Passer au titre

Manader / Manadra d'implants AFQ

Manaders e manadras d'implants utiliseschan e surveglian indrizs da producziun e d’emballadi. Els elimineschan pannas e disturbis u exequeschan pitschnas lavurs da reparatura.

Lavurs

Manaders d'implants lavuran en differents manaschis industrials, sco p.ex. en l’industria da victualias, chemia, farma, biotecnologia, da materias sinteticas, d’uras e da maschinas. Els manevreschan e surveglian ils implants da producziun e d’emballadi che produceschan ed emballeschan ils products producids en gronds dumbers. La paletta da products è fitg vasta e tanscha da bavrondas e medicaments sur mecanissems da l’ura fin a tocca da maschinas.

Manadras d'implants planiseschan l’andament da la producziun tenor l’incumbensa. Cun endrizzar e midar ils implants a moda professiunala garanteschan els il pli aut grad d’utilisaziun pussaivel e procuran per la pli gronda productivitad. Els èn responsabels per la qualitad da la producziun da serias e procuran ch’ils products correspundan a las prescripziuns ed als giavischs da la clientella. En cas da basegn adatteschan els ils implants. Ils products ston per exempel vegnir emballads bain e la data da la vendita e da scadenza sto vegnir inditgada correctamain.

Il process da producziun surveglian ils manaders d'implants a moda precisa. En cas da disturbis e pannas intervegnan ils manaders d'implants spert e cun clera finamira. Sch’els constateschan deviaziuns, vegnan quellas curregidas. Pitschnas reparaturas e mantegniments fan ils manaders d'implants sezs, uschia che la producziun po cuntinuar. Grazia a lur  enconuschientschas da la pneumatica, da l’electrotecnica e da la mecanica san els exact co las maschinas funcziunan.

Durant la lavur resguardan las manadras d'implants las prescripziuns da segirezza, da la sanadad e da l’ambient. L’igiena è in impurtant factur en bleras branschas, sco p.ex. en la producziun da products farmaceutics e da victualias. Ils manaders d'implants sa tegnan vi da las prescripziuns da la vestgadira da lavur e garanteschan uschia cundiziuns igienicas. Els portan in protegiabucca, in vestgì suren, ina schlappa e guants.

Per ordinari lavuran las manadras d'implants en in team: en blers manaschis èn las lingias da producziun ed ils implants en funcziun 24 uras per di e quai set dis per emna. Ellas surveglian per quest motiv las maschinas en squadras.

Scolaziun

Basa legala

Ordinaziun federala 12-12-2008 (versiun dal 1-1-2020)

Durada

3 onns

Furmaziun en la pratica

En in manaschi industrial

Furmaziun en scola

1 di per emna a la scola professiunala u emnas da bloc en ina scola professiunala a Bulle, Cuira, Friburg, Olten u Porrentruy

Roms professiunals

  • lingias d’implants e da producziun
  • producziun ed emballadi
  • garanzia da qualitad
  • economia da manaschi
  • scienza e tecnica, igiena, segirtad da lavur, protecziun da la sanadad, protecziun da l’ambient
  • Curs ordaifer il manaschi

    emprender ed exercitar las basas professiunalas

    Maturitad professiunala

    Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.

    Diplom

    Attestat federal da qualificaziun «manader / manadra d'implants AFQ»

Premissas

Furmaziun preliminara
  • scola populara terminada
Pretensiuns
  • enclegientscha tecnica: enclegientscha da basa per apparats tecnics e process mecanics
  • inschign manual resp. dun pratic
  • moda da lavurar exacta e conscienziusa
  • abilitad da sa concentrar
  • fidadadad e senn per responsabladad
  • dun d’organisar
  • abilitad da lavurar en in team
  • abilitad da supportar squitsch e prontadad da lavurar a temp irregular (lavur en squadras)

Furmaziun supplementara

Curs

purschidas d’associaziuns professiunalas e scolas professiunalas

Spezialisaziun

persuna responsabla per il team da manaders e manadras d'implants, manader da sectur u mainagestiun

Examen professiunal (EP)

cun certificat professiunal federal:
p. ex.
spezialist / spezialista d’automatica
logisticher /logisticra
spezialist/spezialista da logistica
spezialist / spezialista da process
spezialist / spezialista da producziun

Scola spezialisada superiura (SSS)

p. ex.
tecnicist diplomà / tecnicista diplomada SSS construcziun da maschinas
tecnicist diplomà / tecnicista diplomada SSS tecnica da sistems
tecnicist diplomà / tecnicista diplomada SSS process da manaschi

Scola auta spezialisada (SAS)

p. ex. Bachelor of Science (SAS) en tecnica da maschinas, Bachelor of Science (SAS) en tecnica da sistems

Cundiziuns da lavur

Manaders e manadras d'implants lavuran en divers manaschis industrials. Els chattan plazzas en l’industria da farma e da chemia sco era en la branscha da victualias, bavrondas e da la producziun dad uras.

Era interpresas da producziun ord las spartas tecnica, energia, cement, biotecnologia, palpiri ed emballadi porschan numerusas plazzas. La purschida da plazzas d’emprendissadi è perquai gronda.

Grazia a lur vasta furmaziun pon ils manaders d'implants lavurar en differents manaschis. Suenter curt temp d’introducziun en la nova lavur pon els midar la branscha.

Il temp da lavur è savens irregular e cuntegna servetsch da notg e da fins d’emna. Ils manaders d'implants èn cunresponsabels per la productivitad e lavuran savens sut squitsch da temp.

Ulteriuras infurmaziuns

Vereinigung für die Ausbildung von Anlagenführern / Anlagenführerinnen FOMA
3007 Bern
Tel: +41 31 381 64 54
URL: www.foma-oma.ch

Berufsbildungszentrum Olten
Gewerblich-Industrielle Berufsfachschule GIBS
URL: www.bbzolten.so.ch



orientation.ch