Lavurs
Lur lavurs èn las suandantas:
Preparar cussegliaziuns
- garantir, ch'i funcziunan tut ils chanals da communicaziun e tut las medias digitalas sco moniturs, telefons, e-mails, chats u raits socialas
- preparar discurs da cussegliaziun e metter ensemen infurmaziuns davart products e servetschs, per exempel cumparegliaziuns da prestaziuns u graficas
Cussegliar la clientella
- prender encunter telefons, dumondas e reclamaziuns, controllar ed ordinar quellas tenor impurtanza
- cussegliar ed infurmar las clientas ed ils clients, per exempel davart products, servetschs, cundiziuns generalas da fatschenta e davart l'elavuraziun da datas
- prender encunter empustaziuns, elavurar e concluder contracts
- vesair ils basegns da la clientella, als tadlar attentamain e porscher servetschs adequats
- prender encunter reclamaziuns e proponer bunas soluziuns
- furnir sez servetschs u renviar als posts responsabels
Acquirir nova clientella
- mantegnair la clientella cun purschidas attractivas e cun avantatgs e l'infurmar davart novas chaussas
- pledentar nova clientella sur differents chanals
- planisar e realisar enquistas, evaluar ils resultats e meglierar las purschidas sco er ils servetschs
Organisaziun ed incumbensas administrativas
- evaluar ed analisar ils discurs cun la clientella, per sa meglierar permanentamain
- controllar process e proponer meglieraziuns – per exempel per glistas da controlla, models da discurs sco er models da contracts
- observar las directivas e las prescripziuns legalas davart la segirezza e la protecziun da datas
- registrar, elavurar ed evaluar datas davart la clientella, davart products e servetschs e reunir questas datas en il sistem
Scolaziun
Durada
3 onns
Furmaziun pratica
En in center da servetschs da clientella.
Furmaziun en scola
1 fin 2 dis per emna en la scola professiunala spezialisada.
Roms professiunals
- preparar dialogs cun la clientella
- manar dialogs cun la clientella
- furmar relaziuns cun la clientella
- optimar dialogs cun la clientella
Curs ordaifer il manaschi
emprender, approfundar ed exercitar las basas professiunalas, 16 dis durant 3 onns.
Maturitad professiunala
Sche las prestaziuns da scola èn fitg bunas, pon las emprendistas ed ils emprendists frequentar supplementarmain la scola da maturitad professiunala.
Diplom
Spezialist / Spezialista per il dialog cun la clientella AFQ
Premissas
Furmaziun preliminara
- terminà la scola obligatorica
Pretensiuns
- abilitad da lavurar en in team
- prontezza da lavurar durant uras irregularas u da prestar servetsch da notg
- buna expressiun a bucca
- dun da linguas
- plaschair da vender e da cussegliar
Furmaziun supplementara
Curs
Purschidas da scolas spezialisadas e da scolas professiunalas spezialisadas, da l'Institut svizzer per la scolaziun d'interprendiders SIU, siu.ch, sco er da la Societad svizra d'emploiads da commerzi, kvmv.ch.
Examen professiunal (EP)
Cun attestat professiunal federal, per exempel:
- Spezialist / Spezialista per manar ina gruppa
- Spezialist / Spezialista da marketing
- Spezialist / Spezialista da vendita
- Spezialist / Spezialista dal e-commerce
Examen professiunal superiur (EPS)
Per exempel Directur / Directura da marketing dipl.
Scola spezialisada superiura (SSS)
Studis en secturs spezialisads parentads, per exempel Econom / Economa da manaschi SSS u Manager / Managera da marketing dipl. SSS
Scola auta spezialisada (SAS)
Studis en secturs parentads, per exempel bachelor of
science en economia da manaschi. Tut tenor la scola auta spezialisada valan differentas cundiziuns d'admissiun.
Cundiziuns da lavur
Spezialistas e spezialists per il dialog cun la clientella lavuran en centers da servetsch da clientella, er numnads callcenters. Ellas ed els lavuran sut grond squitsch da temp e ston dumagnar discurs difficils. Tut tenor l'interpresa respundan ellas ed els er dumondas d'auters collavuraturs, per exempel en helpdesks. Lavurs da fin d'emna poi dar tut tenor manaschi.
Spezialistas e spezialists per il dialog cun la clientella han bunas perspectivas professiunalas en secturs sco vendita, marketing u communicaziun. Ellas ed els pon lavurar en differentas interpresas sco bancas, assicuranzas, purschiders da telecommunicaziun, servetschs publics u gronds negozis. La gronda part da las interpresas grondas mainan agens callcenters. En Svizra èsi in grond avantatg, sch'ins sa pliras linguas naziunalas ed englais. Suenter in'experientscha professiunala da plirs onns pon spezialistas e spezialists per il dialog cun la clientella surpigliar incumbensas da responsabladad, per exempel sco manader da team en il servetsch da clientella, sco instructura u manadra d'in center da servetschs a la clientella.
Ulteriuras infurmaziuns
AURIS
8045 Zürich
URL: www.auris.swiss/