Lavurs
Or d’atschal, mesch ed auter material fan lavurants e lavurantas d’uras parts d’uras pitschnas. Era ils utensils ch’els dovran per lur lavur fan els sezs. Quai èn per exempel tirastruvas e pincettas. Els gliman, furan e fresan. Els storschan fitg pitschnas parts, taglian crennadiras e puleschan surfatschas.
Cunquai che las parts da l’ura èn fitg pitschnas, ston ils lavurants d’uras lavurar a moda fitg exacta. Els fan las parts da l’ura ed ils utensils a maun u cun la maschina. Els resguardan las instrucziuns dal schef dal lavuratori e fan lur incumbensas autonomamain. Savens lavuran els en il team.
Lavurants d’uras spezialisads sin metter ensemen mettan ensemen simplas uras mecanicas ed electronicas. Els mettan mecanissems da l’ura en la chascha da l’ura e tschentan lantschettas e plats da l’ura u indicaziuns digitalas. Suenter monteschan els ils bratschlets da l’ura. A la fin controlleschan els, schebain l’ura è impermeabla.
Cun differents proceders mettan lavurants d’uras spezialisads sin reglar en funcziun l’ura. Suenter controlleschan els cun meds da mesiraziun, schebain l’ura funcziuna correctamain.
Lavurants d’uras tgiran lur equipament. Ils utensils e las maschinas duvrads nettegian e mantegnan els. Durant ils differents pass da lavur dovran els las maschinas tenor las prescripziuns dal manaschi e da la branscha. Els resguardan las prescripziuns da la segirezza da la lavur sco er da la protecziun da la sanadad e da l’ambient.
Scolaziun
Basa legala
Ordinaziun federala approvada 10-2-2015
Durada
2 onns
Accents
- metter ensemen
- reglar
Furmaziun en la pratica
En in manaschi da l’industria d’uras
Furmaziun en scola
1 di per emna a la scola professiunala Tag ZeitZentrum a Grenchen
Roms professiunals
- fabritgar apparats specifics per la branscha
- metter ensemen tocs singuls (inclusiv: instrucziun tenor accent ed applicaziun da las directivas areguard segirezza da la lavur, protecziun da la sanadad e da l’ambient)
- garantir ils standards da producziun
Curs ordaifer il manaschi
Tar differents temas
Diplom
Attest federal professiunal "lavurant / lavuranta d’uras AFP"
Premissas
Furmaziun preliminara
- scola populara terminada
- bunas prestaziuns en matematica
Pretensiuns
- mauns ruassaivels ed inschignaivels per lavurar a moda conscienziusa
- abilitad da leger endretg plans e da s’imaginar chaussas en il spazi
- enclegientscha tecnica
- pazienza e perseveranza
- vesida normala
Furmaziun supplementara
Curs
purschidas da la federaziun dals patruns da l’industria svizra d’uras e da scolas spezialisadas da la branscha d’uras
Urer / Urera da producziun AFQ
lavurants / lavurantas d’uras pon cun qualificaziun e furmaziun preliminara suffizienta frequentar ina furmaziun da basa scursanida sco urer / urera producziun AFQ (access al 2. onn da furmaziun da basa).
Cundiziuns da lavur
Lavurants d’uras lavuran en manaschis da l’industria d’uras. Plazzas d’emprendissadi datti surtut en las regiuns dad uras tranter Genevra e Schaffusa.
Ulteriuras infurmaziuns
ZeitZentrum Uhrmacherschule Grenchen
Sportstr. 2
2540 Grenchen
Tel: 032 654 27 00
URL: www.bbzsogr.so.ch
Arbeitgeberverband der schweiz. Uhrenindustrie
Avenue Léopold-Robert 65
Postfach
2301 La Chaux-de-Fonds
Tel: 032 910 03 83
URL: www.cpih.ch