Lavurs
Spezialists e spezialistas d’autos exequeschan independentamain lavurs da service e da reparaturas. En la domena da l’electrica dals vehichels fan els simplas reparaturas.
Per il service ed il mantegniment controlleschan ils spezialists d’autos las differentas cumponentas dal motor, dal propulsader e dal schassis. Els dovran computers ed electronica per pudair mesirar e suttametter ils autos ad in test. Els controlleschan per exempel la suspensiun da las rodas, l’aviader ed ils frains, examineschan las battarias e chargian ellas, sch’igl è necessari. Els midan l’ieli e remplazzan ils pneus isads. Els tgiran e controlleschan l’illuminaziun, l’indriz d’aria cundiziunada, ils sistems da sfradentar, d’aviar ed d’injecziun. Els reguleschan il manischadi ed ils ventils. Ultra da quai èn els responsabels per mesirar la svapur. Tar ils vehichels utilitars controlleschan e tgiran els supplementarmain ils indrizs da cupitgar, da plunar e da chargiar u ils chars annexs.
Ils tocs defects vegnan remplazzads durant las lavurs da reparatura. Spezialistas d’autos demonteschan entirs indrizs u parts da lezs. Els midan p.ex. l’accuplament, il sistem da tracziun u il mecanissem e monteschan novs sbufs. Per far quellas lavurs stattan a disposiziun guaffens simpels ed indrizs sco punts idraulicas. Metals vegnan resgiads, furads, lutegiads e tagliads cun crennadiras etc.
Cunquai che vehichels moderns èn fitg cumplexs, ston ils spezialists d’autos sa profundar en documents tecnics ed en skizzas e resguardar plans da montascha. Els èn capabels d’interpretar e d’utilisar quests documents. Perquai ch’ina pitschna inexactezza po manar tar accidents ston els lavurar a moda exacta e concentrada. Els resguardan rigurusamain las prescripziuns da segirtad e da protecziun da la sanadad.
Ultra da quai cusseglian ils spezialists d’autos la clientella, els magasineschan, administreschan e dismettan a moda ecologica benzin ed auters carburants.
Scolaziun
Basa legala
Ordinaziun federala 20-12-2006
Durada
3 onns
Direcziuns
- autos da persunas
- vehichels utilitars
Furmaziun en la pratica
En ina garascha per autos da persunas u per vehichels utilitars
Furmaziun en scola
durant l’emprim onn d’emprendissadi 1½ dis, a partir dal 2. onn d’emprendissadi 1 di per emna a la scola professiunala
Roms professiunals
- quint / fisica
- electrotecnica
- enconuschientscha da la materia / tecnologia da fabricaziun
- communicaziun / servetsch da clientella
- infurmaziuns tecnicas
- prescripziuns
- informatica
- electrica / electronica
- motor
- propulsader
- schassis
Curs ordaifer il manaschi
Tar differents temas
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Examen dad ir cun auto
Emprendists fan l’examen dad ir cun auto da persunas, resp. vehichels utilitars.
Diplom
Attestat federal da qualificaziun "spezialist / spezialista d’autos AFQ"
Premissas
Furmaziun preliminara
- scola populara terminada
- test da qualificaziun AGVS
Pretensiuns
- fitg buna enclegientscha tecnica
- inschign manual
- patratgar logic
- moda da lavur exacta e precisa
- fidadadad ed in senn per responsabladad
- buna demananza (contact cun clientella)
Furmaziun supplementara
Curs
purschidas da l’Uniun professiunala svizra da l'automobil (AGVS) e da scolas professiunalas
Furmaziun da basa scursanida
examen per la segunda direcziun da spezialist d’autos suenter 1 onn pratica en la professiun correspundenta, mecatronist / mecatronista d’automobils AFQ (access en il 3. onn da la furmaziun da basa)
Examen professiunal (EP)
cussegliader / cussegliadra da vendita d'automobils, cussegliader / cussegliadra da servetsch a la clientella en la branscha d'automobils, spezialist / spezialista da pneus, diagnosticher / diagnosticra d'automobils (cun AFQ sco mecatronist / mecatronista d’automobils)
Examen professiunal superiur (EPS)
econom da manaschi diplomà / economa da manaschi diplomada en la branscha d'automobils
Scola spezialisada superiura (SSS)
p.ex. tecnicist diplomà SSS / tecnicista diplomada SSS en construcziun da maschinas, tecnicist diplomà SSS / tecnicista diplomada SSS en electrotecnica
Scola auta spezialisada (SAS)
Bachelor of Science (SAS) en tecnica d'automobils
Cundiziuns da lavur
Spezialists d’autos lavuran en garaschas d’autos da persunas u da vehichels utilitars. Per regla sa spezialiseschan els sin ina marca dad autos.
Spezialists d’autos han per ordinari in temp da lavur reglà e lavuran 5 dis per emna. En manaschis cun agid en cas da panna e servetsch da pichet na vala quai betg.
Las schanzas sin il martgà da lavur per spezialists d’autos motivads èn fitg bunas.
Ulteriuras infurmaziuns
Auto Gewerbe Verband Schweiz (AGVS)
Wölflistr. 5
Postfach 64
3000 Bern 22
Tel: 031 307 15 15
URL: www.agvs.ch
Revista professiunala:
"AutoInside"