Lavurs
Stuccaturs e construiders da materialias sitgas e stuccaturas e construidras da materialias sitgas surtiran paraids, palantschieus e fatschadas exteriuras cun maulta. Els dovran latiers adina pli savens maschinas modernas. La maulta furnida vegn maschadada en la maschina e transportada en uders al lieu d’acziun. Cun aria cumprimida vegn ella squittada sin palantschieus e paraids e lura stritgada ora cun la rischit, enfin ch’i dat ina surfatscha guliva. Questa metoda pretenda lavur da team.
La liadira da surfatscha è l’ultima stresa da liadira ed ha ina funcziun decorativa. Stuccaturs e construiders da materialias sitgas decidan davart colur e structura da la surfatscha e dattan uschia ina fatscha a la stanza u al bajetg.
Stuccaturs e construiders da materialias sitgas construeschan er cuvridas da palantschieus sura e da paraids, spartidas e palantschieus da basa. Quests construeschan els en construcziun a sitg, quai vul dir tras tschentar plattas da gip prefabritgadas. Ina cuvrida da palantschieu sura distatgada zuppa per exempel conducts vi dal palantschieu, ch’ins na duai betg vesair.
Stuccaturs e construiders da materialias sitgas mettan er isolaziuns cunter la chalur, isolaziuns cunter la canera e protecziuns cunter incendis. Mintgatant sa participeschan els er vi da la renovaziun da baselgias veglias e chasas sut protecziun. Els renoveschan decoraziuns da gip, uschenumnadas stuccaturas, u orneschan fatschadas cun structuras da liadira spezialas.
Stuccaturs e construiders da materialias sitgas lavuran sin stabiliments novs, lavuran tar reconstrucziuns da stabiliments e tar renovaziuns e midan savens il lieu da lavur. Els lavuran per part sulets, per gronda part dentant en il team. Grazia a lur bun contact cun la direcziun da construcziun guardan els per in progress da construcziun speditiv.
Tar tut las lavurs resguardan stuccaturs e construiders da materialias sitgas las prescripziuns en connex cun la segirezza da la lavur, la protecziun da la sanadad e la protecziun da l’ambient.
Scolaziun
Basa legala
ordinaziun federala 22-7-2014
Durada
3 onns
Furmaziun en la pratica
En in manaschi da stuccaturs
Furmaziun en scola
Curs da bloc en il center da scolaziun dal Schweiz. Maler und Gipserunter-nehmer-Verbands SMGV a Walli-sellen ZH (per onn d’emprendissadi 10 curs da bloc che duran mintgamai in’emna). Per emprendists ch’abiteschan lunsch davent stattan a disposiziun alloschis.
Roms professiunals
- planisar, preparar e rapportar davart lavurs
- liar giu e crear a moda decorativa
- construir construcziuns a sitg, paraids e palantschieus
- garantir la segirtad da la lavur, segirar la protecziun da la sanadad e da l’ambient
- decorar e crear
Curs ordaifer il manaschi
Emprender ed exercitar a moda pratica la basa professiunala
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Attestat federal da qualificaziun "stuccatur e construider da materialias sitgas / stuccatura e construidra da materialias sitgas AFQ"
Premissas
Furmaziun preliminara
- scola populara terminada
Pretensiuns
- inschign manual
- enclegientscha pratica
- bun’imaginaziun spaziala
- abilitad corporala da supportar squitsch
- senn per furmas
- senza sturnizi
- abilitad da lavurar en in team
- sensori per dumondas da la clientella
Furmaziun supplementara
Curs
purschidas da scolas spezialisadas e professiunalas sco er dal Schweiz. Maler- und Gipserunternehmer-Verbands
Furmaziun da basa scursanida
pictur / pictura AFQ
Diplom da l’associaziun
capolavurer stuccatur e construider da materialias sitgas / capolavurera stuccatura e construider da materialias sitgas ASPS
Examen professiunal (EP)
polier stuccatur e construider da materialias sitgas / poliera stuccatura e construider da materialias sitgas cun certificat professiunal federal, mastergnant / mastergnanta per la tgira da monuments cun certificat professiunal federal, creader / creadra en l’artisanat cun certificat professiunal federal
Examen professiunal superiur (EPS)
maister stuccatur / maistra stuccatura
Scola spezialisada superiura (SSS)
curs da furmaziun en il champ spezial fatgs da construcziun, p.ex. tecnicher / tecnicra dipl. SSS surveglianza da construcziun
Scola auta spezialisada (SAS)
percurs da studi en il champ spezial fatgs da construcziun, p.ex. Bachelor of Science (SAS) en fatgs d’inschigneria da construcziun
Cundiziuns da lavur
Stuccaturs e construiders da materialias sitgas lavuran en manaschis da stuccaturs. I sa tracta per regla da manaschis pitschens u mesauns cun 2 enfin 10 collavuraturs. Suenter la furmaziun supplementara correspundenta san stuccaturs e construiders da materialas sitgas er manar in agen manaschi.
La branscha ha mancanza da glieud da professiun bain qualifitgada. Per quest motiv han stuccaturs e construiders da materialias sitgas bunas schanzas da chattar in lieu da lavur.
Ulteriuras infurmaziuns
Schweiz. Maler- und Gipser-unternehmer-Verband SMGV
Grindelstr. 2
Postfach 73
8304 Wallisellen
Tel: 043 233 49 00
URL: www.gipser-werden.ch
Revista professiunala:
"applica"