Lavurs
Constructurs e constructuras en metal elavureschan projects da la construcziun da metal, d’atschal, da fanestras e da fatschadas. Els construeschan e planiseschan verandas d’enviern, fanestras, ischs, portas, stgalas, tschabargals e construcziuns purtantas per edifizis sco fabricas, stadis da ballape, turs d’ascensurs sco era per fatschadas da metal e da vaider e fatschadas spezialas.
Constructurs en metal elavureschan documents per tut las fasas d’in project, da la preparaziun a la producziun fin a la montascha. Tar tut quai tutgan plans detagliads e documents cun indicaziuns davart las lunghezzas exactas, il dumber e davart la metoda d’elavuraziun. Durant lur calculaziuns resguardan els ils aspects economics, statics ed ils aspects pertutgant la fisica da construcziun sco per exempel l’isolaziun cunter la chalur e l’insonorisaziun.
Avant la planisaziun van constructurs en metal sin il plazzal e mesiran tut a moda exacta cun agid da guaffens da mesirar moderns. Silsuenter dissegnan els ils plans al computer cun programs CAD en 2-D u 3-D. Tar quai resguardan els las normas e prescripziuns. Sin basa da lur lavurs preparativas creeschan els las glistas da material e las glistas da la tocca ed ils documents d’empustaziun. Els èn er responsabels per la cumpra economica da las materialias.
Constructurs en metal lavuran stretgamain ensemen cun experts externs sco ils patruns da construcziun sco era ils architects ed inschigners. I po dar ch’els ston adattar ils documents a lur giavischs da midament. Plinavant èn els il post da contact en il project per ils posts interns, per la producziun e per la montascha.
Cura che edifizis existents ston vegnir renovads, planiseschan constructurs en metal la demontascha e la remontascha. Els empostan il material necessari, contracteschan cun ils furniturs ed administreschan il deposit da material.
En il lavuratori e sin il plazzal controlleschan constructurs en metal regularmain las lavurs fatgas per savair garantir che las mesiras constattan. Ultra da quai exequeschan els controllas posteriuras.
Scolaziun
Basa legala
Ordinaziun federala 20-12-2006
Durada
4 onns
Furmaziun en la pratica
En in biro tecnic d’in manaschi da metal, d’atschal, da fanestras u da fatschadas, cumplettà entras in praticum en in lavuratori ed in praticum da montascha (mintgamai min. 2 mais)
Furmaziun en scola
En l’emprim onn 1 ½ dis, a partir dal 2. onn 1 di per emna a la scola professiunala
Roms professiunals
- economia da manaschi ed organisaziun dal manaschi
- logistica ed economia da material
- ambient e segirezza
- construcziun
- fabricaziun
- montascha
- mantegniment
- tecnica da dissegn
- elavuraziun da plans e projects (tecnica da skizzar e d’illustraziun, organisaziun ed elavuraziun da plans, leger dissegns, illustraziun tenor directivas da dissegn, documents da project)
Curs ordaifer il manaschi
Tar differents temas
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Attestat federal da qualificaziun "constructur / constructura en metal AFQ"
Premissas
Furmaziun preliminara
- scola populara terminada, stgalim mesaun u superiur
- bunas prestaziuns en geometria, algebra, quint e dissegn tecnic
Pretensiuns
- imaginaziun spaziala
- enclegientscha tecnica
- plaschair vi dal quintar e vi dal planisar
- pazienza e perseveranza
- patratgar logic, senn per relaziuns abstractas
- talent d’organisaziun
- abilitad da communitgar
Furmaziun supplementara
Curs
purschidas da scolas professiunalas, scolas spezialisadas superiuras sco era d’associaziuns professiunalas, p.ex. la Schweiz. Metall-Union SMU
Furmaziun da basa scursanida
emprendissadi supplementar sco construider / construidra da metal AFQ (entrada en il 3. onn d’emprendissadi)
Examen professiunal (EP)
constructur / constructura en metal cun certificat federal
Examen professiunal superiur (EPS)
cun diplom federal: manader / manadra da project da construcziun en metal, maister / maistra da construcziun en metal
Scola spezialisada superiura (SSS)
p.ex. tecnicist diplomà / tecnicista diplomada construcziun da metal
Scola auta spezialisada
tar scolaziun preliminara correspundenta, p.ex. Bachelor of Science (SAS) en tecnica da construcziun, direcziun da profundaziun en paraids e mirs exteriurs (a la scola auta a Lucerna – tecnica ed architectura, Horw) u Bachelor of Arts (SAS) en architectura
Cundiziuns da lavur
Constructurs en metal lavuran en biros tecnics da manaschis da la construcziun da metal, d’atschal, da fatschadas e da fanestras. Il pli savens sa tracti da manaschis pitschens u mesauns. Per part porschan era biros d’inschigners u biros da planisaziun plazzas d’emprendissadi. Pervi da las lavurs variantas èn constructurs en metal adina puspè confruntads cun novs pensums. Sco liom tranter posts interns ed externs stattan els plinavant en stretg contact cun differents partenaris.
Constructurs en metal han bunas schanzas sin il martgà da lavur. La branscha è dentant dependenta da la situaziun economica da l’industria da construcziun.
Ulteriuras infurmaziuns
Schweiz. Metall-Union SMU
Metallbau
Seestr. 105
Postfach
8027 Zürich
Tel: 044 285 77 30
URL: www.smu.ch
URL: www.go4metal.ch
Revista professiunala:
"Metall"