Lavurs
Gravaders e gravadras fan gravuras sin objects tecnics, objects da decoraziun, bischutaria ed utensils da zin, mesch, argient, aur, atschal ed auters materials gravabels: monograms, nums, vopnas, signets u texts.
Durant il gravar lavuran gravaders a maun tenor sbozs u tenor atgnas skizzas sin basa da las ideas da la clientella. Els transmettan la skizza sin il object. Suenter entschaiva la vaira lavur dal gravader, per la quala els dovran cisel, stgalper, punzas e divers utensils manuals ch’els han per part producì sezs.
Models da reliev e schablonas sa sviluppeschan era en lavur manuala. Els vegnan explorads cun agid da maschinas e transmess en atschal. Uschia naschan furmas per utensils da stanzar e stampar en reliev che vegnan per exempel utilisads durant la producziun da medaglias, munaida u products da l’industria d’emballadis.
Gravaders entschaivan la gravura da maschinas cun la lectura e l’interpretaziun da dissegns da lavuratoris, datas electronicas e skizzas da la clientella. Els determineschan il process da lavur e creeschan il sboz cun agid da programs grafics. Tut tenor il pensum ed il material da fabricaziun elegian els il tip da maschina, la sveltezza dal tagl, l’avanzada e la profunditad da la stalizza. Els dovran maschinas da gravura cun differentas tecnicas: CNC, laser e pantograf.
Gravaders enconuschan las caracteristicas e las pussaivladads da l’utilisaziun da different material da fabricaziun e las tecnicas da basa da l’elavuraziun da metal sco furar, resgiar, glimar, gizzar e tagliar crennadiras. Els fan diever da quellas tecnicas manualas tranter auter durant la fabricaziun d’agens utensils manuals.
Era la tgira ed il mantegniment d’utensils e maschinas, sco per exempel il gizzar dals utensils manuals, fan part dal champ d’incumbensas da gravaders.
Durant la lavur resguardan gravaders las prescripziuns da la lescha e dal manaschi pertutgant la segirezza da la lavur e la protecziun da la sanadad e da l’ambient. Uschia protegian els sasezs, collavuraturs, il manaschi e l’ambient da consequenzas negativas.
Scolaziun
Basa legala
Ordinaziun federala 22-11-2010 (stan 1-1-2018)
Durada
4 onns
Furmaziun en la pratica
En il manaschi da furmaziun
Furmaziun en scola
1 di per emna a la scola professiunala
Roms professiunals
- creaziun
- tecnicas da gravura e tecnicas da fabricaziun
- segirezza da la lavur, protecziun da la sanadad e da l’ambient
Curs ordaifer il manaschi
Tar differents temas
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Attestat federal da qualificaziun "gravader / gravadra AFQ"
Premissas
Furmaziun preliminara
- scola populara terminada
- bunas prestaziuns en dissegn e quint
Pretensiuns
- inschign manual
- enclegientscha tecnica
- imaginaziun spaziala
- talent da dissegn
- senn per furmas e scrittiras
- plaschair vi da lavurs al computer
- moda da lavurar exacta
- autonomia
- buna vesid
Furmaziun supplementara
Curs
purschidas da scolas d’art applitgà e da scolas professiunalas sco era dal l’Associaziun svizra da gravaders
Scola spezialisada superiura (SSS)
curs da furmaziun en differents champs spezials, p.ex. creader diplomà / creadra diplomada SSS design da products
Scola auta spezialisada (SAS)
percurs da studis en secturs parentads, p.ex. Bachelor of Arts (SAS) en design da products e d’industria
Cundiziuns da lavur
Gravaders e gravadras lavuran en manaschis pitschens fin mesauns.
Singulas pussaivladads d’engaschament existan era en manaschis d’industria, per exempel en il sectur da construcziun da furmas e d’utensils.
La fundaziun d’in agen manaschi pretenda iniziativa, perseveranza ed ina gronda savida professiunala.