Lavurs
Cun lur lavur dattan tschentapalantschieus-tschentaparchets a las stanzas funcziunalitad e confort. Els tschentan a moda professiunala palantschieus e parchets en abitaziuns, biros, locals da negozis, hotels, ospitals, staziuns, hallas da sport, hallas d’industria euv.
Tschentapalantschieus-tschentaparchets spezialisads sin parchets tschentan parchets e palantschieus da corc e laminat. Els enconuschan las differentas sorts da laina ed enconuschan fitg bain diversas tecnicas da tschentar palantschieus. Blers palantschieus da lain èn products d’industria che ston mo vegnir tschentads. Tschentapalantschieus-tschentaparchets fabritgeschan er sezs palantschieus da lain. Els assorteschan las tavlas da lain tenor colur e mascheraziun, las taglian e tschentan. Per finir vegn la surfatscha tractada: mular, dar ieli u sigillar. Els renoveschan er vegls e custaivels palantschieus da parchet.
Tschentapalantschieus-tschentaparchets spezialisads sin palantschieus textils ed elastics mettan tarpuns, palantschieus da PVC, da linoleum, da corc e da cautschuc. Avant che tschentar ils palantschieus exequeschan els las lavurs preparatoricas necessarias: prender la mesira da las stanzas, examinar il fundament, tagliar il material e glimar il fund. Per ch’il nov palantschieu tatgia bain vi dal funs grundà, vegn il funs anc gulivà cun massa da spategliar. Uschè prest che quella è dira, stritgan ils tschentapalantschieus-tschentaparchets il funs cun cola e mettan sisur las sdrimas tagliadas. Els pressegian il nov palantschieu cun ina splattitscha e guardan uschia per ina cusadira netta e quasi invisibla tranter las sdrimas. Tar renovaziuns e reconstrucziuns han ils tschentapalantschieus-tschentaparchets natiralmain er da strair or ils vegls palantschieus. Tut tenor manaschi surpiglian tschentapalantschieus-tschentaparchets spezialisads sin questa lavur er da far reparaturas e lavurs da nettegiar.
Ulteriuras lavurs dals tschentapalantschieus-tschentaparchets èn: montar piedestals sintetics e lattas da lain, metter profils da conclusiun e glischneras, far lavurs da reparatura e mantegniment sco er cussegliar la clientella davart la tgira da palantschieus.
Tschentapalantschieus-tschentaparchets enconuschan mesiras per evitar accidents sin ils plazzals. Cunquai che lur lavur vegn per gronda part exequida en schanuglias, portan els in paraschanugl. Cunter pulvra e canera sa protegian els cun ina mascra e cun ina protecziun da l’udida.
Scolaziun
Basa legala
Ordinaziun federala 16-12-2011
Durada
3 onns
Direcziuns
- palantschieus textils ed elastics
- parchets
Furmaziun en la pratica
En in manaschi spezialisà da palantschieus e/u da parchet u en in manaschi da decoraziun d’interiurs
Furmaziun en scola
1 di per emna a la scola professiunala
Roms professiunals
preparar, mesirar, controllar, tschentar palantschieus e parchets
Curs ordaifer il manaschi
emprender ed exercitar las basas professiunalas a moda pratica
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Attestat federal da qualificaziun "tschentapalantschieus-tschentaparchets AFQ"
Premissas
Furmaziun preliminara
- scola populara terminada
Pretensiuns
- inschign manual
- imaginaziun dal spazi
- constituziun robusta
- sanadad robusta
- movibilitad corporala
- buna demananza
Furmaziun supplementara
Curs
purschidas da scolas spezialisadas e professiunalas sco er da l’associaziun BodenSchweiz e da l’associaziun interieursuisse
Scolaziun da basa scursanida
furmaziun supplementara dad 1 onn en l’autra direcziun da professiun (palantschieus textils u elastics resp. parchets)
Examinaziun da la federaziun
manader / manadra da team dal plazzal
Examen professiunal (EP)
cun certificat professiunal federal p.ex. schef tschentaplattas / scheffa tschentaplattas, cussegliader / cussegliadra da palantschieus
Examen professiunal superiur (EPS)
maister tschentaplattas / maistra tschentaplattas
Scola spezialisada superiura (SSS)
curs da furmaziun en direcziuns spezialas parentadas, p.ex. tecnicher / tecnicra dipl. SSS surveglianza da construcziun, approfundaziun architectura d’interiurs
Scola auta spezialisada (SAS)
studis en direcziuns spezialas parentadas, p.ex. Bachelor of Arts (SAS) en architectura d’interiurs
Cundiziuns da lavur
Tschentapalantschieus-tschentaparchets lavuran oravant tut en manaschis spezialisads da palantschieus e/u da parchet sco er en manaschis da decoraziun d’interiurs. La plipart da questas interpresas industrialas fan palantschieus textils ed elastics sco er palantschieus da lain.
Pussaivladads d’engaschament datti er tar interpresas commerzialas, nua che tschentapalantschieus-tschentaparchets lavuran sco cussegliaders tecnics u sco disponents.
Tschentapalantschieus-tschentaparchets han bunas schanzas sin il martgà da lavur. Cun ina scolaziun da basa scursanida mintgamai en l’autra direcziun megliereschan els lur pussaivladads da lavur.
Ulteriuras infurmaziuns
BodenSchweiz
Industriestr. 23
5036 Oberentfelden
Tel: 062 822 29 40
URL: www.boden-parkettleger.ch
Interessengemeinschaft der Schweiz. Parkett-Industrie ISP
Winterhaldenstr. 14a
Postfach 218
3627 Heimberg
Tel: 033 438 06 40
URL: www.parkett-verband.ch
Revista professiunala:
"BodenSchweiz"