Lavurs
Tapezaders-decoraturs endrizzan locals interiurs ed exteriurs d'edifizis moderns ed istorics. Cun inschign manual ed in sentiment per l'estetica realiseschan els projects en las spartas da mobiglias, palantschieus, paraids e palantschieus sura. Cun lur lavur procuran els per in’atmosfera agreabla ed empernaivla en ils locals d’abitar e da commerzi.
Cun sumbrivals e sistems da sumbrivals, elements da decoraziun, tapetas, lampas decoreschan, renoveschan e persunaliseschan las tapezadras-decoraturas l'ambient en stanzas d'abitar e da lavur. Ils elements da decoraziun installeschan ellas sezzas.
Tapezaders-decoraturs pulstreschan mobiglias e surtiran ellas cun differents materials. Els pulstreschan ils elements tenor la moda classica. Els preparan la mobiglia per pulstrar, fabritgeschan il sistem da plima, lian las plimas d'atschal exactamain e cuvran ellas cun ina taila da plimas. Cun differents materials dattan els la furma al pulstrà.
Tapezadras-decoraturas mettan tarpuns e palantschieus. Durant ch'ellas prendan davent ils vegls palantschieus fan ellas stim sin privels pussaivels d'asbest e prendan las mesiras necessarias, sch'i fa da basegn. Tut tenor necessitad allontaneschan ellas restanzas cun glimar u fresar. Ellas preparan ils palantschieus da basa e nivelleschan els en cas da malgulivezza.
Tapezaders-decoraturs lavuran directamain cun clientella, architects, architects d'interiurs, mastergnants ed ulteriurs partenaris. Els furneschan mobiglias u parts da mobiglias a lur clientella. Per il transport e la montascha preparan els ils meds da transport ed ils guaffens dretgs. Cura ch'els portan las mobiglias en ils locals miran els da na betg donnegiar l'endrizzament. Ils locals laschan els enavos intactamain.
La gronda part da las lavurs vegn preparada ed exequida en l’atelier. En il local da commerzi cusseglian tapezadras-decoraturas la clientella areguard las pussaivladads da concepziun e la tscherna dal material. Per far mesiraziuns e lavurs da montascha van ellas tar lur clientella a chasa u al plaz da lavur.
Scolaziun
Basa legala
Ordinaziun federala 30-8-2019
Durada
4 onns
Furmaziun en la pratica
En ina interpresa per decoraziun d’interiurs u ina interpresa da tapezaders-decoraturs
Furmaziun en scola
In di l'emna a la scola professiunala
Roms professiunals
- Pulstrar
- Installar sumbrivals u sistems da sumbrivals
- Metter palantschieus textils
- Surtrair u cuvrir surfatschas cun differents materials
- Montar mobiglias u objects
- Communitgar e documentar
- Segirezza da lavur, protecziun da la sanadad e da l'ambient
Curs ordaifer il manaschi
emprender ed exercitar a moda pratica las basas professiunalas
Maturitad professiunala
Fitg bunas prestaziuns da scola permettan da frequentar la scola da maturitad professiunala durant la furmaziun da basa.
Diplom
Attestat federal da qualificaziun "tapezader-decoratur / tapezadra-decoratura AFQ"
Premissas
Furmaziun preliminara
- scola obligatorica terminada cun pretensius mesaunas u autas
- bunas prestaziuns en quints e geometria
Pretensiuns
- inschign manual
- chapientscha tecnica
- imaginaziun dal spazi
- senn per l'estetica
- chapientscha per materials decorativs, cun stil e da gronda valur
- moda da lavurar exacta
- lavurar independentamain e surprender atgna responsabladad
- abilitad da lavurar en in team
Furmaziun supplementara
Curs
purschidas da scolas spezialisadas e professiunalas, da l’Associaziun interieursuisse sco era da manaschis da furniziun
Examen professiunal (EP)
cun attestat da qualificaziun federal:
- Decoratur / decoratura d'interiurs
- Planisader / planisadra d'indrizs interns
- Creader / creadra da textilias interiuras
- Colurist / colurista
- Concepider artisan / concepidra artisana
Examen professiunal superiur (EPS)
decoratur d’interiurs diplomà / decoratura d’interiurs diplomada
Scola spezialisada superiura (SSS)
studis en champs parentads, p.ex. tecnicist / tecnicista dipl. SSS textil, concepider / concepidra dipl. en design da products SSS u concepider / concepidra dipl. en design da communicaziun visuala SSS
Scola auta spezialisada (SAS)
studis en champs parentads, p.ex. Bachelor of ARTS (SAS) en design da products e design industrial
Cundiziuns da lavur
Tapezaders-decoraturs e tapezadras-decoraturas exequeschan lur mastergn oravant tut en manaschis pitschens e mesauns. Els lavuran tant en il lavuratori sco er en ils locals d'abitar u da lavurar da la clientella.
Ulteriuras infurmaziuns
ODA Raumausstattung Schweiz
c/o interieursuisse
Eichholzstr. 11
Chascha postala 428
2545 Selzach
Tel: +41 32 641 66 10
URL: www.raumausstattung-schweiz.ch