Surdorader-enramader / Surdoradra-enramadra AFQ

Surdoraders-enramaders e surdoradras-enramadras fan roms da maletgs, enrameschan maletgs e surdoreschan roms ed objects sco per exempel sculpturas da lain, tavlas d’ustarias euv. D’ina vart reparan, conservan e restaureschan els objects vegls, da l’autra vart fan els novs roms da maletgs. Per reparar e restaurar dovran els tant tecnicas tradiziunalas sco er novas. Il pli savens lavuran els en l’atelier, tar lavurs da restauraziun lavuran els mintgatant er direct sin il plazzal en baselgias.

La fabricaziun da roms pretenda ina preparaziun da la lavur ed in’execuziun da la lavur conscienziusa. Surdoraders-enramaders tschertgan en il deposit da laina profils da laina adattads, als taglian exactamain sin mesira, tatgan ils elements dal rom tar in rom e fixeschan las parts tatgadas cun meds d’agid adattads. Suenter las lavurs da mular exactas dattan els l’emprima colurada sin il rom. Latiers dovran els ina basa da crida ch’els han preparà sezs. Quella dattan els si cun il penel u cun la pistola da squittar. Il rom grundà vegn danovamain glimà.

Tar la surdorada da roms ed objects taglian ils spezialists folia da metal e la mettan sin la surfatscha che vegn surdorada.  Latiers differenzieschan els ils dus proceders surdorar cun puliment e surdorar cun ieli. Suenter vegn il rom colurà, patinà e sche necessari vernischà. Els maschaidan il tun da colur giavischà e dattan si la colur, la vernisch transparenta u la titgira preparada. Tenor basegn elavuran els la surfatscha per imitar segns da la vegliadetgna.

La fabricaziun da roms vegn terminada cun l’enramaziun. Quella cumpiglia sper ulteriuras incumbensas il tagliar chartun per il passepartout, il tagliar vaider sco er l’elavuraziun d’urs da vaider, il stender e montar dal purtader da maletgs e la fin finala l’enramar.

Surdoraders-enramaders cusseglian la clientella a moda cumpetenta ed amiaivla. Els taidlan ils giavischs da la clientella, fan propostas cun stil segir ed exequeschan las incumbensas a moda professiunala. Durant la lavur dal mintgadi tegnan els net lur lieu da lavur e resguardan aspects ecologics. Els tgiran lur maschinas ed utensils e resguardan las prescripziuns da la prevenziun d’accidents.