Mecanists e mecanistas da velos passentan ina gronda part da lur temp da lavur en il lavuratori. Là mainan els surtut tras lavurs da service e da midadas sco er controllas da funcziun vi da velos da tuttas sorts. Cunquai ch’il lavuratori è savens er collià cun ina fatschenta da vendita, s’occupan els er da la clientella. Els la beneventan, prendan cunter incumbensas da la clientella, la cusseglian ed infurmeschan davart defects, custs sco er novaziuns. Els decleran ils avantatgs ed ils dischavantatgs da differents vehichels a duas rodas e vendan velos, vestgadira ed accessori.

Mecanists da velos mainan tras en il lavuratori lavurs da mantegniment, reparaturas e midadas vi da velos e velos electrics. Els survesan las lavurs, calculeschan il temp ch’i dovra e planiseschan decurs, uschia ch’ils vehichels pon vegnir surdads a temp a la clientella. Las lavurs fan els a moda conscienziusa.

Mecanists da velos mantegnan, repareschan e megliereschan roms da velos e parts dal schassis. Els valiteschan e controlleschan roms, rodas, radis, rulleras da la roda, rodas e pilotadis sin donns, per exempel tras isada u accidents. Els centreschan rodas, remplazzan pneus, nettegian rulleras dal chau dal guvernagl, controlleschan pedaleras ed unschan tut las parts moviblas. Els reparan suspensiuns e mitigiaziuns e reorganiseschan quellas per in cumportament optimal en il traffic. Ils differents frains sco frains da giavegls, da rudella e da rollas controlleschan els u ch’els als moderniseschan.

Els sa fatschentan cun la tracziun, la midada dals girs e cun l’electronica dal velo. Mecanists da velos examineschan e giusteschan chadainas sco er transmissiuns a mosels e reparan indrizs d’illuminaziun. Tar vehichels electrics tschertgan els cun apparats da mesirar suenter disturbis, chargian e remplazzan battarias, reparan defects vi da motors electrics.

Parts defectas vegnan per motivs da custs savens remplazzadas e betg reparadas. Mecanists da velos san dentant tuttina era resgiar, buglir u tagliar bain crennadiras, quai per savair reparar u fabritgar parts ch’els na survegnan betg pli. Sco generalists en la fatschenta professiunala administreschan els ultra da quai il magasin da tocs da reserva e fan empustaziuns. Els sa tegnan vi da las prescripziuns davart la garanzia da la qualitad, la segirezza da la lavur, la protecziun da la sanadad, da l’ambient e d’accidents.