Passer au titre

Librarist / Librarista AFQ

Libraristas e librarists èn responsabels per l'acquist e la vendita da cudeschs e medias da tuts geners. La cussegliaziun da la clientella ès centrala.

Lavurs

Libraristas giogan ina rolla centrala sin la fiera da cudeschs. Ellas èn las persunas fidadas dals lecturs e da las lecturas. Lur cussegliaziun cumpiglia la gronda part da lur lavur. Plinavant tgiran ellas bunas relaziuns cun ils furniturs, spezialmain cun las chasas edituras e lur auturas ed auturs.

Las dumondas da la clientella èn multifaras: turists a la tschertga da guids da la citad, studentas che dovran lur litteratura da studis en furma digitala, ina clienta versada en litteratura che giavischa ina recumandaziun davart litteratura svizra actuala u il collectur da manga che ordaina in cudesch ordavant.

Librarists han in bun nas per trends, ina buna savida generala e vastas  enconuschientschas da lur sortiment. La lavur cun catalogs, maschinas da retschertgas e medias socialas en l’internet, sco er la preschentaziun dals cudeschs en la butia e las vitrinas, appartegnan a lur lavurs quotidianas. Plinavant organiseschan las libraristas acziuns ed eveniments per promover la vendita. Latiers valan eveniments cun auturs, preschentaziuns da cudeschs e notgs da raquints.

Librarists èn er responsabels per lavurs mercantilas ed administrativas. Las furniziuns quotidianas controlleschan ellas cun agid dil scrit da furniziun ed ordineschan ils cudeschs en la dretga partiziun. Per far empustaziuns mainan els correspundenza cun ils negoziants, fan quints per la clientella e s'occupan d'auters fatgs da contabilitad.

Libraristas guardan ch'il dumber giavischà da cudeschs stat a disposiziun il dretg mument al lieu correct. Cun savida d'economia da manaschi ed avertadad per novs basegns sviluppeschan els cuntinuadamain vinavant lur sortiment, tgiran relaziuns da clientella existentas ed acquistan novas.

Scolaziun

Basa legala

Ordinaziun federala 14-11-2008

Durada

3 onns resp. 2 onns suenter la matura gimnasiala, la scola media spezialisada u ina furmaziun da basa mercantila

Furmaziun en la pratica

En ina libraria

Furmaziun en scola

En il 1. e 2. onn 2 dis, en il 3. onn 1 di per emna a la scola d’economia e da cader e commerzi a Berna u a la scola d’economia e commerzi a Winterthur

Roms professiunals

  • cussegliaziun e vendita
  • process dal manaschi
  • bibliografia e retschertga
  • objects commerzials
  • litteratura, cultura, scienza
  • tudestg
  • lingua estra (2. lingua naziunala ed englais)
  • economia, politica e societad

Curs ordaifer il manaschi

Emprender ed exercitar a moda pratica la basa professiunala

Maturitad professiunala

Emprendists cun ina recumandaziun per il gimnasi u che han dumagnà in examen d'admissiun, pon frequentar la scola da maturitad professiunala durant la furmaziun da basa.

Entrada laterala

"Branchenwissen Buchhandel": 7 moduls en 17 dis cun certificat SBVV / emprendissadi per correspundenza: "Grundwissen Buchhandel", Francfurt

Diplom

Attestat federal da qualificaziun "librarist / librarista AFQ"

Premissas

Furmaziun preliminara
  • scola populara terminada cun pretensiuns mesaunas u autas
  • È la scola vegnida absolvida sin livel pli bas, permetta la terminaziun d’in 10. onn da scola in’entrada optimala a la furmaziun.
  • La terminaziun d’ina furmaziun da basa commerziala u en la vendita u ina maturitad gimnasiala èn bunas premissas e porschan la pussaivladad d'absolver l'emprendissadi entaifer dus onns.
Pretensiuns
  • interess vi da cudeschs
  • buna furmaziun generala ed interess vi da l’istorgia contemporana
  • plaschair vi dal contact cun la clientella
  • cumportament orientà a la clientella
  • plaschair da far retschertgas
  • bunas enconuschientschas dal tudestg a bucca ed en scrit
  • moda da lavurar exacta
  • buna memoria
  • senn per l’urden
  • buna demananza
  • plaschair vi da la lavur al computer
  • interess vi da lavurs commerzialas

Furmaziun supplementara

Curs

purschidas dal Schweizer Buchhändler- und Verleger-Verband SBVV e da scolas professiunalas u spezialisadas

Spezialisaziun

librarists spezialisadas, antiquariat, commerzi intermediar da cudeschs (grossists da cudeschs), represchentaziun da chasas edituras

Examen professiunal (EP)

cun certificat professiunal federal: librarist / librarista, spezialist / spezialista da commerzi en detagl, spezialist / spezialista da cumpra, spezialist / spezialista da vendita, spezialist / spezialista da marketing, spezialist / spezialista da medias euv.

Examen professiunal superiur (EPS)

manager da commerzi en detagl diplomà / managera da commerzi en detagl diplomada, manader da la cumpra diplomà / manadra da la cumpra diplomada, manader da la vendita diplomà / manadra da la vendita diplomada, manager da medias diplomà / managera da medias diplomada euv.

Scola spezialisada superiura (SSS)

econom da manaschi diplomà / economa da manaschi diplomada SSS, tecnicist diplomà / tecnicista diplomada per economia da medias e management da medias euv.

Scola auta spezialisada (SAS)

Bachelor of Science (SAS) en economia da manaschi, Bachelor of Science (SAS) en inschigneria da medias, Bachelor of Science (SAS) en Information Science

Cundiziuns da lavur

Libraristas e librarists lavuran en affars da cudeschs resp. da multimedia, antiquariats, chasas edituras, centers da distribuziun e bibliotecas. Ils temps da lavur sa drizzan tenor ils temps d’avertura da l’affar. Librarists han pussaivladads diversas per furmaziun supplementara en il sectur d’ediziuns, en il commerzi en detagl u en il commerzi mercantil.

Ulteriuras infurmaziuns

Schweizer Buchhändler- und Verleger-Verband SBVV
Part. Furmaziun (supplementara)
8034 Turitg
Tel: +41 44 421 36 00
URL: www.sbvv.ch

Revista professiunala:
"Schweizer Buchhandel"



orientation.ch