Passer au titre

Pumicultur / Pumicultura AFQ

Pumiculturs e pumiculturas cultiveschan gronds plazzaments ed areals da puma e pumaraida. Els tgiran plantas e chaglias, observan la natira e protegian la racolta da fradaglia e da l'aura. Els racoltan, magasineschan e vendan la fritga madira.

Lavurs

Els exequeschan suandantas lavurs:

Tgira culturas da puma
  • cultivar maila e paira, tut tenor regiun e manaschi era tschareschas, primblas, persics u apricosas sco era differentas sorts da pumaraida
  • tagliar plantas e liar si roma
  • montar raits da granella e sustas en cas da basegn
  • allontanar la fritga ch'è d'anvanz
  • sauar, engraschar, e tgirar culturas
  • cultivar persistentamain e resguardar la biodiversitad
  • observar il decurs da la natira per savair reagir sin midads e per na betg avair memia gronda sperdita tar la racolta
  • far stim da la fritgaivladad dal terren, plantar plantas da fructificaziun e masainas
Evitar infestiun da parasits
  • pratitgar effectiva protecziun da plantinas adattà a l'ambient
  • stgaffir cundiziuns da viver per fauna utila ed evitar uschè l'ingestiun da parasits
  • dumbrar ils parasits e la fauna utila sin la feglia e valitar la cundiziun da sanadad da la planta
Racoltar fritgs
  • racoltar la puma cun maschinas ed indrizs
  • zavrar la puma
  • pachetar e magasinar la puma
  • tgirar maschinas ed indris

Scolaziun

Basa legala

Ordinaziun federala 8-5-2008 (versiun dal 1-3-2017)

Durada

3 onns

Furmaziun en la pratica

En almain dus manaschis da pumicultura

Furmaziun en scola

A Strickhof, Lindau
1. + 2. onn: 1 di per emna
3. onn: 2 dis per emna

Roms professiunals

cultivaziun da plantas (cultivar il terren; semnar e plantar, nutrir, tgirar e racoltar puma; magasinar ed elavurar ils products; vender ils products), mecanisaziun ed indrizs tecnics (utilisar cumpetentamein ils materials, installar e mantegnair maschinas ed indrizs, utilisar e mantegnair edifizis e endrizzaments), ambient da lavur, roms d’elecziun

La furmaziun da basa po era vegnir absolvida cun l’accent principal sin la pumicultura biologica.

Curs ordaifer il manaschi

segirtad da lavur e protecziun da la sanadad, igiena e garanzia da la qualitad, diever da vehichels cun indrizs d’auzar e diever d’utensils per proteger las plantas, cultivaziun da plantinas

Maturitad professiunala

Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.

Diplom

Attestat federal da qualificaziun "pumicultur / pumicultura AFQ"

Premissas

Furmaziun preliminara
  • scola populara terminada
  • permiss dad ir cun tractor (sche pussaivel avant che cumenzar la furmaziun da basa)
  • cun in attest federal professiunal en in mastergn agricul (AFP), cun in attest federal da qualificaziun (AFQ) en in auter mastergn u cun il diplom da maturitad sa scursanescha per regla la scolaziun per daventar pumicultur / pumicultura AFQ sin 2 onns
  • cun in attest federal da qualificaziun (AFQ) en in auter mastergn agricul po la scolaziun per daventar pumicultur / pumicultura AFQ sa scursanir sin 1 onn
Pretensiuns
  • plaschair da lavurar sut tschiel avert
  • sanadad robusta
  • perseveranza e resolutezza
  • enclegientscha per ils connexs en la natira
  • enclegientscha tecnica, bun dun d’ir enturn cun maschinas ed indrizs
  • inschign manual
  • senn da responsabladad

Furmaziun supplementara

Curs

Purschidas dal Strickhof, Au ZH, der ZHAW, Wädenswil e da posts spezialisads chantunals e da centers agriculs da furmaziun

Furmaziun da basa scursanida

Suenter avair terminà la furmaziun da basa po vegnir absolvì ina furmaziun da basa scursanida dad 1 onn en ina autra professiun agricula.

Examen professiunal (EP)

mainagestiun da pumicultura u d’agricultura cun certificat professiunal federal u in auter examen professiunal sin il champ da l’agricultura, spezialist / spezialista da commerzi en detagl cun certificat professiunal federal

Examen professiunal superiur (EPS)

maister pumicultur / maistra pumicultura , maister pur / maistra pura u in auter examen professiunal superiur dal champ professiunal agricultura

Scola spezialisada superiura (SSS)

agrotecnicher / agrotecnicra dipl.  SSS, commerziant agricul / commerzianta agricula SSS

Scola auta spezialisada (SAS)

Bachelor of Science (SAS) en agronomia, Bachelor of Science (SAS) en inschigneria da l’ambient (p.ex. approfundaziun puresser biologic ed orticultura)

Cundiziuns da lavur

Pumiculturs lavuran en manaschis da pumicultura e da propagaziun, en planteras, tar societads cooperativas purilas u en commerzis da puma. Cun ina furmaziun supplementara correspundenta pon pumiculturs era lavurar en la perscrutaziun u en la cussegliaziun.

I dat paucas plazzas d’emprendissadi.. Spezialists cun ina buna furmaziun èn fitg tschertgads.

Ulteriuras infurmaziuns

OdA AgriAliForm
c/o Schweiz. Bauernverband
Laurstr. 10
5201 Brugg AG
Tel: 056 462 54 30
URL: www.agri-job.ch

Strickhof Lindau
8315 Lindau
Tel: 052 354 98 11
URL: www.strickhof.ch

Schweizer Obstverband SOV
Baarerstr. 88
Postfach 2559
6302 Zug
Tel: 041 728 68 68
URL: www.swissfruit.ch



orientation.ch