Elavuratur / Elavuratura da lain AFP

Elavuraturas ed elavuraturs da lain lavuran en interpresas da la construcziun en lain u da l’industria da lain. Els elavuran la materia prima lain a fabricats ed elements da construcziun. En questa furmaziun da basa vegn differenzià tranter ils dus accents da scolaziun industria resp. manaschi e construcziun. Tut tenor l'accent elegì sa differenzieschan las lavurs.

Elavuraturs da lain cun l'accent industria lavuran en manaschis da splanar, manaschis per elements prefabritgads u resgias. Cun agid da maschinas grondas fan els per exempel or da bists travs, aissas u lattas da differenta lunghezza, ladezza e furma. Els pacheteschan ils fabricats da lain tenor incumbensa, als magasineschan ed als transportan a moda professiunala.

Elavuraturs da lain cun accent manaschi e construcziun lavuran per exempel en manaschis da construcziun en lain u lainarias. Els sustegnan teams che produceschan entiras construcziuns or da travs, aissas u lattas. Els gidan era da montar ils elements da lain sin il plazzal e d'eriger ils tetgals.

Elavuraturs da lain lavuran cun maschinas ed utensils a maun u maschinas staziunaras, e quai a moda segira ed effizienta. Maschinas staziunaras èn per exempel maschinas da splanar, resgias radundas, maschinas da stgavorgiar u resgias circularas. Tar las maschinas ed ils utensils a maun tutgan p.ex. resgias a motor, fresas a maun e maschinas da mular.

Durant la lavur resguardan elavuraturs da lain las prescripziuns da la protecziun da l’ambient, da la protecziun da la sanadad, da la segirezza da la lavur e da la prevenziun d’incendis. Els enconuschan ils privels en lur professiun e protegian sasez e lur collavuraturs cun resguardar las prescripziuns da segirezza, cun prender mesiras en connex cun la prevenziun d’incendis e cun purtar l’equipament da protecziun persunal.