En affars spezialisads d’optica vendan optichers ed opticras egliers e lentas da contact. Els porschan era utensils optics sco perspectivs e marellas u instruments da mesirar sco barometers.

Optichers s’infurmeschan l’emprim davart ils giavischs e basegns dals clients. Sa basond sin questas indicaziuns e sin las ordinaziuns (il recept per ils egliers) d’in optometrist SAS, d’in opticher diplomà u d’in oculist preschentan optichers las differentas pussaivladads d’ina correctura. Ultra da quai erueschan els la distanza dals egls e calculeschan las datas necessarias. Tals resultats furman la basa per la fermezza e las caracteristicas dals vaiders d’egliers.

Durant la cussegliaziun da la clientella erueschan optichers il dretg rom dals egliers che va mintgamai a prà cun la furma da la fatscha e cun il tip da la persuna. Els resguardan era aspects che pertutgan la moda e l’estetica. ed explitgan per exempel ils avantatgs ed ils dischavantatgs da tscherts egliers e da lentas da contact. La correctura da la vesida, il diever, il model d’egliers e la grondezza dals vaiders èn decisivs per la tscherna dals vaiders d’egliers. Per la cussegliaziun ston optichers era avair enconuschientschas da l’anatomia, da la fisiologia e da la scienza dals egls.

Optichers retiran ils vaiders per ordinari sco products mezfinids tar ina firma da furniziun. En il atelier mesiran els ils vaiders furnids, als centreschan ed als elavureschan cun automats da mular dirigids dal computer. Lura enchastran els ils vaiders en il rom da metal u da material sintetic. Tar tut quai ston els lavurar a moda exacta ed avair mauns inschignaivels. Suenter adatteschan els ils egliers preparads a la furma da chau dal purtader enfin che lezs sesan bain e permettan ina vesida optimala. Ils optichers explitgan a la clientella l’utilisaziun e la tgira da lentas da contact e d’egliers. Pitschnas correcturas vi dal rom exequeschan els autonomamain.

Optichers empostan differents artitgels e tocs da reserva tar ils furniturs, controlleschan las furniziuns da martganzia e procureschan per ina magasinaziun correcta. Els nodan ils pretschs ed administreschan las datas da furniziun e las datas da la clientella al computer.