Acusticher / Acusticra da sistems d’udida AFQ

Acustichers da sistems d’udida cusseglian clientella che ha differents impediments da l’udida. Els porschan products audiologics ch’èn adattads individualmain e megliereschan uschia la prestaziun ed il confort d’udida. Tar quests products tutgan – sper ils sistems d’udida (apparats d'udida) ed ils accessoris – er ils products da la protecziun da l’udida ed ulteriurs servetschs sco trenament da l’udida e cussegliaziun da tinnitus.

L’emprim erueschan acusticras da sistems d’udida en il discurs cun la clienta ses basegns d’udida individuals. Latiers sclereschan ellas las experientschas fatgas cun ils sistems d’udida sco er las circumstanzas da vita e las disas da la clienta. Silsuenter controllan ellas la conchiglia da l’ureglia, il chanal da l’udida ed il schumber.

Cun agid da dumondas e da differents tests erueschan acustichers da sistems d’udida la perdita da l’udida dal client. Cun apparats da mesirar electronics fan els mesiraziuns precisas da l’udida. Silsuenter adattan els u ils sistems d’udida standardisads u preparan ina furma da silicon da l’ureglia dal client e fan or da quella in toc adattà per l’ureglia (otoplastica). Èn il sistem d’udida e l’otoplastica pronts, fan els cun agid d’in program da computer la regulaziun da precisiun. Cunquai che quella procedura dura in temp, adattan ils spezialists ils sistems d’udida en pliras sesidas. Ultra da quai decleran els al client la furma da l’impediment d’udida, raschuns pussaivlas e las consequenzas per la qualitad da viver. Els al mussan co ch’ils apparats funcziunan e co ch’el po als nettegiar ed els infurmeschan davart ulteriurs meds d’agid e davart las prestaziuns d'assicuranza.

Acusticras da sistems d’udida stattan en contact cun las assicuranzas socialas e cun ils medis d’ureglias. Tut tenor basegn scrivan ellas rapports, fan la documentaziun interna ed enconuschan las differentas disposiziuns dal dretg da las assicuranzas socialas.

Tar tut ils pass da l’adattaziun dal sistem d’udida dovran ils spezialists lur enconuschientschas davart l’anatomia, la patologia, la fisiologia, la psicologia e l’acustica. Cunquai che las tecnicas da mesiraziun e la programmaziun da sistems d’udida vegnan dirigidas sur soluziuns da software, è il computer in instrument da lavur impurtant.

Acustichers da sistems d'udida tgiran e concepeschan ils locals da vendita. Els percorschan privels al plaz da lavur e procuran per la segirtad da lavur sco er per la protecziun da la sanadad e da l'ambient.