg bunas prestaziuns da scola permettan da frequentar la scola da maturitad professiunala durant la furmaziun da basa.
Diplom
Attestat federal da qualificaziun "montader / montadra d’indrizs da schelentar AFQ"
Premissas
Furmaziun preliminara
- scola populara terminada
- bunas prestaziuns en matematica e fisica
Pretensiuns
- inschign manual
- enclegientscha pratica
- enclegientscha tecnica
- sanadad robusta e movibladad corporala
- autonomia ed abilitad d’organisar
- abilitad da lavurar en in team
- interess da process fisicals
Furmaziun supplementara
Curs
purschidas da scolas spezialisadas e professiunalas, d’associaziuns sco era da manaschis da furniziun da la branscha d’indrizs da schelentar
Furmaziun da basa scursanida
en ina professiun parentada, p.ex. planisader / planisadra d’indrizs da schelentar AFQ
Examen professiunal (EP)
schefmontader / schefmontadra d’indrizs da schelentar cun certificat professiunal federal, manader / manadra da project tecnica d’edifizis cun certificat professiunal federal, cussegliader energetic / cussegliadra energetica edifizis cun certificat professiunal federal
Scola spezialisada superiura (SSS)
tecnicist diplomà / tecnicista diplomada SSS tecnica d’edifizis
Scola auta spezialisada (SAS)
Bachelor of Science (SAS) en tecnica d’edifizis
Cundiziuns da lavur
Montaders d’indrizs da schelentar lavuran en in manaschi da la branscha d’indrizs da schelentar. I sa tracta oravant tut da manaschis pitschens e mesauns cun ca. 7 - 9 collavuraturs. Ulteriuras plazzas porschan firmas industrialas e commerzialas, nua che montaders d’indrizs da schelentar lavuran en il servetsch extern, en la vendita u sco disponents.
Ulteriuras infurmaziuns
Uniun svizra per la frigotecnica SVK
Secretariat
Eichistr. 1
6055 Alpnach Dorf
Tel: 041 670 30 45
URL: www.svk.ch
Revistas professiunalas:
"Spektrum der Gebäudetechnik"
"HK-Gebäudetechnik"
"Friscaldo"