Lavurs
Manaschis da scrinarias sa differenzieschan tenor lur spezialisaziun. Intgins fabritgan oravant tut mobiglias u cuschinas, auters construeschan ischs e fanestras u saneschan edifizis vegls da lain. Ulteriuras scrinarias produceschan rodas da lain e charrins u construeschan skis. A basa da quests products multifars vegnan differenziadas quatter direcziuns: mobiglias e construcziun d'interiurs, construcziun e fanestras, roder sco er construcziun da skis.
Scrinaris da la direcziun mobiglias e construcziun d’interiurs fabritgan mobiglias singulas e construcziuns d’interiurs e monteschan quellas. Latiers tutgan maisas, stgaffas e corpus, indrizs da cuschinas, portas internassco er tavlegiada e cuvrida da palantschieus sura.
Scrinarias da la direcziun construcziun e fanestras produceschan ischs exteriurs, fanestras, barcuns e cucheras e monteschan quels sin il plazzal. Er tractaments per conservar il lain e la montascha da vaiders da fanestra tutgan tar lur mastergn.
Scrinaris da la direcziun roder construeschan e reparan parts da lain da vehichels sco rodas cun fis u timuns, carossarias da lain, charrins sco er gieus ed urdains da sport sco scarsolas u stgaleras. Els produceschan utensils per il puresser e per il tegnairchasa, p.ex. mobiglias da curtin e stgalas.
Scrinarias da la direcziun construcziun da skis produceschan e vendan skis e snowboards. Ellas enconuschan bain tut ils materials per construir skis: lain, materia sintetica, metal e fibra da vaider. Ultra da quai fresan e tiran ellas si ils urs, vernischeschan las surfatschas ed exequeschan lavurs da service.
Scrinaris da tut las direcziuns èn capabels da construir in toc tenor plan. Quests plans vegnan per part dissegnads dad els sezs, a maun u al computer cun CAD. Els decidan tge med da producziun ch'els utiliseschan. Sper laina massiva vegn era lavurà cun lain cruschà, plattas cumprimidas e plattas da fibras, materia sintetica e metals. Els taglian, splanan, foran, fresan e gliman vi da grondas maschinas staziunaras e vi da maisas d’elavuraziun CNC dirigidas dal computer. La finala monteschan els las parts da construcziun ed installeschan quellas per lur clientella. Els enconuschan las lavurs da furnier e da surtratga sco er il tractament da la surfatscha. Scrinaris e scrinarias cusseglian clientas e clients ed exequeschan lavurs da service e da reparatura sche giavischà. Durant lur lavur fan els stim da la protecziun da l'ambient, la segirezza da lavur e da la prevenziun d'accidents.
Scolaziun
Basa legala
Ordinaziun federala dals 14-8-2013 (versiun dal 1-1-2018)
Durada
4 onns
Direcziuns
- Mobiglias/construcziun d’interiurs
- Construcziun/fanestras
- Roder
- Construcziun da skis
Furmaziun en la pratica
En ina scrinaria u en in lavuratori d’emprendissadi* (Basilea, Berna, Hausen am Albis, Turitg, Samedan)
Furmaziun en scola
1 di per emna a la scola professiunala
Roms professiunals
- preparar e planisar
- construir e montar
Curs ordaifer il manaschi
Emprender ed exercitar a moda pratica la basa professiunala
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Attestat federal da qualificaziun "scrinari / scrinaria AFQ"
Premissas
Furmaziun preliminara
- scola populara terminada
Pretensiuns
- inschign manual
- enclegientscha tecnica
- imaginaziun dal spazi
- dun da dissegnar
- patratgar logic
- moda da lavur exacta
- movibilitad corporala
- senn per estetica
- buna sanadad (naginas allergias da pulvra e chemicalias)
Furmaziun supplementara
Curs
purschidas da scolas spezialisadas e professiunalas sco era da l’Associaziun svizra dals maisters scrinaris e fabricants da mobiglias (ASSFM)
Furmaziun da basa scursanida
p.ex. lainari / lainaria AFQ, dissegnader / dissegnadra AFQ (direcziun d’architectura d’interiurs)
Diplom da l’associaziun ASSFM
spezialist / spezialista da producziun ASSFM
Examen professiunal (EP)
manader / manadra da project scrinaria cun certificat professiunal federal, manader / manadra da producziun cun certificat professiunal federal
Examen professiunal superiur (EPS)
maister scrinari / maistra scrinaria
Scola spezialisada superiura (SSS)
tecnicist / tecnicista dipl. SSS en tecnica da laina, approfundaziun scrinaria
Scola auta spezialisada (SAS)
Bachelor of Science (SAS) en tecnica da laina u Bachelor of Science (SAS) en architectura d’interiurs
Cundiziuns da lavur
Scrinarias èn dependentas da la situaziun da lavur da las interpresas da construcziun. Las schanzas sin il martgà da lavur per ils scrinaris e las scrinarias AFQ èn bunas, spezialmain suenter avair terminà ina furmaziun supplementara professiunala.
Mo paucs manaschis porschan las duas direcziuns d’emprendissadi construcziun da skis e roder.
Ulteriuras infurmaziuns
l’Associaziun svizra dals maisters scrinaris e fabricants da mobiglias (ASSFM)
Gladbachstr. 80
Postfach
8044 Zürich
Tel: 044 267 81 00
URL: www.schreiner.ch
LBB Lehrbetriebe Basel
Nonnenweg 68
4012 Basel
Tel: 061 295 24 24
URL: www.lbb.info
Technische Fachschule Bern
Lorrainestr. 3
3013 Bern
Tel: 031 337 37 37
URL: www.tfbern.ch
Lavuratori d’emprendissadi engiadinais per scrinaris e scrinarias
7503 Samedan
Tel: 081 851 09 90
URL: www.lehrwerkstatt.ch
LWZ Lehrwerkstätte für Möbelschreiner
Gerechtigkeitsgasse 12
8001 Zürich
Tel: 044 287 22 00
URL: www.lwz.ch
Albisbrunn
8915 Hausen am Albis
URL: www.albisbrunn.ch
Revistas professiunalas:
URL: www.schreinerzeitung.ch