Lavurs
Construiders e construidras da puntanadas installeschan e demonteschan puntanadas vi da fatschadas, auzaders da construcziun, tetgs provisorics, puntanadas spezialas ed autras construcziuns temporaras sco tribunas e passarellas. Els segireschan las puntanadas cun tschabargals e raits da protecziun.
Sin basa da plans e skizzas calculeschan construiders da puntanadas il material che vegn duvrà. Els organiseschan il transport da la tocca da construcziun al plazzal, endrizzan il plazzal e planiseschan il process da lavur. Sin il plazzal procuran els per in deposit professiunal dal material ed al monteschan conscienziusamain.
Construiders da puntanadas ston avair grondas enconuschientschas professiunalas e precisiun. Els èn spezialmain dumandads cura ch’els ston construir puntanadas purtantas per la construcziun da punts u per autras construcziuns d’art.
Tar ils pensums da construiders da puntanadas tutga era la construcziun d’auzaders da construcziun per persunas e material. Els installeschan e demonteschan era passarellas provisoricas, tribunas, cumposiziuns da plattafurmas ed autras construcziuns temporaras.
Construiders da puntanadas lavuran a l’autezza e ston perquai esser senza sturnizi. Els enconuschan ils privels dal plazzal e resguardan adina las prescripziuns davart la segirezza da la lavur e la prevenziun d’accidents.
Scolaziun
Basa legala
Ordinaziun federala 21-10-2016
Durada
3 onns
Furmaziun en la pratica
En in manaschi da la branscha da paraids e mirs exteriurs d’edifizis
Furmaziun en scola
Curs en bloc a la scola professiunala a Uzwil/SG
Roms professiunals
- prescripziuns e mesiras davart la segirezza da lavur e la protecziun da la sanadad e da l’ambient
- installaziun da stresas e sistems vi da paraids e mirs exteriurs
- planisaziun e preparaziun da las construcziuns da puntanadas
- montar, demontar e mantegnair las construcziuns da puntanadas
Curs ordaifer il manaschi
Emprender ed exercitar a moda pratica la basa professiunala
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Attestat federal da qualificaziun "construider / construidra da puntanadas AFQ"
Premissas
Furmaziun preliminara
- scola populara terminada
Pretensiuns
- esser senza sturnizi
- inschign da raiver
- abilitad da lavurar en in team
- inschign manual
- enclegientscha pratica
- enclegientscha tecnica
- imaginaziun spaziala
- sanadad robusta
- flexibilitad corporala
Furmaziun supplementara
Curs
purschidas da scolas spezialisadas e scolas professiunalas, da l’uniun Polybau sco era da manaschis da la branscha da paraids e mirs d’exteriur d’edifizis
Furmaziun da basa scursanida
- emprendissadi supplementar d’in onn sco isolader / isoladra AFQ, sco tetger / tetgera AFQ u sco constructur / constructura da fatschadas AFQ
- emprendissadi supplementar da dus onns sco montader / montadra da storas AFQ u sco toler / tolera AFQ
Examen professiunal (EP)
cun diplom federal: manader / manadra da construcziun da paraids e mirs exteriurs, cussegliader energetic / cussegliadra energetica en edifizis u manader / manadra da project en montascha d’installaziuns dal current solar
Examen professiunal superiur (EPS)
maister / maistra en policonstrucziun
Scola spezialisada superiura (SSS)
curs da furmaziun en domenas sumegliantas, p. ex. tecnicist / tecnicista SSS surveglianza da construcziun
Scola auta spezialisada (SAS)
direcziuns da studi en roms sumegliants, p. ex. Bachelor of Science SAS en tecnica da construcziun (direcziun paraids e mirs exteriurs) a la scola auta a Lucerna
Cundiziuns da lavur
Construiders da puntanadas lavuran en manaschis da la branscha da paraids e mirs exteriurs d’edifizis u en uschenumnads manaschis maschadads (mirs exteriurs d’edifizis e tolaria).
Quai èn per ordinari manaschis pitschens u mesauns.
Construiders da puntanadas pon era lavurar en manaschis d’industria che fabritgeschan products per paraids e mirs exteriurs.
Ulteriuras infurmaziuns
Uniun Polybau
Lindenstr. 4
Postfach
9240 Uzwil
Tel: 071 955 70 41
URL: www.polybau.ch