Passer au titre

Vernischader industrial / Vernischadra industriala AFQ

Vernischadras industrialas e vernischaders industrials tractan surfatschas da products industrials. Quels èn per exempel or da lain, metal, materia sintetica u vaider. Els nettegian l'object, al gliman, vernischeschan e mettan si inscripziuns.

Lavurs

Vernischaders industrials surtiran surfatschas da tocca da maschinas, d'apparats e d'auters products industrials or da metal, materia sintetica, lain, vaider, palpiri e textilias. Quai protegia ils objects da ruina, donns mecanics e smarschim. Ultra da quai serva la surtratga ad embellir, perfecziunar e mantegnair la valur dals products.

Per cumenzar tractan vernischadras industrialas il material cun differentas tecnicas: ellas nivelleschan las malgulivezzas cun ina spateglia, gliman la surfatscha u lavan ella cun meds per sgrassar. Autras pussaivladads da tractament èn fosfatar, cromatar e sablunar.

Avant che vernischar calculeschan ils vernischaders industrials quant material ch’els basegnan, preparan la rauba ch’els dovran e maschaidan ils tuns da colur. Surfatschas che duain restar senza vernisch vegnan cuvridas cun bindel adesiv, folia da plastic e gumma-stgima. Suenter vegn vernischà. En general fan ins quai cun ina pistola da squittar, mintgatant dentant era cun bagnar u cun stritgar si la vernisch. Tut tenor l’intent d’utilisaziun vegnan ils tocs surtratgs differentas giadas, brischads u survegnan inscripziuns da folias.

Suenter la lavur nettegian ils vernischaders industrialas ils utensils e reutiliseschan resp. dismettan il rument a moda adattada.

Vernischadras industrialas èn adina en contact cun substanzas nuschaivlas e toxicas. Perquai dovran ellas ina mascra da respiraziun, guants ed ina protecziun da l’udida. Plinavant resguardan ellas precisamain las prescripziun da segirezza e da l’ambient sco era las prescripziuns per la protecziun cunter incendis.

Scolaziun

Basa legala

Ordinaziun federala 10-9-2015

Durada

3 onns

Furmaziun en la pratica

En in manaschi da vernischadi e da surtratga u en ina partiziun da vernischadi en in manaschi industrial

Furmaziun en scola

In di l'emna a la scola professiunala per art applitgà a Turitg

Roms professiunals

  • planisar las lavurs e manar simpels discurs da clientella
  • enconuscher il proceder e la tecnica d’applicaziun
  • pudair garantir la persistenza

Curs ordaifer il manaschi

emprender ed exercitar las basas professiunalas a moda pratica

Maturitad professiunala

Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.

Diplom

Attestat federal da qualificaziun "vernischader industrial / vernischadra industriala AFQ"

Premissas

Furmaziun preliminara
  • scola populara terminada
  • fufragnadi (betg obligatoric, vegn dentant giavischà da blers manaschis)
Pretensiuns
  • inschign manual
  • encletga pratica
  • sentiment per colurs
  • nagina tschorvadad da colurs
  • organs da respiraziun sauns, naginas allergias da dissolvents e d'autras chemicalias
  • buna odur
  • fidadadad
  • abilitad da lavurar en in team
  • pazienza e perseveranza

Furmaziun supplementara

Curs

purschidas da scolas spezialisadas e professiunalas sco era da l’Associaziun svizra dals maisters vernischaders SVILM

Examen professiunal (EP)

spezialist / spezialista da vernischadi industrial cun certificat professiunal federal

Examen professiunal superiur (EPS)

p. ex. mainagestiun carossaria

Scola spezialisada superiura (SSS)

p.ex. colurist / colurista d’architectura dipl. SSS

Scola auta spezialisada (SAS)

tecnicist da vernischadi diplomà / tecnicista da vernischadi diplomada a la Scola auta spezialisada per tecnica da vernischar a Stuttgart / D

Cundiziuns da lavur

Vernischaders industrials e vernischadras industrialas lavuran en manaschis da vernischadi e da surtratga u en partiziuns da vernischadi en manaschis industrials.
Vernischaders industrials qualifitgads han bunas schanzas sin il martgà da lavur.

Ulteriuras infurmaziuns

Associaziun svizra dals maisters vernischaders SVILM
c/o Center da cumpetenza KIL
Gotthardstr. 157
6473 Silenen
Tel: 079 914 48 63
URL: www.svilm.ch

Scola professiunala per art applitgà
Medias Furma Colur
Ausstellungsstr. 104
8090 Turitg
Tel: 044 446 97 77
URL: www.medienformfarbe.ch



orientation.ch